សហរដ្ឋអាមេរិក ៖ លោក អេ​ឡុ​ន ម៉ា​សក៍ (Elon Musk) កាន់តែ​ខិត​ជិត​ក្លាយជា​បុគ្គល​ដំបូង​គេ​ក្នុង​ប្រវត្តិសាស្ត្រ ដែល​មានទ្រព្យ​សម្បត្តិ​ចំនួន ៨០០ ពាន់​លាន​ដុល្លារ​អា​មេ​រិ​ក បន្ទាប់​ពី​ការ​ផ្តល់​មូលនិធិ​ចុង​ក្រោយ​សម្រាប់​ក្រុមហ៊ុន xAI របស់​លោក​។

យោង​តាម​របាយការណ៍​ពី​ទស្សនារ​ដ្តី Forbes បាន​បង្ហាញ​ថា ក្រុមហ៊ុន xAI ដែល​ជា​ការ​រួម​បញ្ចូល​គ្នា​រវាង​ក្រុមហ៊ុន​ចាប់ផ្តើម​អាជីវកម្ម​បញ្ញា​សិប្បនិម្មិត xAI និង​បណ្តាញ​សង្គម X បាន​រៃ​អង្គាសប្រាក់​បាន​ចំនួន ២០ ពាន់​លាន​ដុល្លារ​ដោយ​ជោគជ័យ​ពី​វិនិយោគិន​ឯកជន នៅ​ក្នុង​ខែ​នេះ ដែល​ធ្វើ​ឱ្យ​ក្រុមហ៊ុន​ថ្មីថ្មោង​មួយ​នេះ​មាន​តម្លៃ ២៥០ ពាន់​លាន​ដុល្លារ​។ តួលេខ​នេះ ខ្ពស់​ជាង​ការ​វាយតម្លៃ​ត្រឹម​ចំនួន ១១៣ ពាន់​លាន​ដុល្លារ នៅ​ពេល​ដែល​លោក អេ​ឡុ​ន ម៉ា​សក៍ បាន​ច្របាច់​ក្រុមហ៊ុន​ទាំង​ពីរ​បញ្ចូល​គ្នា កាលពី​ខែមីនា ឆ្នាំ​មុន​។

Forbes ប៉ាន់​ប្រមាណ​ថា កិច្ចព្រមព្រៀង​ដ៏​សំខាន់​នេះ បាន​បង្កើន​តម្លៃ​ភាគហ៊ុន ៤៩% របស់ អេ​ឡុ​ន ម៉ា​សក៍ នៅ​ក្នុង​ក្រុមហ៊ុន xAI ចំនួន ៦២ ពាន់​លាន​ដុល្លារ នាំ​ឱ្យ​កើនឡើង​ដល់ ១២២ ពាន់​លាន​ដុល្លារ​។ ហើយ​បើ​តាម​ប្រភព​ពី​ទស្សនាវដ្តី​ពាណិជ្ជកម្ម​ដ៏​ល្បី​របស់​អា​មេ​រិ​កមួយ​នេះ បានឱ្យ​ដឹង​ថា បច្ចុប្បន្ន ទ្រព្យ​សរុប​របស់​មហាសេដ្ឋី​សញ្ជាតិ​អា​មេ​រិ​ក​វ័យ​៥៤​ឆ្នាំ​រូប​នេះ ត្រូវ​បាន​ប៉ាន់​ប្រមាណ​ថា​មាន​ប្រហែល ៧៨០ ពាន់​លាន​ដុល្លារ​។

មហាសេដ្ឋី​ជា​ច្រើន​រូប​ដែល​បាន​វិនិយោគ​លើ​ក្រុមហ៊ុន xAI ក៏​បានឃើញ​ការ​កើនឡើង​គួរ​ឱ្យ​កត់សម្គាល់​នៃ​ទ្រព្យសម្បត្តិ​ផង​ដែរ រួម​ទាំង​ព្រះ​អង្គ​ម្ចាស់​អា​រ៉ា​ប៊ី​សា​អូឌីត Alwaleed Bin Talal Alsaud, លោក Jack Dorsey សហ​ស្ថាបនិក​ក្រុមហ៊ុន Twitter (​បច្ចុប្បន្ន X) និង​លោក Larry Ellison សហ​ស្ថាបនិក​ក្រុមហ៊ុន Oracle​។

ទាក់ទង​នឹង​ទ្រព្យសម្បត្តិ​របស់​លោក អេ​ឡុ​ន ម៉ា​សក៍ ក្នុង​រយៈពេល​មួយ​ឆ្នាំ​កន្លង​មកនេះ មហាសេដ្ឋី​កើត​នៅ​ទីក្រុង​ប្រេ​តូ​រី​យ៉ា (Pretoria) ប្រទេស​អាហ្វ្រិក​ខាងត្បូង​រូប​នេះ បង្កើត​កំណត់​ត្រា​ថ្មី​ៗ​មិន​ធ្លាប់​មាន​ជា​បន្តបន្ទាប់​។ តួយ៉ាង នៅ​ខែតុលា ឆ្នាំ​២០២៥ លោក​បាន​ក្លាយជា​បុគ្គល​ដំបូង​គេ​មានទ្រព្យ​សម្បត្តិ ៥០០ ពាន់​លាន​ដុល្លារ បន្ទាប់​ពី​ភាគហ៊ុន​របស់​ក្រុមហ៊ុន​ផលិត​រថយន្ត​អគ្គិសនី​ធំ​បំផុត​របស់​អា​មេ​រិ​ក Tesla កើនឡើង​ជិត​ទ្វេ​ដង​។

នៅ​ថ្ងៃ​ទី​១៥ ខែធ្នូ ឆ្នាំ​២០២៥ លោក​បាន​បំបែក​កំណត់​ត្រា​ចាស់​របស់​ខ្លួន ដោយ​ទ្រព្យសម្បត្តិ​កើនឡើង​ដល់ ៦០០ ពាន់​លាន​ដុល្លារ នៅ​ពេល​ដែល​ក្រុមហ៊ុន​អវកាស SpaceX ត្រូវ​បាន​វាយតម្លៃ​ដោយ​វិនិយោគិន​ឯកជន​ថា​មាន​តម្លៃ ៨០០ ពាន់​លាន​ដុល្លារ​។ ៤ ថ្ងៃ​ក្រោយមក​ទៀត លោក​ក៏​បំបែក​កំណត់​ត្រា​ចាស់​ទៀត ដោយ​ទ្រព្យ​បាន​លើស​ពី ៧០០ ពាន់​លាន​ដុល្លារ បន្ទាប់​ពី​តុលាការ​កំពូល​រដ្ឋ​ដេ​ឡា​វែ (Delaware) សហរដ្ឋអាមេរិក បាន​លុប​ចោល​សេចក្តីសម្រេច​តុលាការ​ជាន់​ទាប ដែល​លុប​ចោល​កញ្ចប់​ជម្រើស​ភាគហ៊ុន (Stock Options) របស់​ក្រុមហ៊ុន Tesla ចំនួន ១៣៩ ពាន់​លាន​ដុល្លារ ដោយ​មាន​ចំណែក​ផ្តល់​ជូន​ដល់​លោក អេ​ឡុ​ន ម៉ា​សក៍​៕ ប្រភព ៖ Znews