លោក គីម ជុងអ៊ុន ដឹកនាំការបា.ញ់សាកល្បងមីស៊ីលផ្លោងចេញពីនាវាពិឃា.តថ្មី
ទីក្រុងព្យុងយ៉ាង ៖ មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានចុះត្រួតពិនិត្យការសាកល្បងនាវាចម្បាំងពិឃាតថ្មី១គ្រឿង…
ទីក្រុងព្យុងយ៉ាង ៖ មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានចុះត្រួតពិនិត្យការសាកល្បងនាវាចម្បាំងពិឃាតថ្មី១គ្រឿង និងការសាកល្បងបាញ់មីស៊ីលផ្លោងបញ្ជាទិសយុទ្ធសាស្ត្រចេញពីនាវាថ្មីនោះ។ នេះបើតាមប្រភពពី NHK, Reuters និង Al Jazeera ។
ប្រព័ន្ធផ្សព្វផ្សាយកូរ៉េខាងជើង នៅថ្ងៃទី៥ ខែមីនា ឆ្នាំ២០២៥ បានរាយការណ៍ ថា លោក គីម ជុងអ៊ុន បានទៅទស្សនាទីក្រុងកំពង់ផែនៅភាគខាងលិចនៃកោះណាំផូ (Nampho) កាលពីថ្ងៃទី៣ និងទី ៤ ខែមីនា កន្លងទៅ។ របាយការណ៍ទាំងនោះបានឱ្យដឹងថា លោក គីម បានត្រួតពិនិត្យនាវាពិឃាតថ្មីទម្ងន់ ៥ ពាន់តោន ក៏ដូចជាបានសង្កេតការបាញ់សាកល្បងមីស៊ីលដែលធ្វើឡើងចេញពីនាវាថ្មីនោះ។
លោក គីម ត្រូវបានរាយការណ៍ថា បានបង្ហាញផែនការមួយដើម្បីផលិតនាវាចម្បាំង ២ គ្រឿងប្រភេទដូចគ្នានឹងនាវាពិឃាត ឬថ្នាក់ខ្ពស់ជាងនេះ ជារៀងរាល់ឆ្នាំ អំឡុងពេលផែនការ ៥ ឆ្នាំម្តងថ្មី ដែលចាប់ផ្តើមនៅឆ្នាំនេះ។ លោកបានថ្លែងថា ការបំពាក់អាវុធនុយក្លេអ៊ែរដល់កងទ័ពជើងទឹកកូរ៉េខាងជើងកំពុងមានវឌ្ឍនភាពគួរឱ្យពេញចិត្ត។ ខណៈដែលនៅសមាជបក្សពលករដែលកំពុងតែកាន់អំណាចកាលពីខែកុម្ភៈកន្លងទៅ លោកក៏បានបង្ហាញពីចេតនាក្នុងការជំរុញអំណាចកងទ័ពជើងទឹករបស់ប្រទេស។
នាយសេនាធិការចម្រុះកូរ៉េខាងត្បូងបានថ្លែងថា កូរ៉េខាងជើងបានបាញ់មីស៊ីលបញ្ជាទិសជាច្រើនគ្រាប់ពីជិតកោះណាំផូ ឆ្ពោះទៅសមុទ្រលឿង ភាគខាងលិចឧបទ្វីបកូរ៉េ នៅម៉ោងប្រហែល ៨ និង ៣០ នាទីព្រឹកថ្ងៃទី៤ ខែមីនា កន្លងទៅ។ មន្ត្រីដែលរូបនោះថា ពួកគេកំពុងតាមដានសកម្មភាពកូរ៉េខាងជើងក្នុងការសម្របសម្រួលជាមួយកងកម្លាំងអាមេរិក។
អ្នកជំនាញកូរ៉េខាងត្បូងក៏បានលើកឡើងថា មីស៊ីលនេះអាចមានសមត្ថភាពផ្ទុកក្បាលគ្រាប់នុយក្លេអ៊ែរ។ ចំណែកបណ្តាអ្នកវិភាគខ្លះថា សកម្មភាពនេះ ហាក់ដូចជាមានបំណងបង្ហាញពីការព្រមានប្រឆាំងនឹងការវាយប្រហារជាមុនរបស់សហរដ្ឋអាមេរិក បន្ទាប់ពីបានឃើញប្រតិបត្តិការយោធារបស់សហរដ្ឋអាមេរិក និងប្រទេសអ៊ីស្រាអែលប្រឆាំងនឹងប្រទេសអ៊ីរ៉ង់៕
ចែករំលែកព័តមាននេះ