ទីក្រុងវ៉ាស៊ីនតោន៖ លោកត្រាំចេញសេចក្ដីព្រមានធ្ងន់ៗទៅប្រទេសអ៊ីរ៉ង់ថាត្រូវតែប្រញាប់ចរចាគ្នាដើម្បីសម្រេចឱ្យបានកិច្ចព្រមព្រៀងនុយក្លេអ៊ែរជាមួយគ្នា។ បើមិនដូច្នេះទេ អាមេរិកនឹងវាយប្រហារលើកនេះកាន់តែខ្លាំងជាងលើកមុនទៅទៀត។ លោកសង្ឃឹមថាអ៊ីរ៉ង់នឹងចូលតុចរចាជាប្រញាប់ ហើយនឹងចរចាគ្នាបង្កើតកិច្ចព្រមព្រៀងប្រកបដោយយុត្តិធម៌ និងសមធម៌។
លោកនិយាយមួយម៉ាត់ដោយខ្លីថាហាមផលិតអាវុធនុយក្លេអ៊ែរ។ លោកចង់បានកិច្ចព្រមព្រៀងដែលល្អសម្រាប់គ្រប់ភាគី។ ពេលវេលាកាន់តែខ្លី។ ដូច្នេះ ត្រូវតែនិយាយឱ្យចំសាច់ការ។ លោកត្រាំបានដកខ្លួនពីកិច្ចព្រមព្រៀងនុយក្លេអ៊ែរឆ្នាំ២០១៥ និងដាក់ទណ្ឌកម្មជាថ្មីទៅលើប្រទេសអ៊ីរ៉ង់។ លោកយល់ថាកិច្ចព្រមព្រៀងនៅពេលនោះហាក់ដូចជាចាញ់ប្រៀបអ៊ីរ៉ង់ខ្លាំងពេក។
លោកឱ្យតម្រុយថាបន្ទាប់ពីព្រមានជាលើកចុងក្រោយរួចហើយ ការវាយប្រហារដោយយោធានឹងចាប់ផ្ដើមឡើងជាមិនខាន។ លោកអះអាងថាការវាយប្រហារលើកនេះមានសភាពខ្លាំងក្លាជាងពេលមុនឆ្ងាយណាស់។ ដូច្នេះ លោកសំណូមពរទៅអ៊ីរ៉ង់សូមកុំឱ្យហេតុការណ៍នេះកើតឡើងម្ដងទៀត។ លោកក៏បានបង្ហើបឱ្យដឹងផងដែរថានាវាចម្បាំងមួយកងធំកំពុងធ្វើដំណើរសំដៅទៅប្រទេសអ៊ីរ៉ង់។
ពាក់ព័ន្ធនឹងបញ្ហានេះ រដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាកឈី ថ្លែងថាប៉ុន្មានថ្ងៃចុងក្រោយនេះ លោកមិនដែលបានទាក់ទងជាមួយប្រេសិតពិសេសរបស់លោកត្រាំគឺលោកស្ទីវវីតខូសទេ ហើយក៏មិនបានស្នើសុំការចរចាគ្នាដែរ។ គួរកត់សម្គាល់ការបង្ហោះសាររបស់លោកត្រាំដូចខាងលើនេះបន្ទាប់ពីលោកអារ៉ាកឈីប្រកាសថាអ៊ីរ៉ង់នឹងមិនព្រមចូលតុចរចាជាដាច់ខាតប្រសិនអាមេរិកព្រមានវាយប្រហារ៕ ប្រភព៖ រ៉យទ័រ, អាល់ចាស៊ីរ៉ា និងប្រភពដទៃទៀត
ចែករំលែកព័តមាននេះ