រាជធានីភ្នំពេញ ៖ រថយន្តម៉ាក់ហ៊ីយ៉ាន់ដាយធុនធ្ងន់ ដឹកសាច់បង្កក មួយគ្រឿង បានបើកបោះពួយទៅបុកពីក្រោយរថយន្តម៉ាកហ៊ីយ៉ាន់ដាយ មួយគ្រឿងទៀត ដឹកអង្ករ កំពុងឈប់ចតនៅលើដងផ្លូវ បណ្ដាលឲ្យរថយន្តដឹកសាច់បង្កកខ្ទេចមួយកំណាត់មុខ…
រាជធានីភ្នំពេញ ៖ រថយន្តម៉ាក់ហ៊ីយ៉ាន់ដាយធុនធ្ងន់ ដឹកសាច់បង្កក មួយគ្រឿង បានបើកបោះពួយទៅបុកពីក្រោយរថយន្តម៉ាកហ៊ីយ៉ាន់ដាយ មួយគ្រឿងទៀត ដឹកអង្ករ កំពុងឈប់ចតនៅលើដងផ្លូវ បណ្ដាលឲ្យរថយន្តដឹកសាច់បង្កកខ្ទេចមួយកំណាត់មុខ បង្កឲ្យអ្នកបើកបរ និងរួមដំណើររងរបួសចំនួនបីនាក់។ ភ្លាមៗគេពុំទាន់ស្គាល់អត្តសញ្ញាណជនរងគ្រោះឡើយ ត្រូវរថយន្តបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៨ព្រឹកថ្ងៃទី២១ ខែមករា ឆ្នាំ២០២៦ នៅតាមបណ្ដោយមហាវិថីឈ្នះឈ្នះខាងលិចផ្សារបោះដុំអាស៊ាន-អន្តរជាតិ ហៅ ផ្សារដើមគរថ្មី នៅក្នុងភូមិកប់ស្រូវធំ សង្កាត់គោករការ ខណ្ឌព្រែកព្នៅ រាជធានីភ្នំពេញ ។
តាមសាក្សី បានឱ្យដឹងថា នៅមុនពេលកើតហេតុ គេឃើញរថយន្តម៉ាក់ហ៊ីយ៉ាន់ដាយពណ៌ស ដឹកសាច់បង្កក មួយគ្រឿង ពាក់ស្លាកលេខត្បូងឃ្មុំ៣A ៣៤៨៧ ធ្វើដំណើរតាមមហាវិថីឈ្នះឈ្នះ ក្នុងទិសដៅពីកើតទៅលិច។ នៅពេលធ្វើដំណើរមកដល់ចំណុចកើតហេតុ ក៏បានបុកពីក្រោយរថយន្តដឹកអង្ករ ម៉ាកហ៊ីយ៉ាន់ដាយ មួយគ្រឿង ពាក់ស្លាកលេខបន្ទាយមានជ័យ ៣A.១៨៥៩ ដែលកំពុងឈប់ចតនៅលើដងផ្លូវ ។
តាមព័ត៌មានឲ្យដឹងទៀតថា នៅក្នុងគ្រោះថ្នាក់នោះ គឺរថយន្តដឹកសាច់បង្កក បានបុករថយន្តដឹកអង្គរពេញទំហឹង ហើយបណ្ដាលឲ្យអង្គរហូរចេញមកក្រៅហើយរថយន្តដឹកសាច់ បានខ្ទេចកាប៊ីន បណ្ដាលឲ្យអ្នកបើកបរ និងព្រូរថយន្តរងរបួសធ្ងន់ស្រាលចំនួន៣នាក់ ត្រូវរថយន្តបញ្ជូនទៅសង្គ្រោះនៅមន្ទីរពេទ្យ។ បន្ទាប់ពីកើតហេតុ នគរបាលមូលដ្ឋាន ចុះទៅកន្លែងកើតហេតុ ហើយទាក់ទងទៅនគរបាលចរាចរណ៍ ចុះទៅវាស់វែង នាំយករថយន្តទាំងពីរគ្រឿង ទៅកាន់ការិយាល័យចរាចរណ៍ផ្លូវគោក ដើម្បីដោះស្រាយសងការខូចខាត ៕
ចែករំលែកព័តមាននេះ