សហរដ្ឋអាមេរិក ៖ ជាលើកដំបូងចាប់តាំងពីសង្គ្រាមលោកលើកទី២មក មីស៊ីលរត់ក្រោមទឹកតូពីដូ (Torpedo) ១គ្រាប់បានបាញ់ចេញពីនាវាមុជទឹកកងទ័ពជើងទឹកអាមេរិក វាយប្រហារនាវាចម្បាំងអ៊ីរ៉ង់ IRIS Dena ១គ្រឿងឱ្យលិចទៅបាតមហាសមុទ្រឥណ្ឌា…
សហរដ្ឋអាមេរិក ៖ ជាលើកដំបូងចាប់តាំងពីសង្គ្រាមលោកលើកទី២មក មីស៊ីលរត់ក្រោមទឹកតូពីដូ (Torpedo) ១គ្រាប់បានបាញ់ចេញពីនាវាមុជទឹកកងទ័ពជើងទឹកអាមេរិក វាយប្រហារនាវាចម្បាំងអ៊ីរ៉ង់ IRIS Dena ១គ្រឿងឱ្យលិចទៅបាតមហាសមុទ្រឥណ្ឌា នៅជិតប្រទេសស្រីលង្កា។ មីស៊ីលនោះត្រូវបានកំណត់អត្តសញ្ញាណថា Mark 48 Torpedo។ ទោះយ៉ាងណាក៏ដោយ មន្ទីរបញ្ចកោណមិនទាន់បញ្ជាក់អំពីប្រភេទនាវាមុជទឹកដែលបានបំពាក់គ្រាប់តូបពីដូវាយប្រហារ កាលពីថ្ងៃទី៤ ខែមីនា ឆ្នាំ២០២៦ នៅឡើយនោះទេ។
ក្រោយហេតុការណ៍កកក្រើកផ្ទៃសមុទ្រ កងទ័ពជើងទឹកស្រីលង្កាបានរកឃើញសាកសពមនុស្ស ៨៧ នាក់ក្នុងហេតុការណ៍នោះពីដែនទឹកក្បែរទីក្រុងហ្គាល់ (Galle) នៅភាគខាងត្បូងរបស់ខ្លួន ចំណែកមន្ត្រីប៉ូលិស និងក្រសួងការពារជាតិស្រីលង្កាបានរាយការណ៍ថា មនុស្ស ៦១ នាក់ផ្សេងទៀតកំពុងបាត់ខ្លួន។
នាវាចម្បាំង IRIS Dena ដែលជានាវាចម្បាំងថ្នាក់ Moudge ត្រូវបានចាត់តាំងឱ្យទៅកាន់កងនាវាភាគខាងត្បូងនៃកងទ័ពជើងទឹកអ៊ីរ៉ង់ស្ថិតនៅក្នុងតំបន់នោះ បន្ទាប់ពីត្រូវបានរាយការណ៍ថាបានចូលរួមក្នុងសមយុទ្ធកងទ័ពជើងទឹកមួយនៅឈូងសមុទ្របេងហ្គាល់ (Bengal)។
នៅក្នុងសន្និសីទសារព័ត៌មានមួយរបស់មន្ទីរបញ្ចកោណ រដ្ឋមន្ត្រីក្រសួងសង្គ្រាមអាមេរិក លោក Pete Hegseth បានហៅការបាញ់ពន្លិចនាវអ៊ីរ៉ង់ IRIS Dena នេះថា «ការស្លាប់ដោយស្ងៀមស្ងាត់បំផុត»។
យោងតាមបញ្ជាការប្រវត្តិសាស្ត្រ និងបេតិកភណ្ឌរបស់កងទ័ពជើងទឹកអាមេរិកបង្ហាញថា នាវាមុជទឹកអាមេរិកចុងក្រោយបង្អស់ ដែលបានបាញ់មីស៊ីលរត់ក្រោមទឹកតូពីដូលើនាវាសត្រូវ គឺនាវាមុជទឹក U.S.S. Torsk ដោយបានពន្លិចនាវាចម្បាំងជប៉ុនទម្ងន់ ៧៥០ តោន នៅថ្ងៃទី១៤ ខែសីហា ឆ្នាំ១៩៤៥។
លោក Thomas Shugart អ្នកស្រាវជ្រាវជាន់ខ្ពស់នៅមជ្ឈមណ្ឌលសន្តិសុខអាមេរិកបានប្រាប់ Fox News Digital ថា Mark 48 Torpedo គឺជាអាវុធប្រឆាំងនាវាដ៏សាហាវបំផុតមួយក្នុងចំណោមអាវុធផ្សេងទៀតរបស់សហរដ្ឋអាមេរិក។ Mark 48 Torpedo នេះមានក្បាលគ្រាប់ទម្ងន់ ២៩៥ គីឡូក្រាម ហើយត្រូវបានរចនាឡើងមិនមែនដើម្បីវាយប្រហារនាវដោយផ្ទាល់នោះទេ ប៉ុន្តែដើម្បីបំផ្ទុះនៅផ្នែកខាងក្រោមនាវា ដោយបង្កើតពពុះចំហាយទឹកដ៏ធំមួយ និងបំបែកខ្នងនាវាឱ្យដាច់ជា ២ បំណែក។
យោងតាមទិន្នន័យថ្មីៗនេះបានបង្ហាញថា មីស៊ីលតូបពីដូទម្ងន់ធ្ងន់ទំនើបៗ ដូចជា Mk 48 នេះមានតម្លៃប្រហែល ៤,២ លានដុល្លារក្នុង១គ្រឿងគ្រាប់។ ដូច្នេះលោក Shugart បានហៅការវាយប្រហារនេះថា ការវាយប្រហារដោយនាវាមុជទឹកដ៏កម្រមួយក្នុងប្រវត្តិសាស្ត្រកងទ័ពជើងទឹកអាមេរិកសម័យទំនើប៕ ប្រភព ៖ New Youk Times, Fox News និង France 24
ចែករំលែកព័តមាននេះ