ចិនប្រហារជីវិ.តសមាជិក១១នាក់នៃគ្រួសារត្រកូល «មីង» ជាក្រុមម៉ាហ្វៀបោកប្រា.ស់នៅមីយ៉ាន់ម៉ា
ប្រទេសចិន ៖ ប្រទេសចិន នៅថ្ងៃទី២៩ ខែមករា ឆ្នាំ២០២៦ បានប្រហារជីវិតសមាជិកគ្រួសារត្រកូល «មីង» (Ming) ចំនួន…
ប្រទេសចិន ៖ ប្រទេសចិន នៅថ្ងៃទី២៩ ខែមករា ឆ្នាំ២០២៦ បានប្រហារជីវិតសមាជិកគ្រួសារត្រកូល «មីង» (Ming) ចំនួន ១១ នាក់ ដែលជាក្រុមម៉ាហ្វៀដ៏ល្បីមួយដំណើរការមជ្ឈមណ្ឌលបោកប្រាស់ (Scam Centers) នៅក្នុងប្រទេសមីយ៉ាន់ម៉ា តាមបណ្តោយព្រំដែនភាគឦសានប្រទេសចិន។ នេះបើយោងតាមប្រភពពីទីភ្នាក់ងារសារព័ត៌មានរដ្ឋចិន ស៊ីនហួរ (Xinhua) និងសារព័ត៌មានចក្រភពអង់គ្លេស BBC បានចេញផ្សាយ។
អ្នកទាំង ១១ នាក់ ត្រូវបានកាត់ទោសប្រហារជីវិតជាលើកដំបូងក្នុងខែកញ្ញា ឆ្នាំ២០២៥ ដោយតុលាការក្នុងទីក្រុងវិនចូវ (Wenzhou) ខេត្តហ្សឺជាំង (Zhejiang) ភាគខាងកើតប្រទេសចិន ពីបទឧក្រិដ្ឋរួមមាន ឃាតកម្មដោយចេតនា បង្ករបួសដោយចេតនា ការឃុំខ្លួនខុសច្បាប់ ការបោកប្រាស់ និងប្រតិបត្តិការកាស៊ីណូ។
ពួកគេបានប្តឹងឧទ្ធរណ៍ប្រឆាំងសាលក្រមនេះ ប៉ុន្តែត្រូវបានបដិសេធនៅក្នុងខែវិច្ឆិកា ឆ្នាំ២០២៥ ដោយតុលាការប្រជាជនជាន់ខ្ពស់ខេត្តហ្សេជាំង ដែលបានគាំទ្រសាលក្រមដើម និងបានដាក់សំណុំរឿងនេះទៅតុលាការប្រជាជនកំពូលនៃសាធារណរដ្ឋប្រជាមានិតចិន (SPC) ដើម្បីពិនិត្យឡើងវិញតាមតម្រូវការច្បាប់។ ជាលទ្ធផលក្រោយមក តុលាការប្រជាជនកំពូលបានអនុម័តការកាត់ទោសប្រហារជីវិតពួកគេតែម្តង។
នៅពេលពិនិត្យឡើងវិញ តុលាការកំពូលបានបញ្ជាក់ថា ចាប់តាំងពីឆ្នាំ២០១៥ ឧក្រិដ្ឋជនទាំងនេះបានបង្កើតមូលដ្ឋានប្រតិបត្តិការច្រើនក្នុងប្រទេសមីយ៉ាន់ម៉ា ដើម្បីចូលរួមក្នុងការបោកប្រាស់ ដំណើរការកាស៊ីណូខុសច្បាប់ និងប្រព្រឹត្តបទឧក្រិដ្ឋផ្សេងៗទៀត។
តុលាការកំពូលបានឱ្យដឹងថា មូលនិធិដែលពាក់ព័ន្ធនឹងការបោកប្រាស់ និងល្បែងស៊ីសងមានចំនួនលើសពី ១០ ពាន់លានយ័ន ប្រហែល ១,៤ ពាន់លានដុល្លារអាមេរិក។ ក្រុមនេះក៏បានសម្លាប់ វាយប្រហារ និងឃុំខ្លួនខុសច្បាប់ដោយចេតនា ចំពោះមនុស្សពាក់ព័ន្ធនឹងការបោកប្រាស់របស់ខ្លួន ដែលបណ្តាលឱ្យមានការស្លាប់ពលរដ្ឋចិន ១៤ នាក់ និងបង្កឱ្យអ្នកដទៃទៀតរងរបួស។ ការប្រហារជីវិតត្រូវបានអនុវត្តដោយតុលាការទីក្រុងវិនចូវ បន្ទាប់ពីទទួលបានការយល់ព្រមពីតុលាការប្រជាជនកំពូលនៃសាធារណរដ្ឋប្រជាមានិតចិន។
បើតាមប្រភពពី BBC ក៏បានឱ្យដឹងដែរថា គ្រួសារ «មីង» គឺជាគ្រួសារមួយក្នុងចំណោមគ្រួសារជាច្រើន ដែលបានគ្រប់គ្រងទីក្រុងឡៅកាំង (Laukkaing) រដ្ឋស្ហាន (Shan) ប្រទេសមីយ៉ាន់ម៉ា ដោយបានផ្លាស់ប្តូរទីក្រុងក្រីក្រនេះទៅជាមជ្ឈមណ្ឌលកាស៊ីណូ និងតំបន់ភ្លើងក្រហម ឬតំបន់កម្សាន្តរាត្រីដ៏ទាក់ទាញ។ ទោះយ៉ាងណាក៏ដោយ អាណាចក្របោកប្រាស់របស់ពួកគេបានដួលរលំនៅឆ្នាំ ២០២៣ នៅពេលដែលពួកគេត្រូវបានឃុំខ្លួន និងប្រគល់ឱ្យប្រទេសចិនដោយកងជីវពលជនជាតិភាគតិច ដែលបានគ្រប់គ្រងទីក្រុងឡៅកាំង អំឡុងពេលជម្លោះរបស់ពួកគេជាមួយកងទ័ពមីយ៉ាន់ម៉ា៕
ចែករំលែកព័តមាននេះ