រាជធានីភ្នំពេញ ៖ ផ្ទះឈើលើថ្ម ក្រោមមួយខ្នង នៅចន្លោះអគារផ្ទះជួលខ្ពស់ៗ ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្ដាឱ្យរងរបួសធ្ងន់ស្រាល ចំនួន៤នាក់ ត្រូវបានសមត្ថកិច្ចជួយសង្គ្រោះបញ្ជូនទៅកាន់មន្ទីរពេទ្យ ។ ហេតុការណ៍អគ្គិភ័យនេះ…
រាជធានីភ្នំពេញ ៖ ផ្ទះឈើលើថ្ម ក្រោមមួយខ្នង នៅចន្លោះអគារផ្ទះជួលខ្ពស់ៗ ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្ដាឱ្យរងរបួសធ្ងន់ស្រាល ចំនួន៤នាក់ ត្រូវបានសមត្ថកិច្ចជួយសង្គ្រោះបញ្ជូនទៅកាន់មន្ទីរពេទ្យ ។
ហេតុការណ៍អគ្គិភ័យនេះ បានកើតឡើងវេលាម៉ោង០៥និង៥០នាទីល្ងាចថ្ងៃទី២៩ ខែមករា ឆ្នាំ២០២៦ ផ្ទះលេខ១៧DE ផ្លូវ២២៧ ក្រុម០៣ ភូមិ១០ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមសាក្សីបានឲ្យដឹងថា នៅមុនពេលកើតហេតុ ភ្លើងបានឆាប់ឆេះចេញពីផ្ទះ១ល្វែង ធ្វើពីថ្មក្រោមឈើលើយ៉ាងសន្ធោសន្ធៅបង្កឲ្យមានការភ្ញាក់ផ្អើលយ៉ាងខ្លាំងហើយអណ្ដាតភ្លើងបានឆេះ រោលទៅបន្ទប់ជួល នៃអគារផ្ទះជួលខ្ពស់ៗដែលនៅជាប់នោះ។ អាជ្ញាធរ និងសមត្ថកិច្ចមូលដ្ឋាន ក៏បានទាក់ទងហៅរថយន្តពន្លត់អគ្គិភ័យជាច្រើនគ្រឿង ទៅអន្តរាគមន៍បាញ់ទឹកពន្លត់ ។
មន្ត្រីនគរបាលការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានឲ្យដឹងថា រថយន្តពន្លត់អគ្គិភ័យចំនួន ១៨គ្រឿង បានទៅអន្តរាគមន៍ បាញ់ពន្លត់ដោយប្រើប្រាស់ទឹកអស់ ចំនួន១៤គ្រឿង ស្មើនឹង ៥៦ម៉ែត្រគូប។ នៅក្នុងនោះ រថយន្តការិការិយាល័យបង្ការពន្លត់អគ្គិភ័យ និងសង្គ្រោះ ចំនួន ១៤គ្រឿង, រថយន្ត ក្រសួងមហាផ្ទៃ ចំនួន២គ្រឿង, ស្រាបៀរកម្ពុជា ១គ្រឿង និងរថយន្តកោះនរា ចំនួន១គ្រឿង ហើយភ្លើងបានរលត់ទៅវិញនៅម៉ោង០៦និង២០នាទីល្ងាច នាថ្ងៃដដែល ។
មន្ត្រីនគរបាល បានឲ្យដឹងទៀតថា អគ្គិភ័យនេះបណ្តាលអោយផ្ទះមួយល្វែងធ្វើពីថ្មក្រោម ឈើលើ ទំហំ៦ម៉ែត្រ គុណ៨ម៉ែត្រ ដែលមានម្ចាស់ផ្ទះឈ្មោះ ទូច ញ៉ ភេទស្រី អាយុ៦៤ឆ្នាំ មុខរបរ ទិញលក់អេតចាយ បានរងការខូចខាតទាំងស្រុង ព្រមទាំងឆេះរោលជញ្ជាំងដល់ផ្ទះអ្នកជិតខាងចំនួន ២ល្វែង និងម៉ូតូចំនួន៦គ្រឿង។ នៅក្នុងគ្រោះអគ្គិភ័យនេះ បណ្ដាលឲ្យមនុស្ស រងរបួស ចំនួន ៤នាក់ (ធ្ងន់១នាក់ ស្រាលចំនួន៣នាក់ ភេទស្រី) ។
មន្ត្រីនគរបាល បានឲ្យដឹងទៀតថា អគ្គិភ័យនេះ បណ្ដាលមកពីឆ្លងចរន្តអគ្គិសនី ដោយសារសាកថ្មទូរសព្ទ។ នេះបើតាមការបំភ្លឺនៅកន្លែងកើតហេតុ ។ ទោះបីជាយ៉ាងណា ជនរងគ្រោះសមត្ថកិច្ចពុំទាន់បង្ហាញអត្តសញ្ញាណឡើយ ៕ ព័ត៌មានបឋម ៖ អគ្គិភ័យឆាប់ឆេះផ្ទះ១ខ្នង នៅបឹងសាឡាង រងរបួសនារី ២នាក់
ចែករំលែកព័តមាននេះ