ចិនប្រហារជីវិតសមាជិក១១នាក់នៃក្រុមម៉ាហ្វីយ៉ាឆបោកតាមអនឡាញនៅមីយ៉ាន់ម៉ា
ប្រទេសចិន ៖ កាលពីថ្ងៃទី២៩ មករា ចិនបានប្រហារជីវិតអ្នកទោសឆបោកតាមអនឡាញ១១នាក់ ។ យោងតាមកាសែតចិនSOUTH CHINA MORNING POSTថា…
ប្រទេសចិន ៖ កាលពីថ្ងៃទី២៩ មករា ចិនបានប្រហារជីវិតអ្នកទោសឆបោកតាមអនឡាញ១១នាក់ ។ យោងតាមកាសែតចិនSOUTH CHINA MORNING POSTថា ជាសមាជិកក្រុមម៉ាហ្វីយ៉ាចិនមួយនៃក្រុមឧក្រិដ្ឋត្រកូលមីញ ។ ទោសប្រហារជីវិតពួកគេត្រូវបានសម្រេចដោយតុលាការមួយនៃខេត្តហ្សេជាំង ។
តុលាការនោះវាយតម្លៃថា ជនជាប់ចោទទាំងនោះបានប្រព្រឹត្តឧក្រិដ្ឋកម្មធ្ងន់ធ្ងរ និងសាហាវនានា ដែលបង្កផលវិបាកធំមហាសាល ។ អំពើរបស់ពួកគេមានច្បាស់លាស់ និងមានភស្ដុកតាងគ្រប់គ្រាន់ ។ ការកាត់ទោសប្រហារជីវិតពួកគេពិតជាសមស្របហើយបណ្ដានីតិវិធីរបស់តុលាការក៏ត្រឹមត្រូវដែរ ។
ចាប់តាំងពីឆ្នាំ២០១៥ មក អង្គការឧក្រិដ្ឋនេះមានសកម្មភាពខ្លាំងក្នុងតំបន់KOKANG មីយ៉ាន់ម៉ា ហើយជាពិសេស នៅតំបន់LAUKKAI និងតំបន់CHINSHWEHAW ។ តុលាការអះអាងថា ក្រុមម៉ាហ្វីយ៉ានោះ គ្រប់គ្រងប្លុកអការជាច្រើនហើយក្រុមគេបានចំណាយប្រាក់សម្រាប់កិច្ចការពារ និងមានការជួយទ្រទ្រង់ខាងហិរញ្ញវត្ថុ សម្រាប់ថ្វើសកម្មភាពឆបោកតាមអនឡាញ និងបើកបណ្ដាកាស៊ីណូខុសច្បាប់ក្នុងទំហំទឹកប្រាក់ជាង១០ពាន់លានយន់ប្រមាណជា១,២ពាន់លានអឹរ៉ូ ។
កាសែត SOUTH CHINA MORNING POSTបន្តទៀតថាកាន់តែអាក្រក់ថែមទៀត ក្នុងសកម្មភាពឧក្រិដ្ឋរបស់ខ្លួនត្រកូលមីញតែងប្រើប្រាស់អំពើហិង្សាជួនកាលសម្លាប់មនុស្សផង ហើយក្នុងក្របខណ្ឌនោះ ពួកអ្នកជាប់ចោទទាំងនេះបានទទួលស្គាល់ថា ពួកគេបានសម្លាប់មនុស្ស ធ្វើទារុណកម្ម វាយដំបង្ករបួសស្នាម នៅក្នុងបណ្ដាមជ្ឈមណ្ឌលឆបោកតាមអនឡាញ ។
យោងតាមតុលាការថា ក្រុមឧក្រិដ្ឋនោះសម្លាប់ជនជាតិចិនយ៉ាងតិច១៤នាក់ ។ អាស្រ័យហេតុនេះហើយ បានជារដ្ឋអំណាចក្រុងប៉េកាំងបានប្រកាន់ជំហរម៉ឺងម៉ាត់ប្រឆាំងក្រុមម៉ាហ្វីយ៉ានោះ ។ អ្នកនាំពាក្យក្រសួងការបរទេសចិន លោកGUO JIAKUN អះអាងជាថ្មីពីការខិតខំប្រឹងប្រែងរួមរបស់ប្រទេសលោកជាមួយមីយ៉ាន់ម៉ា ដើម្បីកម្ទេចល្បែងអនឡាញនិងការឆបោកតាមបណ្ដាញទូរគមនាគមន៍ ក្នុងគោលដៅការពារអាយុជីវិត និងទ្រព្យសម្បត្តិ ព្រមទាំងសន្តិសុខរបស់មនុស្ស ៕
ចែករំលែកព័តមាននេះ