រាជធានីភ្នំពេញ ៖ លោក ប៉ាង លីដា អភិបាលរងខណ្ឌពោធិ៍សែនជ័យ ដែលកំពុងល្បីរឿងរៀបចំសណ្ដាប់តាមផ្លូវសាធារណៈ និងការស្ដារប្រឡាយរំដោះទឹកនៅក្នុងភូមិសាស្ត្រខណ្ឌរបស់ខ្លួននោះ ត្រូវបានគេមើលឃើញថា កំពុងតែមានទំនាស់យ៉ាងខ្លាំងក្លាជាមួយលោក…
រាជធានីភ្នំពេញ ៖ លោក ប៉ាង លីដា អភិបាលរងខណ្ឌពោធិ៍សែនជ័យ ដែលកំពុងល្បីរឿងរៀបចំសណ្ដាប់តាមផ្លូវសាធារណៈ និងការស្ដារប្រឡាយរំដោះទឹកនៅក្នុងភូមិសាស្ត្រខណ្ឌរបស់ខ្លួននោះ ត្រូវបានគេមើលឃើញថា កំពុងតែមានទំនាស់យ៉ាងខ្លាំងក្លាជាមួយលោក កង វង ចៅសង្កាត់ចោមចៅទី ១ ។ រហូតមិនអាចដោះស្រាយគ្នានៅសាលាខណ្ឌបាន ហើយលោកអភិបាលខណ្ឌសម្រេចឲ្យអ្នកទាំង២ ទៅដោះស្រាយគ្នានៅឯសាលារាជធានីភ្នំពេញវិញ ។
ទំនាស់ចុងក្រោយរវាងអ្នកទាំង ២ នេះផ្ដើមចេញពីរឿងម្ចាស់ដីមួយកន្លែងចាក់ដីលុបប្រឡាយមេ ១ខ្សែ (ប្រឡាយមេទួលពង្រ) ហើយពេលលោក ប៉ាង លីដា សួរនាំបែរជាលោកចៅសង្កាត់រូបនោះឆ្លើយថាអត់ដឹង ទើបលោក ប៉ាង លីដា បានស្ដីបន្ទោសនៅនិងមុខគេមុខឯងមួយរយៗឡើងស្ពឹកមុខ ជាហេតុធ្វើឲ្យលោក កង វង ផ្ទុះកំហឹងខ្លាំងតបតវិញដែរ ។
យោងតាមវីដេអូឃ្លីបដែលសារព័ត៌មានក្នុងស្រុកមួយបានចុះផ្សាយ កាលពីថ្ងៃទី ២៨ ខែមករា ឆ្នាំ២០២៦ លោក ប៉ាង លីដា បានដឹកនាំក្រុមការងារដាក់គ្រឿងចក្រចុះកាយស្ដារប្រឡាយមេទួលពង្រ លុះពេលកាយទៅដល់ត្រង់ចំណុចដីមួយកន្លែង ស្ថិតនៅក្នុងភូមិត្រពាំងរំចេក សង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ ។ ស្រាប់តែឃើញមានម្ចាស់ដីមួយកន្លែងពុំដឹងថា មានខ្នងបង្អែកធំប៉ុនណាទេ បានចាក់ដីលុបប្រឡាយទាំងស្រុងដើម្បីសាងសង់សំណង់ផ្សេងៗលើដីរបស់ខ្លួន ។
ខណៈនោះបានធ្វើឲ្យលោក ប៉ាង លីដា ខឹងឆេវតែម្ដងហើយលោកបានលើកឡើងថា ពេលឃើញគេចាក់ដីលុបប្រឡាយបែបនេះលោកស្ទើរស្លុតទៅហើយ ធ្វើបែបនេះនាំដល់ការស្ទះទឹកលិចភូមិឋានប្រជាពលរដ្ឋរបស់លោក លោកអត់សុខចិត្តទេត្រូវតែកាយចេញវិញ ។ បន្ទាប់មកលោកអភិបាលរងខណ្ឌរូបនេះបានហៅលោកចៅសង្កាត់ចោមចៅទី ១ កង វង ទៅសួរនាំពីមូលហេតុដែលបណ្ដែតបណ្ដោយឲ្យគេចាក់ដីលុបប្រឡាយដោយគ្មានការទប់ស្កាត់ឬរាយការប្រាប់ឲ្យលោកបានដឹង ។ ពេលនោះលោកចៅសង្កាត់ចោមចៅទី ១ កង វង បានត្រឹមតែឆ្លើយថា គាត់អត់បានដឹងប៉ុណ្ណោះ ទើបលោក ប៉ាង លីដា ធ្វើការស្ដីបន្ទោសខ្លាំងៗតែម្ដង មិនតែប៉ុណ្ណោះវីដេអូនៃការស្ដីបន្ទោសនោះ ក៏ត្រូវបានយកទៅបង្ហោះផ្សាយនៅក្នុងសារព័ត៌មានថែមទៀតផង ។
ក្រោយពីទទួលរងនូវការស្ដីបន្ទោសបែបនេះ ម្យ៉ាងខ្លួនធ្លាប់ត្រូវបានលោក ប៉ាង លីដា ស្ដីបន្ទោសច្រើនដង ហើយគំទុកក្នុងចិត្តជិត ៨ឆ្នាំមកហើយផងនោះ លោក កង វងក៏បានខឹងសម្បារយ៉ាងខ្លាំងតបវិញចំពោះលោក ប៉ាង លីដា ហើយអ្វីដែលលោកចៅសង្កាត់រូបនោះកាន់តែខឹងខ្លាំងថែមទៀតនោះ គឺខឹងលោកអភិបាលរងខណ្ឌរូបនេះអនុញ្ញាតឲ្យសារព័ត៌មានចុះផ្សាយនូវឃ្លឺបវីដេអូនៃការស្ដីបន្ទោសនោះជាសាធារណៈ ។ លុះប៉ុន្មានម៉ោងក្រោយមកលោកចៅសង្កាត់ខាងលើ ក៏បាននិយាយតាមប្រព័ន្ធតេលេក្រាមដោយចោទលោកអភិបាលរងខណ្ឌ ប៉ាង លីដា ថាមានគំនុំគំគួននិងមើលងាយរូបគាត់ ហើយក៏បានព្រមានខ្លាំងៗទៅកាន់លោក ប៉ាង លីដា ដូច្នេះថា «សុំឲ្យមេឯងលាងខ្ញុំឲ្យស្អាត បើមិនអ៉ីចឹងទេខ្ញុំអត់សុខចិត្តទេ អស់តំណែងចៅសង្កាត់ក៏ខ្ញុំអត់ខ្វល់ ប៉ុន្តែខ្ញុំក៏មិនឲ្យមេឯងបានសុខដែរ» ។
លោកចៅសង្កាត់ចោមចៅទី ១ កង វង បានផ្ញើសារសំឡេងប្រព័ន្ធតេឡេក្រាមទៅកាន់លោក ប៉ាង លីដា ដូច្នេះថា «មេខ្ញុំឆ្ងល់ថា មេឯងធ្វើអភិបាលរង មេឯងជះទឹកដាក់ខ្ញុំមើលងាយខ្ញុំមួយទំហឹងហើយ តាំងពីជំនាន់ ហែម ដារិទ្ធិ រហូតមកដល់មេថ្មី ស្អែកព្រឹកឡើងខ្ញុំទៅចាំមេឯងនៅបន្ទប់លោកអភិបាលខណ្ឌ ។ មេ ប៉ាង លីដា ខ្ញុំសុំសសើរមេឯងដោយចិត្តស្មោះតាំងពីដើមខ្ញុំអត់ដែលមានគំនុំគំគួនជាមួមេឯងទេ ប៉ុន្តែមេឯងមានគំនុំជាមួយខ្ញុំ អ៉ីចឹងស្អែកខ្ញុំអត់សុខចិត្តទេ រឿងផុសរូបខ្ញុំមើលងាយខ្ញុំ ពាក់ព័ន្ធនិងធ្វើលូធ្វើប្រឡាយហ្នឹង អ៉ីចឹងស្អែកខ្ញុំត្រូវរកខុសរកត្រូវ ហើយខ្ញុំក៏ត្រូវទៅជួបលោកអភិបាលរាជធានីភ្នំពេញដែរ អស់អីអស់ទៅខ្ញុំអត់ដឹងទេណា ខ្ញុំប្រាប់ឲ្យហើយ ។
តំណែងអភិបាលរង និងចៅសង្កាត់ខ្ញុំអត់ស្ដាយទេតាំងពីដើមមកខ្ញុំប្រាប់មេឯងឲ្យត្រង់ អ៉ីចឹងប៉ះពាល់ខ្ញុំ ខ្ញុំអត់ចង់ប៉ះពាល់មេឯងទេ ប៉ុន្តែបើប៉ះពាល់ហើយប៉ះពាល់ដល់ទីបញ្ចប់ ថ្ងៃស្អែក (ថ្ងៃទី ២៩ ខែមករា ឆ្នាំ ២០២៦) ខ្ញុំសុំជួបលោកអភិបាលខណ្ឌនៅក្នុងបន្ទប់ ខ្ញុំនឹងសុំជួបម៉ោង ៩ព្រឹក ហើយខ្ញុំនិងស្នើសុំជួបលោកអភិបាលខណ្ឌ កុំមកមើលងាយខ្ញុំទាបថោកណាស់ ។ ប្រឡាយណា មួយឆ្នាំៗខ្ញុំស្ដារចាយលុយអស់រាប់ពាន់ដុល្លារណាស់ រាប់ពាន់ដុល្លារ ខ្ញុំការពារណាស់ ការរំដោះទឹករំដោះប្រឡាយ តាំងពីខ្ញុំឡើងមកដល់ចៅសង្កាត់ ខ្ញុំអត់ដែលអើពើថា ត្រូវបាត់ប្រឡាយខ្ញុំកន្លែងណាទេ ប៉ុន្តែមេឯងមើលងាយខ្ញុំច្រើនណាស់ អ៉ីចឹងខ្ញុំអត់ចូលចិត្តទេ ។ អ៉ីចឹងខ្ញុំសុំឲ្យមេឯងលាងឲ្យខ្ញុំឲ្យស្អាត បើមិន អ៉ីចឹងទេខ្ញុំអត់សុខចិត្តទេ អស់តំណែងចៅសង្កាត់ក៏ខ្ញុំអត់ខ្វល់ ប៉ុន្តែខ្ញុំក៏មិនឲ្យមេឯងបានសុខដែរ ខ្ញុំប្រាប់ឲ្យហើយថ្ងៃហ្នឹងលើកទី ៤ ជាមួយខ្ញុំហើយ កាលពីមុន មេ (អភិបាលខណ្ឌ) គាត់ចេះតែសុំឲ្យខ្ញុំរម្ងាប់អារម្មណ៍ ខ្ញុំសុខចិត្តទប់ណាស់ជាមួយមេឯង ខ្ញុំប្រាប់ហើយតាំងពីដើមថា ខ្ញុំអ្នកធ្វើមិនមែនខ្ញុំអ្នកថាទេ អ៉ីចឹងស្អែកជួបគ្នាម៉ោង ៩ព្រឹកនៅសាសលាខណ្ឌ ។
ក្រៅពីការនិយាយនៅក្នុងប្រព័ន្ធតេឡេក្រាម លោក កង វង ក៏បានបើករថយន្តបណ្ដើរនិយាយឡាយអំពីរឿងនេះបណ្ដើរនៅក្នុងផេកហ្វេសប៊ុកផ្ទាល់ខ្លួនផងដែរ ដោយបានលើកឡើងថា កាលពីឆ្នាំ២០២២ ពេលដែលខ្លួនជួលគ្រឿងចក្រកាយប្រឡាយបារាំង លោកបានចាយលុយខ្លួនឯងរាប់ម៉ឺនដុល្លារក្នុងការដោះស្រាយ ។ ស្រាប់តែលោក ប៉ាង លីដា ស្ដីឲ្យលោកថាយកអេស្កាវ៉ាទ័រតូចស្ដារមិនកើតដូចពងក្ដគេ ចៅសង្កាត់ចរិកថោក ហើយពេលនោះមានរឿងម្ដង តែត្រូវបានលោកអភិបាលខណ្ឌហែម ដារិទ្ធិ និងលោកអភិបាលរាជធានីភ្នំពេញសម្របសម្រួលបញ្ចប់រឿងម្ដងរួចមកហើយ ។ ប៉ុន្តែតាំងពីដើមមកខ្ញុំមិនដែលប៉ះពាល់លើគាត់ (លោក ប៉ាង លីដា) ទេតែលោក ប៉ាង លីដា បានធ្វើទុក្ខបុកម្និញខ្ញុំរយៈពេលជិត ៨ឆ្នាំមកហើយ ដែលមានបញ្ហាជាមួយគ្នាជាច្រើន ។
បើតាមការនិយាយរៀបរាប់ខាងលើនេះគេដឹងបានថា លោកចៅសង្កាត់ចោមចៅទី ១ កង វង រូបនេះមានការអាក់អន់ស្រពន់ចិត្តជាមួយលោកអភិបាលរងខណ្ឌ ប៉ាង លីដា ដែលជាមេរបស់ខ្លួននេះជាច្រើនឆ្នាំមកហើយ ប្រសិនបើលោកចៅសង្កាត់រូបនេះមិនបានទម្លាយនូវរឿងរ៉ាវពេលនេះទេ ក៏គ្មាននរណាដឹងឡើយថា ពួកគាត់ឈ្លោះគ្នារហូតមកដែរ ។
ដោយឡែកនៅវេលាព្រឹកព្រលឹមថ្ងៃទី ២៩ ខែមករា ឆ្នាំ ២០២៦ លោក កង វង ក៏បានធ្វើដំណើរទៅកាន់សាលាខណ្ឌពោធិ៍សែនជ័យ ដើម្បីស្កាត់ជួបដោះស្រាយជាមួយលោក ប៉ាង លីដា ដូចដែលគាត់បាននិយាយមែន ដោយគាត់អះអាងថា ព្រោះតែរឿងនេះធ្វើឲ្យគាត់ដេកមិនលក់ពេញ ១យប់ហើយ ។ ប៉ុន្តែរឿងទំនាស់មួយនេះមិនត្រូវបានដោះស្រាយនៅសាលាខណ្ឌពោធិ៍សែនជ័យទៀតនោះទេ ដោយលោក សក់ កញ្ញារិទ្ធ អភិបាលខណ្ឌពោធិ៍សែនជ័យ បានប្រាប់ឲ្យអ្នកទាំង ២ ទៅដោះស្រាយគ្នានៅឯសាលារាជធានីភ្នំពេញវិញ ៕
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ