រថយន្តដឹកឈើមួយគ្រឿងត្រូវបានស្ទាក់ចាប់កណ្ដាលក្រុងសៀមរាប
- សៀមរាប
ខេត្តសៀមរាប ៖ លោកឧត្តមសេនីយ៍ត្រី សឿន សេន ស្នងការរងនគរបាលខេត្ត ទទួល ផែនប្រឆាំងបទល្មើសសេដ្ឋកិច្ចខេត្ត បានឲ្យដឹងថា រថយន្ត១គ្រឿង…
ខេត្តសៀមរាប ៖ លោកឧត្តមសេនីយ៍ត្រី សឿន សេន ស្នងការរងនគរបាលខេត្ត ទទួល ផែនប្រឆាំងបទល្មើសសេដ្ឋកិច្ចខេត្ត បានឲ្យដឹងថា រថយន្ត១គ្រឿង ពណ៌ស ពាក់ផ្លាកលេខ ភ្នំពេញ ២BJ-៩០៥៣ ដែលម្ចាស់កែច្នៃដឹកឈើខុសច្បាប់ បានត្រូវកម្លាំងសមត្ថចម្រុះស្ទាក់ចាប់ទាំងមធ្យោបាយនិងវត្ថុតាង នៅកណ្តាលក្រុងសៀមរាប កាលពីវេលាម៉ោងប្រមាណ១ រំលងអធ្រាត្រឈានចូលថ្ងៃអាទិត្យទី១៨ ខែមករា ឆ្នាំ ២០២៦ ក្នុងភូមិខ្នារ សង្កាត់ជ្រាវក្រុងសៀមរាប តាមផ្លូវបេតុង ខាងកើតសណ្ឋា
គារអង្គរអេរ៉ា ។
នៅពេលចាប់ឃាត់នោះ ម្ចាស់បានរត់គេចខ្លួនបាត់ នៅសល់តែរថយន្តនិងវត្ថុតាងប្រគល់ឲ្យទៅខាងសង្កាត់រដ្ឋបាលព្រៃឈើព្រះដាក់ ស្រុកបន្ទាយស្រី ដែលស្ថិតនៅខាងកើតសណ្ឋាគារ អង្គរអេរ៉ា ដើម្បីចាត់ការទៅតាមច្បាប់ស្តីពីព្រៃឈើ ។ ប៉ុន្តែចំពោះឈើដែលដឹកខុសច្បាប់នោះជាប្រភេទឈើអ្វី ទាល់តែសួរទៅខាងមន្ត្រីជំនាញទើបដឹងច្បាស់ ។
បើតាមប្រភពពីមន្ត្រីសមត្ថកិច្ច១រូបសុំមិនបញ្ចេញឈ្មោះបានថា រថយន្តកែច្នៃនេះដឹកឈើប្រណីតខុសច្បាប់ចេញពីខេត្តព្រះវិហារ ឆ្លងកាត់ ស្រុកស្វាយលើ ចូលមកលាក់ខ្លួននៅក្នុងដេប៉ូឈើមួយកន្លែង ស្ថិតនៅភូមិខ្នារ សង្កាត់ជ្រាវ ក្រុងសៀមរាប យ៉ាងស្ងៀមស្ងាត់ ជាយូរឆ្នាំមក ហើយ ខណៈសមត្ថកិច្ចកំពុងរវល់ឬធ្វើមិនដឹង និងប្រហែលមន្ត្រីខិលខូចបើកភ្លើងខៀវឲ្យហើយ ទើបរថយន្តប្រភេទធ្លាប់ដឹកភ្ញៀវនេះ ឥឡូវបែរ មករកស៊ីដឹកជញ្ជូនឈើប្រណីតខុសច្បាប់ទៅ វិញ ។ ប៉ុន្តែ ជាអកុសលអស់លក្ខណ៍ ត្រូវបានសមត្ថកិច្ចចម្រុះចាប់ឃាត់បាននាវេលាកណ្តាលអធ្រាត និងបង្កឲ្យមានការភ្ញាក់ផ្អើលពេញផ្លូវ ។
លោក ម៉ុង ប៊ុនលីម នាយខណ្ឌរដ្ឋបាលព្រៃឈេីសៀមរាប បានប្រាប់តាមតេឡេក្រាម នៅថ្ងៃទី១៩ ខែមករា ឆ្នាំ២០២៥ថា បើយោងតាមរបាយការណ៍ប្រចាំថ្ងៃទី១៩ ខែមករា ឆ្នាំ២០២៥ របស់លោក លី សូផា នាយរងផ្នែករដ្ឋបាលព្រៃឈេីបន្ទាយស្រី និងលោក វ៉េង លី មន្ត្រីខណ្ឌរដ្ឋបាលព្រៃឈីសៀមរាប គឺបានសហការជាមួយកម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្ត ចុះចាប់ឃាត់រថយន្តកែច្នៃដឹកឈើខាងលើ ។ ឈើដែលចាប់នោះ ជាឈើអារប្រភេទលេខ២ មានចំនួន១៥៥សន្លឹក ស្មើនឹង ៩,០១៩ម៉ែត្រគូប ដោយគ្មានលិខិតអនុញ្ញាតដឹកជញ្ជូនពីរដ្ឋបាលព្រៃឈេី ។
លោកបញ្ជាក់ថា វត្ថុតាងដែលចាប់បានត្រូវបានយកមកថែរក្សាជាបណ្តោះអាសន្ន នៅស្នាក់ការផ្នែករដ្ឋបាលព្រៃឈេីបន្ទាយស្រី ស្ថិតក្នុងភូមិព្រះដាក់ ឃុំព្រះដាក់ ស្រុកបន្ទាយស្រី ៕
ចែករំលែកព័តមាននេះ