ខេត្តបាត់ដំបង ៖ លំនៅឋានរបស់ប្រជាកសិករយ៉ាងតិចជាង១០ខ្នង ត្រូវខ្យល់កន្ត្រាក់នារដូវប្រាំង វាយប្រហារក្នុងរយៈមួយដង្ហើមចង្រិត ដែលមួយចំនួនរាបដល់ដី កាលពីវេលាម៉ោង៦ និង៤០នាទីយប់ថ្ងៃទី០៤ មីនា នៅក្នុងទឹកដីឃុំបួរ…
ខេត្តបាត់ដំបង ៖ លំនៅឋានរបស់ប្រជាកសិករយ៉ាងតិចជាង១០ខ្នង ត្រូវខ្យល់កន្ត្រាក់នារដូវប្រាំង វាយប្រហារក្នុងរយៈមួយដង្ហើមចង្រិត ដែលមួយចំនួនរាបដល់ដី កាលពីវេលាម៉ោង៦ និង៤០នាទីយប់ថ្ងៃទី០៤ មីនា នៅក្នុងទឹកដីឃុំបួរ ស្រុកភ្នំំព្រឹក តែពុំបង្កឲ្យមានគ្រោះថ្នាក់ដល់មនុស្សទេ ។
យោងតាមរបាយការណ៍មន្ត្រីមូលដ្ឋានបានឲ្យដឹងថា គិតមកទល់នឹងម៉ោង៩ព្រឹកថ្ងៃទី០៥ មីនា សមត្ថកិច្ច និងអាជ្ញាធរមូលដ្ឋានបានស្រាវជ្រាវរកឃើញមានលំនៅឋានរបស់ប្រជាពលរដ្ឋនៅក្នុងឃុំបួរសរុបចំនួន១៤ខ្នង ក្នុងនោះ មានចំនួន០៣ខ្នងខូចខាតទាំងស្រុង ក្រៅពីនេះខូចខាតបង្គូរ និងមធ្យម ។
អធិការស្រុកភ្នំព្រឹក លោក សំ វីរៈ បានបញ្ជាក់ប្រាប់ពីបាតុភូតគ្រោះថ្នាក់ធម្មជាតិនេះតាមទូរស័ព្ទថា ភ្លៀងបានធ្លាក់មួយមេលាយឡំដោយខ្យល់កន្ត្រាក់មួយប្រាវផង ប៉ះទង្គិចទៅលើភូមិសាស្ត្រឃុំបួរ ធ្វើឲ្យផ្ទះប្រជាពលរដ្ឋមួយចំនួនរងការខូចខាត តែពុំមានគ្រោះថ្នាក់ដល់មនុស្សទេ ។
នេះជាលើកដំបូងហើយ ដែលទឹកដីខេត្តបាត់ដំបង ទទួលរងនូវបាតុភូតគ្រោះធម្មជាតិ«ខ្យល់កន្ត្រាក់» អមជាមួយនឹងភ្លៀងកក់ខែនារដូវប្រាំង ។
មន្ទីរធនធានទឹក និងឧតុនិយមខេត្តបាត់ដំបង បានជូនដំណឹងស្ដីពីស្ថានភាពធាតុអាកាសសម្រាប់ខេត្តបាត់ដំបងបានឲ្យដឹងហថា ចាប់ពីថ្ងៃទី០៤ ដល់ថ្ងៃទី០៦ មីនា ស្ថានភាពធាតុអាកាស ខេត្តបាត់ដំបង ទទួលឥទ្ធិពលពីទ្រនុងសម្ពាធខ្ពស់ បាននិងកំពុងមានឥទ្ធិពលលើខេត្តបាត់ដំបង ។
ក្នុងស្ថានភាពនេះ អាចមានភ្លៀង ផ្ទរ រន្ទះ តែមានកំរិតខ្សោយ ។ ដូច្នេះ សូមបងប្អូនប្រជាពលរដ្ឋត្រូវមានការប្រុងប្រយ័ត្នចំពោះបាតុភូតធម្មជាតិ ដែលអាចកើតឡើងដោយយថាហេតុនារដូវប្រាំងនេះ ៕
ចែករំលែកព័តមាននេះ