ទីក្រុងបាងកក ៖ សមាគមពាណិជ្ជករមាសរបស់ប្រទេសថៃ បានបន្លឺសំឡេងរោទិ៍ព្រមានអំពីតម្លៃមាសដែលកំពុងកើនឡើងឥតឈប់ឈរ ដោយលើកឡើងថា ប្រសិនបើតម្លៃនៅតែបន្តឡើងលើសពី ៧០ ០០០ បាត(២ ២៤៥ដុល្លារ)ក្នុង១បាតទម្ងន់មាស…
ទីក្រុងបាងកក ៖ សមាគមពាណិជ្ជករមាសរបស់ប្រទេសថៃ បានបន្លឺសំឡេងរោទិ៍ព្រមានអំពីតម្លៃមាសដែលកំពុងកើនឡើងឥតឈប់ឈរ ដោយលើកឡើងថា ប្រសិនបើតម្លៃនៅតែបន្តឡើងលើសពី ៧០ ០០០ បាត(២ ២៤៥ដុល្លារ)ក្នុង១បាតទម្ងន់មាស (១ បាតទម្ងន់មាសស្មើនឹង ១៥,២៤៤ ក្រាម) ហាងលក់មាសរាប់សិបកន្លែងអាចនឹងបិទទ្វារនៅឆ្នាំនេះ ដោយសារ អ្នកទិញងាកចេញពីគ្រឿងអលង្ការមាស ខណៈដែលការចំណាយលើការរស់នៅមានការថយចុះ។ នេះបើតាមប្រភពពីសារព័ត៌មានថៃ The Nation និង Chiang Rai Times ចេញផ្សាយកាលពីពេលថ្មីៗនេះ។
ប្រធានសមាគមពាណិជ្ជករមាសថៃ លោក Jitti Tangsitpakdee បានថ្លែងថា ការកើនឡើងជាលំដាប់នៃតម្លៃមាសក្នុងស្រុកបានផ្លាស់ប្តូររបៀបនៃចំណាប់អារម្មណ៍មនុស្សទៅលើមាស។ អ្វីដែលធ្លាប់ជាផ្នែកមួយនៃការផ្តោតលើមាសប្រចាំថ្ងៃ និងជាប្រពៃណី ឥឡូវនេះបែរជាមានអារម្មណ៍ថា ហួសពីលទ្ធភាពសម្រាប់គ្រួសារជាច្រើន។ ការផ្លាស់ប្តូរនោះធ្វើឱ្យអ្នកលក់រាយតាំងពីយូរមកហើយប្រឈមនឹងហានិភ័យ រួមទាំងការងារដែលពួកគេកំពុងគាំទ្រ។ ដ្បិតតម្លៃខ្ពស់បំផុតមិនធ្លាប់មាននៅក្នុងប្រវត្តិសាស្ត្រ បានធ្វើឱ្យការជួញដូរមាសរបស់ប្រទេសថៃកាន់តែតានតឹង ស្របពេលដែលទីផ្សារមាសមានភាពប្រែប្រួលជាពិសេសក្នុងរយៈពេលប៉ុន្មានសប្តាហ៍ថ្មីៗនេះ។
គ្រឿងអលង្ការមាសដើរតួនាទីយ៉ាងសំខាន់ក្នុងវប្បធម៌ថៃ រាប់ចាប់ពីពិធីមង្គលការ និងពិធីបុណ្យរហូតដល់អំណោយគ្រួសារ។ ប៉ុន្តែបើក្រឡេកមកឥឡូវនេះ បណ្តាអ្នកទិញជាច្រើនកំពុងទប់ទល់នឹងការចំណាយសម្រាប់ជីវភាពប្រចាំ។ ពេលខ្លះ ការលក់គ្រឿងអលង្ការត្រូវបានរាយការណ៍បានធ្លាក់ចុះជាង ៥០% ឯណោះ បើធៀបទៅនឹងឆ្នាំមុនៗ។
ហាងលក់មាសបែបប្រពៃណី ដែលជារឿយៗដំណើរការដោយគ្រួសារនៅទីក្រុងបាងកក ឈៀងម៉ៃ និងខេត្តដទៃទៀត កំពុងមានអារម្មណ៍តានតឹងខ្លាំងជាមួយតម្លៃមាសបច្ចុប្បន្ន នៅពេលដែលអតិថិជនចាត់ទុកមាសជាការវិនិយោគចម្បង ការលក់ផ្លាស់ប្តូរទៅទិញដុំមាស និងឃ្លាតឆ្ងាយពីគ្រឿងអលង្ការដែលអាចពាក់លម្អខ្លួនប្រាណ។
ការផ្លាស់ប្តូរនោះធ្វើឱ្យអ្នកលក់គ្រឿងអលង្ការជាច្រើនកំពុងជួបការលំបាក និងការបញ្ជាទិញមានតិចជាងមុន។ ការព្រមានរបស់សមាគមពាណិជ្ជករមាសថៃ ចង្អុលបង្ហាញពីការបែងចែកកាន់តែទូលំទូលាយនៅក្នុងទីផ្សារ។ វិនិយោគិន និងពាណិជ្ជករអាចទទួលបានអត្ថប្រយោជន៍ពីតម្លៃខ្ពស់ ប៉ុន្តែពាណិជ្ជកម្មគ្រឿងអលង្ការបានធ្លាក់ចុះយ៉ាងឆាប់រហ័ស ខណៈដែលហាងមួយចំនួនបានបិទរួចទៅហើយ កាលពីឆ្នាំមុន។ ដូច្នេះបើគ្មានការងើបឡើងវិញនៃតម្រូវការ ឬតម្លៃមិនថមថយនោះទេ ឆ្នាំ ២០២៦ អាចនាំមកនូវការបិទជាច្រើនថែមទៀត។
តម្លៃមាសអន្តរជាតិនៅថ្ងៃទី២៩ ខែមករា ឆ្នាំ២០២៦ បានហក់ឡើងដល់កម្រិតខ្ពស់បំផុត ៥ ៥៩៤ ដុល្លារក្នុង១អោន ឬ ៦ ៧៣៩ ដុល្លារក្នុង១តម្លឹង មុនរក្សាតម្លៃមត្រឹម ៥ ៥៤៧ ដុល្លារ/អោន ឬ ៦ ៦៨៣ ដុល្លារ/តម្លឹង គិតត្រឹមម៉ោង ៣ នាទីរសៀលថ្ងៃដដែល (ម៉ោងនៅកម្ពុជា)៕
ចែករំលែកព័តមាននេះ