ទីក្រុងវ៉ាស៊ីនតោន៖ លោកត្រាំចាប់ផ្ដើមប្រើធម៌ក្ដៅដាក់ក្រុមប្រទេសខ្លះនៅអឺរ៉ុបដែលចេញមុខប្រឆាំងនឹងបំណងរបស់គាត់ដែលចង់គ្រប់គ្រងកោះហ្គ្រីនលែន។ លោកត្រាំព្រមានថានឹងដំឡើងពន្ធគយទៅលើប្រទេសចំនួន៨នៅអឺរ៉ុបដោយឥតកំណត់ពេលវេលារហូតទាល់តែអាមេរិកទិញបានកោះហ្គ្រីនលែន។ បើដូច្នេះមែន ទំនាស់នេះកាន់តែបែកសាយាមោនៅក្នុងចំណោមប្រទេសដែលគេចាត់ទុកថាជាសម្ព័ន្ធមិត្តនឹងគ្នា។
លោកត្រាំបានបង្ហោះសារនៅលើបណ្ដាញសង្គមទ្រូសសូសល (Truth Social) ថាចាប់ពីថ្ងៃទី១ ខែកុម្ភៈតទៅ លោកនឹងដំឡើងពន្ធ១០%បន្ថែមពីលើពន្ធដែលមានស្រាប់ទៅលើមុខទំនិញរបស់ដាណឺម៉ាក, ន័រវេ, ស៊ុយអែត, បារាំង, អាល្លឺម៉ង់, ហូឡង់, ហ្វាំងឡង់ និងចក្រភពអង់គ្លេស។ ពន្ធ១០%នេះនឹងដំឡើងដល់២៥%ចាប់ពីថ្ងៃទី១ ខែមិថុនាតទៅ ហើយនឹងបន្តកើនឡើងឥតឈប់រហូតដល់មានកិច្ចព្រមព្រៀងយល់ព្រមលក់កោះហ្គ្រីនលែនឱ្យអាមេរិក។
លោកត្រាំធ្លាប់និយាយជារឿយៗថាបើមិនបានកោះហ្គ្រីនលែនមកគ្រប់គ្រង លោកមិនសុខចិត្តទេ។ គណៈអភិបាលកោះហ្គ្រីនលែន និងរដ្ឋាភិបាលដាណឺម៉ាកហាក់ដូចជានិយាយបិទផ្លូវមិនឱ្យលោកត្រាំសម្រេចក្ដីសុបិនរបស់គាត់ទេ។ ពួកគេថាកោះហ្គ្រីនលែនមិនមែនសម្រាប់លក់ទេ ហើយប្រជាជនហ្គ្រីនលែនក៏មិនចង់ក្លាយជាទឹកដីរបស់អាមេរិកនោះដែរ។
ប្រទេសទាំងប៉ុន្មានខាងលើនេះបានប្រកាសគាំទ្រដាណឺម៉ាក និងព្រមានថាបើសិនអាមេរិកនៅតែជម្នះចិត្តចង់គ្រប់គ្រងកោះហ្គ្រីនលែនដោយកម្លាំងយោធា ពេលនោះអង្គការណាតូអាចនឹងដួលរលំ។ រដ្ឋមន្ត្រីការបរទេសដាណឺម៉ាកយល់ថាការប្រកាសរបស់លោកត្រាំជារឿងគួរឱ្យភ្ញាក់ផ្អើល។ ចំណែកនាយករដ្ឋមន្ត្រីអង់គ្លេសបានរិះគន់ការគំរាមកំហែងរបស់លោកត្រាំ។ លោកស្តាមើបង្ហោះសារនៅលើបណ្ដាញអ៊ិចថារដ្ឋាភិបាលរបស់លោកនឹងយកបញ្ហានេះទៅជជែកគ្នាដោយផ្ទាល់ជាមួយអាមេរិក។
ប្រធានគណៈកម្មការអឺរ៉ុប លោកស្រីឡឺយឹន (Leyen) និងប្រធានក្រុមប្រឹក្សាអឺរ៉ុប លោកអង់តូនីញ៉ូ កូស្តា (Antonio Costa) បង្ហោះសារដាច់ដោយឡែកពីគ្នានៅលើបណ្ដាញអ៊ិចថាអឺរ៉ុបនឹងរួបរួមសាមគ្គីយ៉ាងពេញទំហឹងជាមួយដាណឺម៉ាក និងហ្គ្រីនលែន។ លោក និងលោកស្រីយល់ថាការដំឡើងពន្ធរបស់លោកត្រាំបានត្រឹមតែធ្វើឱ្យចុះខ្សោយទំនាក់ទំនងអាមេរិក និងអឺរ៉ុបតែប៉ុណ្ណោះ។ អឺរ៉ុបនឹងបន្តរួបរួមគ្នា សម្របសម្រួល និងប្ដេជ្ញាការពារអធិបតេយ្យភាពរបស់ខ្លួនជានិច្ច៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ