ប្រទេសវៀតណាម ៖ ក្រុមហ៊ុន Viettel កាលពីថ្ងៃទី១៦ ខែមករា ឆ្នាំ២០២៦ បានបើកការដ្ឋានសាងសង់រោងចក្រផលិតបន្ទះឈីបដំបូងគេបង្អស់របស់ប្រទេសវៀតណាម នៅ ក្នុងតំបន់ឧទ្យានបច្ចេកវិទ្យាកម្រិតខ្ពស់ហ័រឡាក់…
ប្រទេសវៀតណាម ៖ ក្រុមហ៊ុន Viettel កាលពីថ្ងៃទី១៦ ខែមករា ឆ្នាំ២០២៦ បានបើកការដ្ឋានសាងសង់រោងចក្រផលិតបន្ទះឈីបដំបូងគេបង្អស់របស់ប្រទេសវៀតណាម នៅ ក្នុងតំបន់ឧទ្យានបច្ចេកវិទ្យាកម្រិតខ្ពស់ហ័រឡាក់ (Hoa Lac Hi-Tech Park) ស្ថិតនៅក្នុងទីក្រុងហាណូយ ហើយមានគម្រោងចាប់ផ្តើមផលិតបន្ទះឈីបទំហំ ៣២ ណាណូម៉ែត្រនៅឆ្នាំក្រោយ។
លោក តាវ ឌុច ថាង (Tao Duc Thang) ប្រធាន និងជានាយកប្រតិបត្តិរបស់ក្រុមហ៊ុនទូរគមនាគមន៍ Viettel ដែលគ្រប់គ្រងដោយយោធាវៀតណាម បានថ្លែងនៅក្នុងពិធីបើកការដ្ឋានសាងសង់រោងចក្រទំហំ ២៧ ហិកតា ថា ចន្លោះឆ្នាំ ២០២៨ និង ២០៣០ ក្រុមហ៊ុនមានគម្រោងកែលម្អ និងបង្កើនប្រសិទ្ធភាពដំណើរការផលិត ក៏ដូចជាប្រសិទ្ធភាពខ្សែសង្វាក់ផលិតកម្មស្របតាមស្តង់ដារឧស្សាហកម្ម ដោយបង្កើតបានមូលដ្ឋានគ្រឹះសម្រាប់ការស្រាវជ្រាវលើបច្ចេកវិទ្យាផលិតបន្ទះឈីបកម្រិតខ្ពស់ជាងមុន។
លោកបន្តថា គម្រោងនេះ នឹងក្លាយជាព្រឹត្តិការណ៍ដ៏សំខាន់មួយនៃសមត្ថភាពផលិតបន្ទះឈីបក្នុងស្រុកដំបូងគេបង្អស់របស់ប្រទេសវៀតណាម និងសម្រាប់ការដាក់មូលដ្ឋានគ្រឹះដើម្បីធ្វើជាម្ចាស់លើបច្ចេកវិទ្យាស្នូល និងការរីកចម្រើនសេដ្ឋកិច្ចឌីជីថល។
នៅពេលដែលសាងសង់រួច និងដាក់ដំណើរការ រោងចក្រនេះត្រូវបានរំពឹងថានឹងផ្គត់ផ្គង់បន្ទះឈីបដល់ឧស្សាហកម្មសំខាន់ៗដូចជា អាកាសចរណ៍ ទូរគមនាគមន៍ អ៊ីនធឺណិត ការផលិតរថយន្ត ឧបករណ៍វេជ្ជសាស្ត្រ និងប្រតិបត្តិការស្វ័យប្រវត្តិកម្ម។ ទោះយ៉ាងណាក្រុមហ៊ុន Viettel មិនបានបង្ហាញពីទំហំនៃការវិនិយោគសម្រាប់គម្រោងនេះទេ។
នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានលើកឡើងថា គម្រោងនេះ បង្ហាញពីសមត្ថភាពរបស់វៀតណាមក្នុងការធ្វើម្ចាស់លើបច្ចេកវិទ្យាទំនើបៗបន្តិចម្តងៗ ដែលនេះជួយបំពេញតំណភ្ជាប់ដ៏សំខាន់មួយក្នុងខ្សែសង្វាក់តម្លៃនៃបន្ទះឈីប និងពង្រឹងសមត្ថភាព និងតំណែងរបស់វៀតណាមនៅក្នុងយុគសម័យឌីជីថល។
រោងចក្រនេះ ក៏ត្រូវបានរំពឹងថានឹងបម្រើជាមជ្ឈមណ្ឌលបណ្តុះបណ្តាលជាក់ស្តែង ដោយភ្ជាប់ការអប់រំជាមួយនឹងផលិតកម្មនៅក្នុងពិភពពិត។ ដ្បិតប្រទេសវៀតណាមខិតខំបណ្តុះបណ្តាលវិស្វកររចនាបន្ទះឈីបចំនួន ៥ ម៉ឺននាក់នៅឆ្នាំ ២០៣០ ក្រោមកម្មវិធីអភិវឌ្ឍន៍កម្លាំងពលកម្មបន្ទះសៀគ្វីអេឡិចត្រូនិករបស់ខ្លួន ហើយព្យាករណ៍ថានឹងកើនលើសពី ១០ ម៉ឺននាក់ នៅឆ្នាំ ២០៤០។
សូមជម្រាបថា ប្រទេសវៀតណាមបានក្លាយជាមជ្ឈមណ្ឌលសម្រាប់សេវាកម្មសាកល្បង និងវេចខ្ចប់បន្ទះឈីប ដោយទាក់ទាញក្រុមហ៊ុនខ្នាតយក្សអន្តរជាតិជាច្រើនដូចជា Intel, Samsung Electronics, Amkor Technology, Qualcomm និង Marvell Technology ខណៈពេលដែលប្រទេសចិន និងកោះតៃវ៉ាន់ នៅតែគ្របដណ្ដប់យ៉ាងខ្លាំងលើវិស័យផលិតបន្ទះឈីប រួមទាំងការផ្គុំ ការសាកល្បង និងការវេចខ្ចប់ (ATP)។
ទោះជាយ៉ាងណាក៏ដោយ ប្រទេសវៀតណាមបានឃើញការរីកចម្រើនយ៉ាងឆាប់រហ័ស ដោយប្រទេសអាស៊ីអាគ្នេយ៍មួយនេះ ត្រូវបានគេព្យាករណ៍ថានឹងបង្កើនចំណែករបស់ខ្លួននៃសមត្ថភាពការផ្គុំ ការសាកល្បង និងការវេចខ្ចប់បន្ទះឈីបសកលដល់ ៨% ទៅ ៩ % នៅឆ្នាំ ២០៣២ ដោយកើនឡើងពី ១% នៅឆ្នាំ ២០២២៕ ប្រភព ៖ VnExpress, Tuoi Tre, Dan Viet និង Viet Nam News
ចែករំលែកព័តមាននេះ