ខេត្តសៀមរាប ៖ ឯកឧត្តមបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការជាតិអូឡាំពិកកម្ពុជា(NOCC) បានសម្ដែងការអរគុណចំពោះអត្តពលិកមកពីជុំវិញពិភពលោក ដែលបានជឿជាក់មកលើកម្ពុជា គឺជាគោលដៅទេសចរណ៍ប្រកបដោយសុវត្ថិភាព…
ខេត្តសៀមរាប ៖ ឯកឧត្តមបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការជាតិអូឡាំពិកកម្ពុជា(NOCC) បានសម្ដែងការអរគុណចំពោះអត្តពលិកមកពីជុំវិញពិភពលោក ដែលបានជឿជាក់មកលើកម្ពុជា គឺជាគោលដៅទេសចរណ៍ប្រកបដោយសុវត្ថិភាព សន្តិភាព និងភាពទាក់ទាញបំផុតរបស់ពិភពលោក។
ឯកឧត្តមបណ្ឌិតមានប្រសាសន៍បែបនេះក្នុងឱកាសអញ្ជើញជាអធិបតីក្នុងពិធីប្រគល់រង្វាន់ជ័យលាភីនៃទិវារត់ប្រណាំងឆ្លងកាត់ឧបសគ្គចម្ងាយឆ្ងាយអង្គរ(Angkor Ultra Trail) លើកទី៩ នាល្ងាចថ្ងៃទី២៤ ខែមករា ឆ្នាំ២០២៦ នៅព្រះលានជល់ដំរី ដោយមានការចូលរួមពីឯកឧត្តម ហួត ហាក់ រដ្ឋមន្ដ្រីក្រសួងទេសចរណ៍, ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា និងឯកឧត្តម លី សែ អគ្គនាយកគ្រឹះស្ថានអង្គរ និងថ្នាក់ដឹកនាំក្រសួង-ស្ថាប័នពាក់ព័ន្ធជាច្រើនទៀត។
ឯកឧត្តមបណ្ឌិតថោង ខុន បានមានប្រសាសន៍បន្តថា ប្រវត្តិកីឡាទេសចរណ៍បែបផ្សងព្រេងឆ្លងកាត់ឧបសគ្គUltra Trailកើតឡើងតាំងពីឆ្នាំ២០១៦មកម៉្លេះ គឺបានចំនួន៩លើកដែលកាលពីចាប់ផ្ដើមដំបូងមានអត្តពលិកតែ២៣២ប៉ុណ្ណោះ។ ឯកឧត្តមបានសង្កត់ធ្ងន់ថា អ្វីដែលមោទនភាពបំផុតនោះ ទិវារត់ប្រណាំងចម្ងាយឆ្ងាយលើកទី៩មានអត្តពលិកកម្ពុជាចូលរួមរត់កាន់តែមានចំនួនច្រើនឡើង ជាពិសេសរត់ចម្ងាយ១០០គីឡូម៉ែត្រក្នុងចំណោមអត្តពលិកចូលរួមសរុប ១.៧៤០នាក់ មកពី៥២ប្រទេស ។
អត្តពលិកចូលរួមច្រើនជាងគេរួមមាន កម្ពុជា, បារាំង, ចក្រភពអង់គ្លេស, អាមេរិក និងវៀតណាម។ ទាំងនេះបញ្ជាក់ឲ្យឃើញថា តំបន់សៀមរាបអង្គរ ដែលជាតំបន់បេតិកភណ្ឌពិភពលោក និងជាតំបន់ទេសចរណ៍ដ៏ល្បីល្បាញ គឺជាកន្លែងមានសុខសន្តិភាពពេញលេញ ពោពេញដោយភាពទាក់ទាញ ។
យើងសង្ឃឹមថា ឆ្នាំ២០២៧ ខាងមុខ ត្រូវនឹងខួបលើកទី១០ នៃព្រឹត្តិការណ៍នេះ នឹងមានអត្តពលិកចូលរួមកាន់តែច្រើនថែមទៀត ជាមួយគម្រោងអភិវឌ្ឍធំៗជាច្រើនរបស់រាជរដ្ឋាភិបាល។
ព្រឹត្តិការណ៍នេះរៀបចំឡើងក្នុងគោលបំណងជំរុញការផ្សព្វផ្សាយសៀមរាបអង្គរជាគោលដៅទេសចរណ៍អន្តរជាតិ, អភិវឌ្ឍចលនាកីឡា, ជំរុញ និងបង្កើនការអភិវឌ្ឍសេដ្ឋកិច្ចក្រៅប្រព័ន្ធ,
លើកកម្ពស់បរិស្ថានតំបន់បេតិកភណ្ឌ, ជំរុញទាក់ទាញភ្ញៀវទេសចរ និងគាំទ្រគម្រោងមនុស្ស
ធម៌ ដែលជាព្រឹត្តិការណ៍ដ៏កម្រ និងអស្ចារ្យ ដោយអ្នកចូលរួមត្រូវរត់កាត់តាមព្រៃព្រឹក្សា តំបន់
ជនបទ ភូមិឋានប្រជាពលរដ្ឋ និងរត់ឆ្លងកាត់តាមប្រាសាទបុរាណជាច្រើននៅតំបន់ឧទ្យានអង្គរ ដែលជាសម្បត្តិបេតិកភណ្ឌវប្បធម៌រូបីដ៏អស្ចារ្យ និងល្បីល្បាញបំផុតលើពិភពលោក។
សម្រាប់វិញ្ញាសារត់ក្នុងព្រឹត្តិការណ៍ប្រចាំឆ្នាំនេះ រួមមាន ៨គីឡូម៉ែត្រ, ១៨គីឡូម៉ែត្រ, ៣២គីឡូម៉ែត្រ, ៤២គីឡូម៉ែត្រ, ៦៤គីឡូម៉ែត្រ និង១០០គីឡូម៉ែត្រ។ ចំពោះលទ្ធផលរត់ចម្ងាយ១០០គីឡូម៉ែត្រផ្នែកនារីលេខ១បានទៅលើកីឡាការិនីSHANG Xueerមកពីប្រទេសចិនលេខ២បានទៅកីឡាការិនីមកពីប្រទេសបារាំងឈ្មោះMessina Veronique។ ផ្នែកបុរសលេខ១បានទៅលើកីឡាករPLEIN Braeden មកពីកាណាដា ។ លេខ២បានទៅកីឡាករDELATTRE Gabinមកពីបារាំង ។
លេខ៣បានទៅលើកីឡាករTHOMAS Simonមកពីបែលហ្សុិក។លេខ៤បានទៅលើកីឡាករCHUM Sam Ouernមកពីកម្ពុជា និងលេខ៥បានទៅលើកីឡាករTHOMAS Yann មកពីប្រទេសបារាំង៕
ចែករំលែកព័តមាននេះ