អន្តរជាតិ ៖ តម្លៃមាសអន្តរជាតិបានធ្លាក់ចុះយ៉ាងគំហុកនៅថ្ងៃទី៣០ ខែមករា ឆ្នាំ២០២៦ ដោយសារសម្ពាធពីការឡើងថ្លៃប្រាក់ដុល្លារអាមេរិក ប៉ុន្តែនៅតែត្រូវបានកំណត់សម្រាប់ការកើនឡើងប្រចាំខែ (មករា) ខ្ពស់បំផុត ចាប់តាំងពីឆ្នាំ…
អន្តរជាតិ ៖ តម្លៃមាសអន្តរជាតិបានធ្លាក់ចុះយ៉ាងគំហុកនៅថ្ងៃទី៣០ ខែមករា ឆ្នាំ២០២៦ ដោយសារសម្ពាធពីការឡើងថ្លៃប្រាក់ដុល្លារអាមេរិក ប៉ុន្តែនៅតែត្រូវបានកំណត់សម្រាប់ការកើនឡើងប្រចាំខែ (មករា) ខ្ពស់បំផុត ចាប់តាំងពីឆ្នាំ ១៩៨០ ខណៈតម្រូវការលោហៈធាតុដ៏មានតម្លៃដែលត្រូវបានចាត់ទុកជាទ្រព្យសកម្មដ៏មានសុវត្ថិភាពបំផុតមួយនេះ កើនឡើងយ៉ាងខ្លាំង ចំពេលមានភាពមិនប្រាកដប្រជាខាងភូមិសាស្ត្រនយោបាយ និងបញ្ហាសេដ្ឋកិច្ចសកល ដែលនៅតែបន្តកើតមាន។ នេះបើតាមការចេញផ្សាយពីទីភ្នាក់ងារសារព័ត៌មាន Reuters ។
តម្លៃមាសអន្តរជាតិភ្លាមៗបានធ្លាក់ចុះ ២,៤៧% មកត្រឹម ៥ ១៧៤ ដុល្លារក្នុង១អោន ឬ ៦ ២៣៣ ដុល្លារក្នុង១តម្លឹង គិតត្រឹមម៉ោង ១០ និង ៤០ នាទីព្រឹកថ្ងៃទី៣០ ខែមករា ឆ្នាំ២០២៦ (ម៉ោងនៅកម្ពុជា) បន្ទាប់ពីហក់ឡើងដល់កម្រិតខ្ពស់បំផុតមិនធ្លាប់មានពីមុន ៥ ៥៩៤ ដុល្លារ/អោន ឬ ៦ ៧៣៩ ដុល្លារ/តម្លឹង កាលពីថ្ងៃទី២៩ ខែមករា កន្លងទៅ។
តម្លៃមាសអន្តរជាតិបានកើនឡើងជាង ២៤% គិតរហូតមកដល់ពេលនេះនៅក្នុងខែមករា ដោយឆ្ពោះទៅរកការកើនឡើងរយៈពេល៦ខែជាប់ៗគ្នា និងជាការកើនឡើងប្រចាំខែដ៏ខ្ពស់បំផុតចាប់តាំងពីខែមករា ឆ្នាំ១៩៨០។
ដោយឡែក សន្ទស្សន៍ប្រាក់ដុល្លារអាមេរិកបានកើនឡើងខ្ពស់ គាំទ្រដោយផ្នែកនៃការសម្រេចចិត្តរបស់ធនាគារកណ្តាលសហរដ្ឋអាមេរិក (Fed) កាលពីថ្ងៃទី២៨ ខែមករា ឆ្នាំ២០២៦ ដោយបានសម្រេចរក្សាអត្រាការប្រាក់ឱ្យនៅដដែល ពោលចន្លោះ ៣,៥% ទៅ ៣,៧៥% ។ លោក Jerome Powell ប្រធាន Fed បានលើកឡើងថា អតិផរណាក្នុងខែធ្នូទំនងជាខ្ពស់ជាងគោលដៅ ២% របស់ Fed។
ក្រឡេកទៅភូមិសាស្ត្រានយោបាយសកលឯណោះវិញ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កំពុងថ្លឹងថ្លែងជម្រើសប្រឆាំងនឹងប្រទេសអ៊ីរ៉ង់ដែលរួមមានការវាយប្រហារគោលដៅលើកងកម្លាំងសន្តិសុខ និងបណ្តាមេដឹកនាំរបស់ប្រទេសនេះ ស្របពេលប្រភពជាច្រើនបានអះអាងថា បើទោះបីជាមន្ត្រីអ៊ីស្រាអែល និងប្រទេសនៅអារ៉ាប់បានប្រាប់ថា កម្លាំងផ្លូវអាកាសតែមួយមុខ នឹងមិនអាចផ្តួលរំលំមេដឹកនាំសាសនារបស់អឺរ៉ង់បានយ៉ាងណាក៏ដោយ។
ធនាគារវិនិយោគរបស់ប្រទេសស្វីស UBS បានដំឡើងការព្យាករណ៍តម្លៃមាសគោលដៅរបស់ខ្លួនដល់ ៦ ២០០ ដុល្លារ/អោន ឬ ៧ ៤៦៩ ដុល្លារ/តម្លឹង សម្រាប់ខែមីនា មិថុនា និងកញ្ញា ឆ្នាំ ២០២៦ បើធៀបនឹងការព្យាករណ៍ពីមុនរបស់ខ្លួនត្រឹម ៥ ០០០ ដុល្លារ ដោយលើកឡើងពីតម្រូវការខ្លាំងជាងការរំពឹងទុក ដែលបណ្តាលមកពីការវិនិយោគកើនឡើង៕
ចែករំលែកព័តមាននេះ