ខេត្តបន្ទាយមានជ័យ ៖ ភ្លើងប្រច័ណ្ឌ ខាងប្រុសបាញ់ខាងស្រីស្លាប់ ហើយបាញ់ខ្លួនឯងរបួសធ្ងន់ ដែលហេតុការណ៍នេះបង្កការភ្ញាក់ផ្អើលកើតឡើងនៅយប់ថ្ងៃទី២៨ ខែមករា ឆ្នាំ២០២៦ នៅចំណុចហាងដើមត្នោត ស្ថិតភូមិគោកកអំពិល…
ខេត្តបន្ទាយមានជ័យ ៖ ភ្លើងប្រច័ណ្ឌ ខាងប្រុសបាញ់ខាងស្រីស្លាប់ ហើយបាញ់ខ្លួនឯងរបួសធ្ងន់ ដែលហេតុការណ៍នេះបង្កការភ្ញាក់ផ្អើលកើតឡើងនៅយប់ថ្ងៃទី២៨ ខែមករា ឆ្នាំ២០២៦ នៅចំណុចហាងដើមត្នោត ស្ថិតភូមិគោកកអំពិល ឃុំអូរប្រសាទ ស្រុកមង្គលបូរី។
នាយប៉ុស្តិ៍នគរបាលរដ្ឋបាលឃុំអូរប្រាសាទ បានឱ្យដឹងថា ករណីឃាតកម្មបាញ់ប្រហារខាងលើ បណ្តាលឱ្យស្លាប់ស្ត្រីម្នាក់នៅនឹងកន្លែង ដែលស្ត្រីរងគ្រោះរូបនោះរស់នៅឃុំគោករមៀត ស្រុកថ្មពួក និងម្នាក់ទៀតរបួសធ្ងន់គឺជាបុរសជាជនដៃដល់ ដែលរស់នៅឃុំរហាត់ទឹក ស្រុកមង្គលបូរី។
អធិការរងស្រុកមង្គលបូរីបានបញ្ជាក់ថា មូលហេតុដែលបណ្តាលឱ្យមានករណីបាញ់ប្រហារស្លាប់និងរបួស គឺជាករណីភ្លើងប្រច័ណ្ឌ ដោយជនដៃដល់ជាសង្សារបស់ស្ត្រីរងគ្រោះបានជួបគ្នាក្នុងហាងផឹងស៊ីយីហោ(ដើមត្នោត)ស្ថិតភូមិ/ឃុំខាងលើ ហើយមានការជជែកគ្នា បន្ទាប់មកជនដៃដល់បានបាញ់ទៅលើស្ត្រីរងគ្រោះបណ្តាលស្លាប់នៅនឹងកន្លែង ហើយជនដៃដល់បាញ់ខ្លួនឯងបណ្តាលរបួសធ្ងន់ ដោយប្រើអាវុធខ្លីម៉ាក់ឡក់។
សពស្ត្រីរងគ្រោះបានយកទៅតម្កល់ទុកនៅវត្តតាហីក្រុងសិរីសោភ័ណ ព្រោះស្ត្រីរងគ្រោះជាជនភៀសសឹកដែលធ្វើការងារហាងផឹកស៊ី(ដើមត្នោត) ។ ចំណែកជនដៃដល់របួសធ្ងន់ត្រូវបានសង្គ្រោះទៅមន្ទីពេទ្យមិត្តភាពកម្ពុជា.ជប៉ុនមង្គលបូរី ដោយស្ថានភាពធ្ងន់ធ្ងរ គ្រូពេទ្យមិនអាចជួយសង្គ្រោះបានក៏បញ្ជូនទៅផ្ទះវិញ ៕
ចែករំលែកព័តមាននេះ