រាជធានីភ្នំពេញ ៖ ការប្រកួតកីឡាសីដក់និងសីមេលោងជ្រើសរើសជើងឯកថ្នាក់ជាតិឆ្នាំ២០២៥នៅទីលានសាលដំរីស្ថិតក្នុងពហុកីឡដ្ឋានជាតិមរតកតេជោបានបិទបញ្ចប់ជាផ្លូវការក្រោយពីបានដំណើរការប្រកួតអស់រយៈពេល៣ថ្ងៃមកនេះ។ កញ្ញា សួង ចាន់តូរ៉ាទី អគ្គលេខាធិការសហព័ន្ធកីឡាសីដក់ និងសីមេលោងកម្ពុជាបានគូសបញ្ជាក់ថា ការប្រកួតនេះធ្វើឡើងពីថ្ងៃទី១៦ រហូតដល់ថ្ងៃទី១៨…
រាជធានីភ្នំពេញ ៖ ការប្រកួតកីឡាសីដក់និងសីមេលោងជ្រើសរើសជើងឯកថ្នាក់ជាតិឆ្នាំ២០២៥នៅទីលានសាលដំរីស្ថិតក្នុងពហុកីឡដ្ឋានជាតិមរតកតេជោបានបិទបញ្ចប់ជាផ្លូវការក្រោយពីបានដំណើរការប្រកួតអស់រយៈពេល៣ថ្ងៃមកនេះ។
កញ្ញា សួង ចាន់តូរ៉ាទី អគ្គលេខាធិការសហព័ន្ធកីឡាសីដក់ និងសីមេលោងកម្ពុជាបានគូសបញ្ជាក់ថា ការប្រកួតនេះធ្វើឡើងពីថ្ងៃទី១៦ រហូតដល់ថ្ងៃទី១៨ ខែមករា ឆ្នាំ២០២៦ ។
ព្រឹត្តិការណ៍នេះមានប្រតិភូ គ្រូបង្វឹក កីឡាករ កីឡាការិនីសរុបចំនួន៩៣នាក់(ស្រីចំនួន១៤នាក់) មកពីក្រសួង ស្ថាប័ន និងក្លិបចំនួន៧និងចែកចេញជា៣វិញ្ញាសាមាន ៣នាក់ទល់៣នាក់បុរស, ២នាក់ទល់២នាក់បុរស និង២នាក់ទល់២នាក់នារី។
ការប្រកួតធ្វើឡើងក្នុងគោលបំណងស្វែងរកធនធានកីឡាករ កីឡាការិនីឆ្នើមៗប្រចាំឆ្នាំ ក្នុងការត្រៀមប្រមូលផ្តុំក្នុងក្រុមជម្រើសជាតិឆ្នាំ២០២៦ សម្រាប់ត្រៀមការប្រកួតអន្តរជាតិនានា ឆ្នាំ២០២៦ ក៏ដូចជាការប្រកួតកម្រិតអាស៊ីនៅប្រទេសជប៉ុន និងប្រកួតអន្តរជាតិនៅម៉ាឡេស៊ីផងដែរ ។
ជាលទ្ធផលសម្រាប់ការប្រកួតខាងលើនេះមាន៖
-វិញ្ញាសានារី២នាក់ទល់២នាក់ ៖ ចំណាត់ថ្នាក់
លេខ១បានទៅលើក្រសួងការពារជាតិ លេខ២បានទៅមជ្ឈមណ្ឌលកងយោធពលខេមរភូមិន្ទ និងលេខ៣ បានទៅលើក្រសួងមហាផ្ទៃ។
-វិញ្ញាសាបុរស ២នាក់ទល់២នាក់ ចំណាត់
ថ្នាក់លេខ១ បានទៅលើក្រសួងមហាផ្ទៃ លេខ២
បានទៅលើមជ្ឈមណ្ឌលកងយោធពលខេមរ
ភូមិន្ទ និងលេខ៣បានទៅលើក្រសួងការពារជាតិ។
-វិញ្ញាសាបុរស៣នាក់ទល់៣នាក់ ចំណាត់ថ្នាក់លេខ១ បានទៅលើក្រសួងការពារជាតិ លេខ២ បានទៅលើមជ្ឈមណ្ឌលកងយោធពលខេមរភូមិន្ទ និងលេខ៣បានទៅលើក្រសួងមហាផ្ទៃ។
ឯកឧត្តមសុខ យ៉ានិមល ប្រធានសហព័ន្ធបានសំដែងនូវការកោតសរសើរ និងវាយតម្លៃខ្ពស់ចំពោះកិច្ចសហការរៀបចំព្រឹត្តិការណ៍ការប្រកួតកីឡាសីដក់ និងសីមេលោងជ្រើសរើសជើងឯកថ្នាក់ជាតិលើកទី៣៣ ប្រចាំឆ្នាំ២០២៥ ដោយបានបញ្ចប់ដោយរលូន និងជាស្ថាពរនៅពេលនេះ។
ឯកឧត្តមបានបន្តទៀតថា ការប្រកួតនេះបានផ្តល់ឱកាសឱ្យកីឡាករ កីឡាការិនី បានបញ្ចេញនូវទេពកោសល្យ សមត្ថភាព ក៏ដូចជាការវាស់ស្ទង់សមត្ថភាព បច្ចេកទេស ដែលកីឡាករ កីឡាការិនីម្នាក់ៗបានហ្វឹកហាត់កន្លងមក។ លទ្ធផលរបស់កីឡាករ កីឡាការិនី ដែលទទួលជ័យលាភីនាពេលនេះ ពិតជាបានមកពីការខិតខំហ្វឹកហាត់ជាប្រចាំ មានការតស៊ូព្យាយាមគោរពវិន័យបានល្អ យកចិត្តទុកដាក់និងគោរពតាមបទបញ្ជាបច្ចេកទេសនៅក្នុងការប្រកួត៕
ចែករំលែកព័តមាននេះ