ទីក្រុងវេលីងតុន៖ រដ្ឋាភិបាលនូវែលហ្សេឡង់សម្រេចចិត្តថាខ្លួននឹងមិនចូលរួមនៅក្នុងក្រុមប្រឹក្សាសន្តិភាពដែលផ្ដួចផ្ដើមឡើងដោយលោកដូណាល់ត្រាំទេ។ នេះបើយោងតាមការបញ្ជាក់របស់នាយករដ្ឋមន្ត្រីនូវែលហ្សេឡង់ លោកគ្រីស្តូហ្វឺ ឡាក់សុន (Christopher Luxon)។ លោកត្រាំបានប្រកាសបើកសម្ពោធការដាក់ឱ្យដំណើរការក្រុមប្រឹក្សាសន្តិភាពនៅទីក្រុងដាវ៉ូស ប្រទេសស្វីស កាលពីសប្ដាហ៍មុន។
កិច្ចការដំបូងរបស់ក្រុមប្រឹក្សានេះគឺដោះស្រាយ និងស្ដារតំបន់ហ្កាហ្សាឡើងវិញទាំងសេដ្ឋកិច្ច សន្តិសុខ និងហេដ្ឋារចនាសម្ព័ន្ធ។ ប៉ុន្តែការបំពេញការងាររបស់ក្រុមប្រឹក្សានេះមានលក្ខណៈធំទូលាយណាស់ព្រោះបង្កើតឡើងដើម្បីដោះស្រាយជម្លោះប្រដាប់អាវុធទូទាំងសាកលលោក។ ម៉្យាងទៀត ក្រុមប្រឹក្សានេះក៏ទទួលបានអាណត្តិពីក្រុមប្រឹក្សាសន្តិសុខអង្គការសហប្រជាជាតិផងដែរ។
លោកត្រាំបានផ្ញើលិខិតអញ្ជើញទៅបណ្ដាប្រទេសជាច្រើនដើម្បីឱ្យពួកគេពិចារណា។ បណ្ដាប្រទេសមហាអំណាចនៅមជ្ឈិមបូព៌ាដូចជាតួកគី, អេហ្ស៊ីប, អារ៉ាប៊ីសាអូឌីត និងកាតាបានប្រកាសទទួលយកការអញ្ជើញនេះ។ ប្រទេសដែលកំពុងអភិវឌ្ឍខ្លាំងដូចជាឥណ្ឌូណេស៊ីជាដើមក៏បានប្រកាសចូលរួមក្រុមប្រឹក្សាសន្តិភាពនេះផងដែរ។ ចំណែកក្រុមបស្ចិមប្រទេស និងសម្ព័ន្ធមិត្តចាស់វស្សារបស់អាមេរិកហាក់ដូចជាមិនចាប់អារម្មណ៍នឹងក្រុមប្រឹក្សានេះទេ។
លោកឡាក់សុនប្រកាសតាមអ៊ីមែលថាលោកសម្រេចចិត្តរួចហើយថានឹងមិនចូលរួមនៅក្នុងក្រុមប្រឹក្សាសន្តិសុខទេដោយយោងទៅលើរចនាសម្ព័ន្ធបច្ចុប្បន្ន។ រដ្ឋមន្ត្រីការបរទេសនូវែលហ្សេឡង់ជួយនិយាយបន្ទរតាមលោកឡាក់សុន។ លោកបង្ហោះសារនៅលើបណ្ដាញអ៊ិចថារដ្ឋមួយចំនួន ជាពិសេសរដ្ឋនៅក្នុងតំបន់ បានចូលរួមចំណែកនៅក្នុងការបំពេញតួនាទីក្រុមប្រឹក្សានេះដើម្បីដោះស្រាយបញ្ហានៅហ្កាហ្សា។ លោកថានូវែលហ្សេឡង់មិនចាំបាច់ចូលរួមចំណែកបន្ថែមទៀតទេ។
លោកឡាក់សុនបង្ហោះសារនៅលើបណ្ដាញសង្គមថាក្នុងនាមជាសមាជិកស្ថាបនិកអង្គការសហប្រជាជាតិ និងក៏ជាអ្នកគាំទ្រអង្គការនេះជាយូរមកហើយ នូវែលហ្សេឡង់យល់ថាជារឿងសំខាន់បើមានក្រុមប្រឹក្សានេះជួយបំពេញការងារបន្ថែម និងស្របទៅតាមធម្មនុញ្ញអង្គការសហប្រជាជាតិ។ ប៉ុន្តែលោកយល់ថានេះជាស្ថាប័នដែលទើបតែបង្កើតថ្មី។ ដូច្នេះ យើងត្រូវការការបញ្ជាក់បន្ថែមឱ្យបានច្បាស់ទៅលើស្ថាប័ននេះ និងបកស្រាយចម្ងល់នានាពាក់ព័ន្ធនឹងវិសាលភាពនៃការបំពេញការងាររបស់ស្ថាប័ននេះមិនថាពេលនេះ និងពេលអនាគត៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ