ទីក្រុងកៀវ៖ លោកត្រាំថ្លែងថាលោកពូទីនយល់ព្រមជាមួយលោកដើម្បីផ្អាកវាយប្រហាររដ្ឋធានីកៀវរបស់អ៊ុយក្រែន និងទីក្រុងតូចធំដទៃទៀតរយៈពេលមួយសប្ដាហ៍ដើម្បីទុកឱ្យប្រជាជនអ៊ុយក្រែនរស់នៅបានស្រួលបន្តិចនៅក្នុងសីតុណ្ហភាពចុះត្រជាក់ខ្លាំង។ ក្រោយការថ្លែងដូច្នេះ វិមានក្រឹមឡាំងមិនទាន់ចេញមកបញ្ជាក់ថាលោកពូទីនពិតជាបានយល់ព្រម ឬយ៉ាងណាទេ។
រុស្ស៊ីនៅតែបន្តវាយប្រហារយ៉ាងខ្លាំងក្លាទៅទីតាំងសំខាន់ៗស្តុកទុក ឬផលិតថាមពលរបស់អ៊ុយក្រែន។ រុស្ស៊ីសង្ឃឹមថាធ្វើដូច្នេះអាចឱ្យអ៊ុយក្រែនចុះខ្សោយការតស៊ូ និងធ្វើឱ្យប្រជាជនអ៊ុយក្រែនទូទាំងប្រទេសរស់នៅត្រជាក់ស្ទើរស្លាប់ដោយសារគ្មានអ្វីសម្រាប់ដុតកម្ដៅខ្លួន។ នៅក្នុងកិច្ចប្រជុំគណៈរដ្ឋមន្ត្រីនៅសេតវិមានថ្មីៗនេះ លោកត្រាំអះអាងថាលោកបានស្នើសុំឱ្យលោកពូទីនផ្អាកវាយប្រហារទីក្រុងកៀវ និងទីក្រុងដទៃទៀតរយៈពេលមួយសប្ដាហ៍នៅពេលដែលអាកាសធាតុចុះត្រជាក់ខ្លាំង។ លោកបញ្ជាក់ថាលោកពូទីនបានយល់ព្រមតាមសំណើនេះ។
កាលពីមុននេះអ្នកសារព័ត៌មានបានសាកសួរអ្នកនាំពាក្យវិមានក្រឹមឡាំងដើម្បីចង់ដឹងថាតើនៅពេលជួបគ្នានៅទីក្រុងអាប៊ូដាប៊ី ប្រទេសអារ៉ាប់រួមនោះ ភាគីទាំង២បានពិភាក្សាគ្នាអំពីការផ្អាកវាយប្រហារទីតាំងផលិតថាមពលដែរឬទេ។ អ្នកនាំពាក្យរូបនេះសូមមិនធ្វើអត្ថាធិប្បាយលើបញ្ហានេះទេ។ កាលពីល្ងាចថ្ងៃពុធ លោកហ្សេឡិនស្គី ថ្លែងថាទោះបីភាគីទាំង២ត្រៀមចូលរួមកិច្ចចរចាគ្នាក្រោមការសម្របសម្រួលពីអាមេរិកក៏ដោយ ក៏រុស្ស៊ីត្រៀមវាយប្រហារទ្រង់ទ្រាយធំជាបន្តទៀត។
លោកត្រាំថ្លែងថាលោកមានចិត្តសប្បាយរីករាយដែលលោកពូទីនយល់ព្រមជាមួយលោក។ ទីក្រុងកៀវប្រឈមនឹងការខ្វះខាតថាមពលសម្រាប់កម្ដៅខ្លួននៅរដូវរងាឆ្នាំនេះ។ បន្តិចទៀតនឹងចុះត្រជាក់កាន់តែខ្លាំង។ សីតុណ្ហភាពនៅទីកន្លែងខ្លះអាចនឹងចុះត្រជាក់ដល់ដក៣០អង្សាក្រោមសូន្យ។ នេះបើយោងតាមការព្យាកររបស់សេវាសង្គ្រោះរបស់រដ្ឋាភិបាលអ៊ុយក្រែន។
លោកត្រាំនិយាយរំលឹកថាមុនពេលលោកទាក់ទងទៅលោកពូទីន មនុស្សច្រើនណាស់និយាយប្រាប់លោកថាមិនចាំបាច់ចំណាយពេលហៅទូរស័ព្ទទេនាំតែខ្ជះខ្ជាយពេលវេលាឥតប្រយោជន៍។ ប៉ុន្តែនៅទីបំផុត លោកពូទីនយល់ព្រម។ យើងសប្បាយចិត្តណាស់។ លោកហ្សេឡិនស្គីក៏សូមអរគុណលោកត្រាំចំពោះកិច្ចខិតខំប្រឹងប្រែងនេះ។ បើសិនរុស្ស៊ីពិតជាផ្អាកវាយប្រហារមែន អ៊ុយក្រែនក៏ស្វាគមន៍ផងដែរ។ លោកហ្សេឡិនស្គីបង្ហោះសារនៅលើបណ្ដាញសង្គមថាការផ្គត់ផ្គង់ថាមពលជាមូលដ្ឋានគ្រឹះនៃជីវិត៕ ប្រភព៖ អេភី និងប្រភពដទៃទៀត
ចែករំលែកព័តមាននេះ