ទីក្រុងសេអ៊ូល៖ ថ្ងៃនេះ អតីតនាយករដ្ឋមន្ត្រីកូរ៉េខាងត្បូង លោកហានដុកស៊ូ (Han Duck-soo) ត្រូវបានតុលាការផ្ដន្ទាទោសឱ្យជាប់ពន្ធនាគារ២៣ឆ្នាំពាក់ព័ន្ធនឹងសំណុំរឿងប្រកាសច្បាប់អាជ្ញាសឹក និងបះបោរ។ តាមពិត លោកហានមិនមែនជាអ្នកដៃដល់នៅក្នុងអំពើទាំងនេះទេ…
ទីក្រុងសេអ៊ូល៖ ថ្ងៃនេះ អតីតនាយករដ្ឋមន្ត្រីកូរ៉េខាងត្បូង លោកហានដុកស៊ូ (Han Duck-soo) ត្រូវបានតុលាការផ្ដន្ទាទោសឱ្យជាប់ពន្ធនាគារ២៣ឆ្នាំពាក់ព័ន្ធនឹងសំណុំរឿងប្រកាសច្បាប់អាជ្ញាសឹក និងបះបោរ។ តាមពិត លោកហានមិនមែនជាអ្នកដៃដល់នៅក្នុងអំពើទាំងនេះទេ ប៉ុន្តែលោកជាសម្ព័ន្ធមិត្តដ៏ជិតស្និទ្ធរបស់អតីតប្រធានាធិបតីកូរ៉េខាងត្បូង លោកយូនស៊ុកយូល (Yoon Suk-yeol)។ លោកយូនក៏កំពុងតតាំងក្ដីនៅក្នុងតុលាការពាក់ព័ន្ធនឹងសំណុំរឿងនេះផងដែរ។
តុលាការរកឃើញថាលោកហានជាប់ពាក់ព័ន្ធយ៉ាងជ្រៅនៅក្នុងរឿងនេះ។ លោកត្រូវបានចោទប្រកាន់ពីបទសមគំនិត និងជួយជ្រោមជ្រែងអំពើបះបោរ និងនិយាយភូតកុហកជាសាធារណៈ។ មែនទែនទៅ អំពើបះបោរមានន័យស្មើនឹងក្បត់ជាតិ ហើយមិនមែនជាទោសស្រាលនោះទេ។ ដូច្នេះ អាចចាត់ទុកថាធូរស្រាលហើយត្រឹមជាប់ពន្ធនាការរយៈពេល២៣ឆ្នាំនោះ។
លោកហានត្រូវលោកយូនស៊ុកយូលតែងតាំងជានាយករដ្ឋមន្ត្រី។ ដូច្នេះ លោកជាមនុស្សមានអំណាចទី២នៅក្នុងប្រព័ន្ធដឹកនាំរដ្ឋ។ ក្រោយពេលលោកយូនស៊ុកយូលត្រូវរដ្ឋសភាបោះឆ្នោតព្យួរតំណែងដើម្បីបើកផ្លូវឱ្យតុលាការស៊ើបអង្កេត លោកហានកាន់តំណែងជាប្រធានាធិបតីស្ដីទី។ ក្រោយមក តុលាការធម្មនុញ្ញសម្រេចដកតំណែងលោកយូនស៊ុកយូលជាស្ថាពរ។
អំពើបះបោរជាបទល្មើសឧក្រិដ្ឋធ្ងន់ធ្ងរបំផុតនៅកូរ៉េខាងត្បូងដែលអាចទទួលទោសប្រហារជីវិត។ ចំពោះលោកយូនស៊ុកយូលដែលជាមេខ្លោងធំជាងគេ ក្រុមប្រឹក្សាអ្នកច្បាប់ឯករាជ្យស្នើសុំឱ្យតុលាការផ្ដន្ទាទោសប្រហារជីវិតលោកតែម្ដង។ ករណីលោកយូនស៊ុកយូលនឹងត្រូវតុលាការសាលាដំបូងប្រចាំទីក្រុងសេអ៊ូលប្រកាសសាលក្រមនៅថ្ងៃទី១៨ ខែកុម្ភៈខាងមុខនេះ។
នៅក្នុងការប្រកាសសាលក្រមដែលផ្សាយបន្តផ្ទាល់តាមកញ្ចក់ទូរទស្សន៍នៅថ្ងៃនេះ តុលាការទីក្រុងសេអ៊ូលចាត់ទុកថាការដែលលោកយូនស៊ុកយូលប្រកាសច្បាប់អាជ្ញាសឹកកាលពីចុងឆ្នាំ២០២៤នោះជាអំពើបះបោរដោយយោងទៅលើការដាក់ពង្រាយកម្លាំងយោធា និងនគរបាលហ៊ុមព័ទ្ធបរិវេណវិមានរដ្ឋសភា និងការិយាល័យបោះឆ្នោត។ នេះជាអំពើបះបោរ ឬការធ្វើរដ្ឋប្រហាររដ្ឋាភិបាលខ្លួនឯង។ ការធ្វើរបៀបនេះធ្វើឱ្យតម្លៃរដ្ឋធម្មនុញ្ញចុះខ្សោយ ហើយអាចធ្វើឱ្យប៉ះពាល់ស្ថិរភាពជាតិ។
ចំពោះករណីលោកហានដុកស៊ូ តុលាការរកឃើញថាលោកក៏មានតួនាទីធំណាស់ដែរនៅក្នុងអំពើបះបោរនោះព្រោះលោកព្យាយាមផ្ដល់ភាពស្របច្បាប់ចំពោះការចេញក្រឹត្យឱ្យប្រកាសច្បាប់អាជ្ញាសឹក ហើយយកទៅឆ្លងគណៈរដ្ឋមន្ត្រី។ តុលាការក៏បានផ្ដន្ទាទោសលោកហានពីបទក្លែងឯកសារស្ដីពីការប្រកាសច្បាប់អាជ្ញាសឹក និងបំផ្លាញភស្តុតាងនេះចោល និងមួយករណីទៀតពីបទនិយាយភូតកុហកក្រោមសម្បថ៕
ចែករំលែកព័តមាននេះ