រាជធានីភ្នំពេញ ៖ បុរសជាឪពុកម្នាក់បានកាន់រូបថតតាមរកកូនប្រុសដល់សាលាសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញកាលពីវេលាម៉ោង១១ព្រឹកថ្ងៃទី២៩ ខែមករា ឆ្នាំ២០២៦ ដោយគាត់និយាយថាកូនប្រុសគាត់ជិតចូលរោងការទៅហើយ ស្រាប់តែបាត់ខ្លួនដែលគិតរហូតមកដល់ពេលនេះបាត់រយៈពេល៦ថ្ងៃមកហើយ ។…
រាជធានីភ្នំពេញ ៖ បុរសជាឪពុកម្នាក់បានកាន់រូបថតតាមរកកូនប្រុសដល់សាលាសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញកាលពីវេលាម៉ោង១១ព្រឹកថ្ងៃទី២៩ ខែមករា ឆ្នាំ២០២៦ ដោយគាត់និយាយថាកូនប្រុសគាត់ជិតចូលរោងការទៅហើយ ស្រាប់តែបាត់ខ្លួនដែលគិតរហូតមកដល់ពេលនេះបាត់រយៈពេល៦ថ្ងៃមកហើយ ។ គាត់បានសំណូមពរដល់អាជ្ញាធរនិងសមត្ថកិច្ចជួយស្វេងរកគាត់ផង បន្ទាប់មគាត់ក៏ចាកចេញទៅស្វែងរកកូនបន្តទៀត លុះដល់វេលា១រសៀលថ្ងៃដដែល ស្រាប់តែមានគេខលប្រាប់គាត់ថា បានឃើញកូនប្រុសគាត់បានច.ងកសម្លាប់ខ្លួននៅក្នុងវត្តមួយនៅឯស្រុកពញាឮ ខេត្តកណ្ដាលបាត់ទៅហើយ ។
បុរសនោះបាននិយាយថា គាត់ឈ្មោះហេង ទូច អាយុ ៥៨ឆ្នាំ មុខរបរជាងផ្ទះ ចំណែកកូនប្រុសរបស់គាត់ដែលបានបាត់ខ្លួននោះឈ្មោះយី តូ អាយុ២៩ឆ្នាំ សព្វថ្ងៃមានទីលំនៅភូមិស្រែសំរោង ឃុំស្រែសំរោង ស្រុកជុំគីរី ខេត្តកំពត ។ កូនប្រុសគាត់រូបនេះបានជួបឧប្បត្តិហេតុគ្រោះថ្នាក់រាចរណ៍២លើកមកហើយ គឺកាលពីអាយុ១២ឆ្នាំពេលកំពុងជិះកង់ ត្រូវបានម៉ូតូបុក បណ្ដាលឲ្យដួលរបួសក្បាលធ្ងន់ធ្ងរ ដែលបានធ្វើឲ្យមានសតិស្មារតីមិនសូវល្អ ។ ប៉ុន្តែបន្ទាប់ពីគាត់នាំទៅសង្គ្រោះនៅពេទ្យ ក្រោយមកក៏បានជាសះស្បើយ លុះដល់អាយុ១៦ឆ្នាំ ខណៈជិះម៉ូតូស្រាប់តែជាប់ហ្គារជ្រុលទៅបុកគំនរដើមត្នោតបណ្ដាលឲ្យគ្រោះថ្នាក់ម្ដងទៀត តែស្រាលជាងមុនទេ ព្រោះដើមត្នោតពុកផុយ ហើយក៏បានលេបថ្នាំព្យាបាលជាប់រហូតមកដែរ ។
គាត់បាននិយាយទៀតថា ដោយសារតែឃើញកូនជាសះស្បើយហើយ ទើបគាត់ស្ដីដណ្ដឹងប្រពន្ធឲ្យ ប៉ុន្តែជាង១ខែមុនជិតដល់ថ្ងៃចូលរោងការទៅហើយ ដោយបានកក់តុ រោង ចុងភៅរួចអស់ហើយ ស្រាប់តែជំងឺកូនប្រុសគាត់នេះរើឡើងវិញ ។ ពេលនោះគាត់បានពិភាក្សាជាមួយដន្លង ហើយពន្យាពេលថ្ងៃរៀបការសិន រង់ចាំពេលកូនជាពីជំងឺស្រួលបួល ចាំគិតគូរឡើងវិញ ម្ដងទៀត ដោយឡែកនៅថ្ងៃទី២៣ ខែមករា ឆ្នាំ២០២៦ គាត់និងកូនប្រុសបានទៅធ្វើរោងគោឲ្យគេនៅក្នុងភូមិ ។ លុះដល់វេលាម៉ោង១រសៀលថ្ងៃដដែលកូនប្រុសបានសុំគាត់ទៅរកទិញស្បែកជើង រួចជិះម៉ូតូម៉ាកហុងដាប៊ីតពណ៍ខៀវ១គ្រឿងពាក់ស្លាកលេខកំពត1V-8076ចេញទៅហើយក៏ស្រាប់តែបាត់ខ្លួនរហូតតែម្ដង ពុំឃើញត្រឡប់ទៅផ្ទះវិញទឹ គាត់បានរកច្រើនថ្ងៃមកហើយមិនឃើញសោះ ។
ក្រោយពីប្រាប់អាជ្ញារធរបានដឹងរួចបុរសនោះក៏បានចាកចេញពីសាលាសង្កាត់ចោមចៅទី៣ ខណ្ឌពោធិ៍សែនជ័យ ដើម្បីដើរស្វែងរកកូនប្រុសជាទីស្រលាញ់របស់គាត់ទៀត ដោយពុំដឹងថា គាត់ទៅរកដល់ទីកន្លែងណាទៀតនោះទេ ។ រហូតដល់វេលាម៉ោងជាង១រសៀលគាត់បានឲ្យកូនប្រាសារប្រុសរបស់គាត់ម្នាក់ឆាតមកប្រាប់ក្រុមអ្នកសារត័ត៌មានថា មានគេខលប្រាប់ពួកគាត់ថា បានប្រទះឃើញកូនប្រុសគាត់ច.ងក សម្លាប់ខ្លួនស្លាប់នៅក្នុងវត្តមួយកន្លែងនៅក្នុងស្រុកពញាឮ ខេត្តកណ្ដាលបាត់ទៅហើយ ។ ប៉ុន្តែគាត់ពុំទាន់ជឿជាក់ទាំងស្រុងថាជាកូនរបស់គាត់១០០%នៅឡើយទេ ដោយរង់ចាំទៅមើលជាក់ស្ដែងសិន ហើយបើជាកូនរបស់គាត់ពិត ឬមិនពិតបែបណានោះគាត់និងប្រាប់នៅពេលក្រោយទៀត ៕
ចែករំលែកព័តមាននេះ