រាជធានីភ្នំពេញ ៖ ស្ត្រីម្នាក់ ត្រូវបានកម្លាំងនាយកដ្ឋានប្រឆាំងបទល្មើសបច្ចេកវិទ្យា ស្រាវជ្រាវឃាត់ខ្លួន បន្ទាប់ពីឆបោក ក្រោមរូបភាពក្លែងបន្លំជាអ្នកបកប្រែភាសា ផ្ដល់សេវាកម្មបកប្រែផ្នែកវិជ្ជសាស្ត្រ នៅមន្ទីរពេទ្យក្រៅប្រទេស និងឆបោកឱ្យផ្ទេរប្រាក់តាមគណនីធនាគារ…
រាជធានីភ្នំពេញ ៖ ស្ត្រីម្នាក់ ត្រូវបានកម្លាំងនាយកដ្ឋានប្រឆាំងបទល្មើសបច្ចេកវិទ្យា ស្រាវជ្រាវឃាត់ខ្លួន បន្ទាប់ពីឆបោក ក្រោមរូបភាពក្លែងបន្លំជាអ្នកបកប្រែភាសា ផ្ដល់សេវាកម្មបកប្រែផ្នែកវិជ្ជសាស្ត្រ នៅមន្ទីរពេទ្យក្រៅប្រទេស និងឆបោកឱ្យផ្ទេរប្រាក់តាមគណនីធនាគារ ។
តាមនគរបាលនាយកដ្ឋាននាយកដ្ឋាន ប្រឆាំងបទល្មើសបច្ចេកវិទ្យា បានឲ្យដឹងថា យោងតាមបញ្ជាដឹកនាំរបស់លោកនាយឧត្ដមសេនីយ៍ ស ថេត អគ្គស្នងការនគរបាលជាតិ និងតាមការចង្អុលណែនាំពីឧត្ដមសេនីយ៍ឯក អគ្គស្នងការរង នគរបាលជាតិនៅពីថ្ងៃទី២៣ ខែមករា ឆ្នាំ២០២៦ នាយកដ្ឋានប្រឆាំងបទល្មើសបច្ចេកវិទ្យា បានបើកការស្រាវជ្រាវ និងបង្ក្រាបលើករណីឆបោកប្រាក់ ក្រោមរូបភាពបន្លំ ជាអ្នកបកប្រែជនរងគ្រោះ ដែលជាអ្នកជំងឺទៅព្យាបាលជំងឺនៅក្រៅប្រទេស និងឆបោកជនរងគ្រោះឱ្យផ្ទេរប្រាក់តាមគណនីធនាគារ ។
ដោយមានការសម្របសម្រួលពីព្រះរាជអាជ្ញាអមសាលាដំបូងរាជធានីភ្នំពេញ នាយកដ្ឋានបានឃាត់ខ្លួនជនសង្ស័យ ០១នាក់ ឈ្មោះ ជ.ល.ណ ភេទស្រី ជនជាតិខ្មែរ ។
តាមរយៈការស្រាវជ្រាវ សមត្ថកិច្ចកំណត់បានថា ជនសង្ស័យរូបនេះ បានយកគណនីធនាគាររបស់ខ្លួន ធ្វើសកម្មភាព ឆបោកជនរងគ្រោះ ដើម្បីទទួលផលពីអំពើទុច្ចរិតខាងលើនេះ ។
បច្ចុប្បន្ន ជនសង្ស័យខាងលើ ត្រូវបាននាយកដ្ឋានកសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ ដើម្បីបន្តនីតិវិធីតាមផ្លូវច្បាប់ ។
នាយកដ្ឋានប្រឆាំងបទល្មើសបច្ចេកវិទ្យា ក៏បានក្រើនរំលឹកដល់សារធារណជន សូមមានការប្រុងប្រយ័ត្នពេលទៅសម្រាកព្យាបាលជំងឺ និងមានតម្រូវការសេវាកម្មបកប្រែនៅមន្ទីរពេទ្យក្រៅប្រទេស មុនធ្វើការទូទាត់ប្រាក់ព្យាបាលជំងឺ សូមបញ្ជាក់ និងពិនិត្យអោយបានច្បាស់លាស់ ជៀសវាងមានជនខិលខូចក្លែងបន្លំ ឯកសារមន្ទីពេទ្យ ដើម្បីឆបោក ឲ្យផ្ទេរតាមគណនីធនាគារ មិនស្គាល់ប្រភពច្បាស់លាស់ ដែលបណ្ដាលឲ្យបាត់បង់ទ្រព្យសម្បត្តិ ជាយថាហេតុ ៕
ចែករំលែកព័តមាននេះ