រាជធានីភ្នំពេញ ៖ នៅក្នុងឆ្នាំ២០២៥កន្លងទៅនេះ ទំហំពាណិជ្ជកម្មកម្ពុជា-ម៉ាឡេស៊ី សម្រេចបានលើសពី១ពាន់លានដុល្លារអាម៉េរិក ខណៈភាគីទាំងពីរក៏បានប្តេជ្ញាថា នឹងរួមគ្នាជំរុញ និងពង្រីកពាណិជ្ជកម្ម និងការវិនិយោគទ្វេភាគីបន្ថែមទៀតផងដែរ ។…
រាជធានីភ្នំពេញ ៖ នៅក្នុងឆ្នាំ២០២៥កន្លងទៅនេះ ទំហំពាណិជ្ជកម្មកម្ពុជា-ម៉ាឡេស៊ី សម្រេចបានលើសពី១ពាន់លានដុល្លារអាម៉េរិក ខណៈភាគីទាំងពីរក៏បានប្តេជ្ញាថា នឹងរួមគ្នាជំរុញ និងពង្រីកពាណិជ្ជកម្ម និងការវិនិយោគទ្វេភាគីបន្ថែមទៀតផងដែរ ។ នេះបើយោងតាមជំនួបពិភាក្សាការងារ រវាង លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ជាមួយ លោក Shaharuddin Bin Onn ឯកអគ្គរាជទូតវិសាមញ្ញ និងពេញសមត្ថភាពនៃ ប្រទេសម៉ាឡេស៊ី ប្រចាំព្រះរាជាណាចក្រកម្ពុជា នៅទីស្តីការក្រសួងពាណិជ្ជកម្ម កាលថ្ងៃទី១៥ ខែមករា ឆ្នាំ២០២៦ ។
ក្រសួងពាណិជ្ជកម្មកម្ពុជាបានឱ្យដឹងបន្ថែមថា ក្នុងជំនួបនេះ ភាគីទាំងពីរវាយតម្លៃខ្ពស់លើកិច្ចសហប្រតិបត្តិការទ្វេភាគី ជាពិសេសក្នុងវិស័យពាណិជ្ជកម្ម ដោយក្នុងឆ្នាំ២០២៥ កន្លងទៅនេះ ទំហំពាណិជ្ជកម្មកម្ពុជា-ម៉ាឡេស៊ី សម្រេចបានលើសពី១ពាន់លានដុល្លារអាម៉េរិក។ បន្ថែមពីនេះ ភាគីទាំងពីរក៏បានពិភាក្សា និងផ្លាស់ប្តូរយោបល់គ្នាពីកាលានុវត្តភាព ដើម្បីរួមគ្នាក្នុងការជំរុញពាណិជ្ជ កម្ម និងវិនិយោគបន្ថែមទៀត ជាពិសេស ក្នុងវិស័យហាឡាលផងដែរ។
សូមរម្លឹកដែរថា ក្រៅពីប្រទេសម៉ាឡេស៊ី ក្រសួងពាណិជ្ជកម្ម ធ្លាប់បានបញ្ជាក់ថា ពាណិជ្ជកម្ម កម្ពុជាសម្រាប់ឆ្នាំ២០២៥ ក្នុងនោះរួមមាន៖ ចិន១៩,៧៣ពាន់លានដុល្លារអាមេរិក, អាស៊ាន ១៦,៣៧ពាន់លានដុល្លារអាមេរិក, សហរដ្ឋអាមេរិក១៣,១៥ពាន់លានដុល្លារអាមេរិក, សហភាពអ៊ឺរ៉ុប៥,៨៧ពាន់លានដុល្លារអាមេរិក, ជប៉ុន២,៥៣ពាន់លានដុល្លារអាមេរិក, កាណាដា១,៣៣ពាន់លានដុល្លារអាមេរិក, ចក្រភពអង់គ្លេស១,០៧ពាន់លានដុល្លារអាមេរិក, សាធារណរដ្ឋកូរ៉េ៩២៣,០៥លានដុល្លារអាមេរិក, អូស្ត្រាលី៦២៥,៨៧លានដុល្លារអាមេរិក, ឥណ្ឌា៥១០,៦៩លានដុល្លារអាមេរិក និងអេមីរ៉ាត់អារ៉ាប់រួម ៩៨,៧៦លានដុល្លារអាមេរិក៕
ចែករំលែកព័តមាននេះ