ដើម្បីជំរុញសក្តានុពលពាណិជ្ជកម្ម និងលើកកម្ពស់ការអភិវឌ្ឍសេដ្ឋកិច្ច កម្ពុជាបានកំពុងតែរៀបចំដំណើរការចូលរួម កិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូអន្តរប៉ាស៊ីហ្វិក (CPTPP) ។ ដំណើការរៀបចំក្លាយទៅជារដ្ឋសមាជិកនៃកិច្ចព្រមព្រៀងពាណិជ្ជកម្មមួយនេះ គឺបានកំពុងតែធ្វើដោយលោក សុក…
ដើម្បីជំរុញសក្តានុពលពាណិជ្ជកម្ម និងលើកកម្ពស់ការអភិវឌ្ឍសេដ្ឋកិច្ច កម្ពុជាបានកំពុងតែរៀបចំដំណើរការចូលរួម កិច្ចព្រមព្រៀងទូលំទូលាយ និងរីកចម្រើនសម្រាប់ភាពជាដៃគូអន្តរប៉ាស៊ីហ្វិក (CPTPP) ។
ដំណើការរៀបចំក្លាយទៅជារដ្ឋសមាជិកនៃកិច្ចព្រមព្រៀងពាណិជ្ជកម្មមួយនេះ គឺបានកំពុងតែធ្វើដោយលោក សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេសដែលត្រូវបានគេដឹងថា គឺជាអ្នកដែលផ្តួចផ្តើម និងនាំកម្ពុជាមួយរូបឲ្យចូលទៅអង្គការពាណិជ្ជកម្មពិភពលោក កាលពីឆ្នាំ២០០៤ ។
នៅក្នុងសប្តាហ៍នេះ លោកត្រូវបានគេដឹងថា បានធ្វើកិច្ចការនេះនៅក្នុងប្រទេសសិង្ហបុរី ហើយបានចូលជួបជាមួយនឹងតំណាងនិងអ្នកជំនាញសិង្ហបុរីជាច្រើនរូប ដោយរួមទាំងលោក វីរៀន បាឡាគ្រីសណាន រដ្ឋមន្ត្រីការបរទេសសិង្ហបុរី ហើយក៏បានប្រកាសគាំទ្របេក្ខភាពកម្ពុជាចូលរួមCPTPP នេះផងដែរ ។
លោក វីវៀន បាឡាគ្រីសណាន បានគូសបញ្ជាក់ថា «ខ្ញុំស្វាគមន៍ចំពោះចំណាប់អារម្មណ៍របស់ប្រទេសកម្ពុជា ក្នុងការចូលរួម CPTPP ដែលនឹងជួយពង្រឹងការធ្វើសមាហរណកម្មរបស់ខ្លួន ទៅក្នុងខ្សែសង្វាក់តម្លៃក្នុងតំបន់ ពង្រីកការចូលទីផ្សារ និងពង្រឹងទំនុកចិត្តរបស់វិនិយោគិន» ។
កិច្ចព្រមព្រៀង CPTPP ត្រូវបានចុះហត្ថលេខានៅថ្ងៃទី៨ ខែមីនា ឆ្នាំ ២០១៨ នៅទីក្រុងសាន់ទីយ៉ាហ្គោ ប្រទេសឈីលី ដោយប្រទេសអូស្ត្រាលី ប្រ៊ុយណេដារូសាឡឹម កាណាដា ឈីលី ជប៉ុន ម៉ាឡេស៊ី ម៉ិកស៊ិក នូវែលសេឡង់ ប៉េរូ សិង្ហបុរី និងវៀតណាម។ ក្រោយមក ចក្រភពអង់គ្លេសក៏បានចុះហត្ថលេខាចូលរួមជា CPTPP ក្នុងខែកក្កដា ឆ្នាំ២០២៣ផងដែរ ៕
ចែករំលែកព័តមាននេះ