រាជធានីភ្នំពេញ ៖ កម្លាំងអាវុធហត្ថរាជធានីភ្នំពេញ ឆ្មក់បង្ក្រាបកន្លែងម៉ាស្សាកោស-ជប់ សង្ស័យបង្កប់សេវាផ្លូវភេទចំនួន៦ទីតាំង ដែលនៅជាប់គ្នាជាបន្តបន្ទាប់ និងធ្វើការឃាត់ខ្លួនមនុស្សជាច្រើននាក់ នៅវេលាម៉ោង១២និង១០នាទីរំលងអធ្រាត្រឈានចូលថ្ងៃទី២២ ខែមករា ឆ្នាំ២០២៦…
រាជធានីភ្នំពេញ ៖ កម្លាំងអាវុធហត្ថរាជធានីភ្នំពេញ ឆ្មក់បង្ក្រាបកន្លែងម៉ាស្សាកោស-ជប់ សង្ស័យបង្កប់សេវាផ្លូវភេទចំនួន៦ទីតាំង ដែលនៅជាប់គ្នាជាបន្តបន្ទាប់ និងធ្វើការឃាត់ខ្លួនមនុស្សជាច្រើននាក់ នៅវេលាម៉ោង១២និង១០នាទីរំលងអធ្រាត្រឈានចូលថ្ងៃទី២២ ខែមករា ឆ្នាំ២០២៦ តាមបណ្ដោយផ្លូវលូប្រាំ ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ ។
ប្រភពព័ត៌មានបានឱ្យដឹងថា កម្លាំងអាវុធហត្ថរាជធានីភ្នំពេញ បានសហការជាមួយនឹងកម្លាំងមូលដ្ឋានដោយបានធ្វើការបង្ក្រាបទីតាំងម៉ាស្សាកោស-ជប់ នៅតាមបណ្ដោយផ្លូវលូប្រាំ ចំនួន៦ទីតាំង ព្រមទាំងធ្វើការឃាត់ខ្លួនមនុស្សប្រុសស្រីជាច្រើននាក់ រួមទាំងមេការ និងវត្ថុតាងមួយចំនួនផងដែរ ។ បន្ទាប់ពីកម្លាំងជំនាញពាក់ព័ន្ធបានធ្វើការឆែកឆេររកឃើញវត្ថុតាងមួយចំនួនហើយបានបញ្ជូនអ្នកទាំងនោះទៅកងរាជអាវុធហត្ថរាជធានីភ្នំពេញធ្វើការសួរនាំបន្ត ។ នៅចំណុចផ្ទះល្វែងដែលត្រូវបានបង្ក្រាបនេះគឺជាកន្លែងប្រកបរបរនេះយូរហើយ តែមានលក្ខណៈមិនធំដំទេ បើប្រៀបធៀបជាមួយហាងខារ៉ាអូខេ ឬភោជនីយដ្ឋានដែលមានខ្យូសបិទបាំងនោះ ។
យោងតាមប្រភពព័ត៌មានបឋមពីកម្លាំងអាវុធហត្ថបានឲ្យដឹងថា មុនពេលចុះធ្វើការឡោមព័ទ្ធទីតាំងម៉ាស្សាកោស-ជប់នេះ គឺកម្លាំងអាវុធហត្ថបានទទួលដំណឹងតាមរយៈHOTLINE ថាទីតាំងម៉ាស្សានៅម្តុំលូ៥ខាងលើ មានសេវាកម្មបម្រើផ្លូវភេទ និងជាអនីតិជនផងដែរ ។ នៅវេលាម៉ោង១២រំលងអធ្រាត្រ កម្លាំងអាវុធហត្ថក៏បានចុះធ្វើការឡោមព័ទ្ធទីតាំងម៉ាស្សាទាំង៦ទីតាំងនោះ ។
ក្រោយចុះឡោមព័ទ្ធ កម្លាំងអាវុធហត្ថបាននាំខ្លួនម្ចាស់ទីតាំងម៉ាស្សាខាងលើ រួមទាំងនារីៗដែលបម្រើការនៅក្នុងហាងនោះ ទៅកាន់ការិយាល័យអាវុធហត្ថរាជធានីភ្នំពេញ ដើម្បីធ្វើការសាកសួរនាំ និងអនុវត្តបន្តតាមនីតិវិធី ៕
ចែករំលែកព័តមាននេះ