ទីក្រុងម៉ូស្គូ៖ វិមានក្រឹមឡាំងមានបទអត្ថាធិប្បាយមួយពាក់ព័ន្ធនឹងការឡើងកម្ដៅរវាងអាមេរិក និងអ៊ីរ៉ង់។ អត្ថាធិប្បាយនេះកើតឡើងនៅពេលដែលមើលឃើញស្ថានភាពមិនស្រួលរវាងអាមេរិក និងអ៊ីរ៉ង់ ជាពិសេសសភាពការណ៍នេះមិនអាចមើលស្រាលបានឡើយ ស្រួលមិនស្រួលសង្គ្រាមអាចនឹងផ្ទុះឡើង។ លោកដូណាល់ត្រាំព្រមានថាបើអ៊ីរ៉ង់មិនព្រមចូលតុចរចាដើម្បីបង្កើតកិច្ចព្រមព្រៀងនុយក្លេអ៊ែរទេ លោកនឹងវាយប្រហារអ៊ីរ៉ង់ថែមទៀត។ វាយលើកនេះខ្លាំងជាងកាលពីខែមិថុនា ឆ្នាំមុនឆ្ងាយណាស់។
ហេតុនេះ រុស្ស៊ីក្នុងនាមជាសម្ព័ន្ធមិត្តដ៏ជិតស្និទ្ធរបស់អ៊ីរ៉ង់ ហើយអ៊ីរ៉ង់ជាអ្នកផ្គត់ផ្គង់ដ្រូនអត្តឃាតទៅឱ្យរុស្ស៊ីផងដែរនោះ រុស្ស៊ីយល់ថាមិនទាន់ហួសពេលទេ អាមេរិក និងអ៊ីរ៉ង់អាចរកពេលជជែកគ្នាដោយត្រជាក់ចិត្តដើម្បីដោះស្រាយបញ្ហា។ វិមានក្រឹមឡាំងឆ្លៀតព្រមានថាការប្រើប្រាស់កម្លាំងយោធាទៅលើប្រទេសអ៊ីរ៉ង់នឹងមានផលវិបាកដ៏គ្រោះថ្នាក់ ហើយនឹងបង្កភាពវឹកវរពេញតំបន់មជ្ឈិមបូព៌ា។
អ្នកនាំពាក្យវិមានក្រឹមឡាំង លោកប៉េស្កូស ធ្វើអត្ថាធិប្បាយចំពោះរឿងនេះមួយថ្ងៃបន្ទាប់ពីលោកដូណាល់ត្រាំព្រមានកាលពីម្សិលមិញថាអ៊ីរ៉ង់ត្រូវតែប្រញាប់ចូលតុចរចា។ បើមិនដូច្នេះទេ អាមេរិកនឹងវាយប្រហារ។ ក្រោយការព្រមាននេះ អ៊ីរ៉ង់ក៏ព្រមានបកទៅវិញថាខ្លួននឹងចាត់វិធានការឆ្លើយតបដោយម៉ឺងម៉ាត់បំផុត។ អ៊ីរ៉ង់ថាខ្លួនគាំទ្រការសន្ទនាគ្នា។ ប៉ុន្តែខ្លួនសូមប្រឆាំងដាច់ខាតការគំរាមវាយប្រហារ។
ហេតុនេះ លោកប៉េស្កូសសូមអំពាវនាវទៅគ្រប់ភាគីទាំងអស់ប្រើប្រាស់ការអត់ធ្មត់ និងជៀសវាងការប្រើប្រាស់កម្លាំងដើម្បីដោះស្រាយបញ្ហា។ លោកថ្លែងថាច្បាស់ណាស់ថាភាគីទាំង២នៅមានពេលវេលាវែងឆ្ងាយតទៅទៀតក្នុងការជជែកគ្នា។ យើងត្រូវតែផ្ដោតសំខាន់ទៅលើការបង្កើតយន្តការចរចាគ្នា។ ការចាត់វិធានការដោយកម្លាំងយោធាបានត្រឹមតែបង្កើតភាពវឹកវរពេញតំបន់មជ្ឈិមបូព៌ាតែប៉ុណ្ណោះ ហើយនឹងនាំទៅដល់ផលវិបាកដ៏ធ្ងន់ធ្ងរបំផុត។ ពោលគឺ វានឹងធ្វើឱ្យមានអស្ថិរភាពចំពោះប្រព័ន្ធសន្តិសុខទូទាំងតំបន់នេះ៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ