ប្រទេសនីហ្សេ ៖ ស្នូរកាំភ្លើង និងស្នូរផ្ទុះបានលាន់ឮ កាលពីយប់ថ្ងៃទី២៨ មក២៩ មករា ក្នុងតំបន់ព្រលានយន្តហោះអន្តរជាតិ ក្រុងនីញ៉ាម៉េរដ្ឋធានីនីហ្សេ មុនពេលវិលមកស្ងប់ស្ងាត់វិញ…
ប្រទេសនីហ្សេ ៖ ស្នូរកាំភ្លើង និងស្នូរផ្ទុះបានលាន់ឮ កាលពីយប់ថ្ងៃទី២៨ មក២៩ មករា ក្នុងតំបន់ព្រលានយន្តហោះអន្តរជាតិ ក្រុងនីញ៉ាម៉េរដ្ឋធានីនីហ្សេ មុនពេលវិលមកស្ងប់ស្ងាត់វិញ ។
នីហ្សេជាប្រទេសតែងកើតមានអំពើហិង្សារបស់ពួកជីហាដ ពេលនេះ ដឹកនាំដោយឧត្ដមសេនីយអាប់ឌូរ៉ាម៉ានទីយ៉ានី ប្រមុខយោធាដែលផ្ដួលរំលំប្រធានាធិបតីស៊ីវិល លោកម៉ូហាមេដ បាហ្សួអ៊ុម កាលពីថ្ងៃទី២២ កក្កដា ឆ្នាំ២០២៣ ក្នុងរដ្ឋប្រហារយោធាមួយ ។ ការបាញ់ប្រហារចាប់ផ្ដើមលាន់ឮ ក្រោយពាក់កណ្ដាលយប់បន្តិច ហើយ២ម៉ោងក្រោយមកក៏ស្ងប់ស្ហាត់ទៅវិញ ។
ស្ថិតនៅចម្ងាយប្រមាណជា១០គីឡូម៉ែត្រពីវិមានប្រធានាធិបតីនីហ្សេ ព្រលានយន្តហោះអន្តរជាតិ DIORI HAMANI ក្រុងនីញ៉ាម៉េ មានមូលដ្ឋានកងទ័ពជើងអាកាសនីហ្សេមួយ មូលដ្ឋានដ្រូនដែលទើបកសាង ព្រមទាំងទីបញ្ជាការដ្ឋានកងកម្លាំងឯកភាព បង្កើតឡើងដោយនីហ្សេ ប៊ួគីណាហ្វាសូ និងម៉ាលី ដើម្បីប្រយុទ្ធប្រឆាំងបណ្ដាក្រុមជីហាដដែលរាតត្បាតប្រទេសទាំង៣។
មូលហេតុនៃការបាញ់ប្រហារនោះ នៅមិនទាន់ដឹងនៅឡើយ តែបណ្ដារូបភាពដែលថតបានដោយប្រជាជនតំបន់ព្រលានយន្តហោះបង្ហាញភ្លើងែគ្រាប់ដែលបាញ់ឡើងលើ ជាសញ្ញាដែលកងការពារអាកាសបាញ់សំដៅប្រឆាំងដ្រូន ។ រូបភាពដទៃៗទៀតបង្ហាញអណ្ដាតភ្លើងជះឡើងលើកម្ពស់ច្រើនម៉ែត្រនិងបណ្ដារថយន្ត ដែលត្រូវបំផ្លាញដោយភ្លើង។ ពុំទាន់មានតុល្យការច្បាស់លាស់នៅឡើយ ។
នៅព្រលានយន្តហោះនោះមានស្តុកទំនិញជាអ៊ុយរ៉ានីញ៉ូម ដែលប្រទេសនីហ្សេជាអ្នកផលិតរង់ចាំការដឹកចេញ ។ ប្រទេសនីហ្សេ ម៉ាលីនិងប៊ួគីណាហ្វាសូដែលដឹកនាំដោយរបបយោធាដូចគ្នាបានរួមគ្នាបង្កើតសម្ព័នភាពមួយហៅសម្ព័ន្ធភាពរដ្ឋតំបន់សាហែលSHAHEL ដោយបានបង្កើតកងកម្លាំងរួមមួយមានទាហាន៥០០០នាក់ ដើម្បីតស៊ូប្រឆាំងពួកជីហាដដែលទាក់ទិនក្រុមអាល់កៃដានិងក្រុមរដ្ឋអ៊ិស្លាម៕
ចែករំលែកព័តមាននេះ