ទីក្រុងតេអេរ៉ង់៖ ចលនាបាតុកម្មដ៏ពុះកញ្ជ្រោលនៅប្រទេសអ៊ីរ៉ង់ដែលគេនឹកស្មានថាបានថមថយឥទ្ធិពលទៅវិញនោះបែរជាចំនួនអ្នកស្លាប់កើនឡើងកាន់តែច្រើន។ ក្រុមសិទ្ធិមនុស្សបានប្រមូលតួលេខថាចំនួនអ្នកស្លាប់កើនឡើងដល់ជាង៣ពាន់នាក់ហើយ។ ចំណែកសេវាអ៊ីនធឺណិតដែលត្រូវបានកាត់ផ្ដាច់រយៈពេល៨ថ្ងៃមកហើយនោះបើទុកជាមានសេវាមកវិញក៏មានល្បឿនយឺតបំផុត។
ក្រុមសិទ្ធិមនុស្សដែលមានមូលដ្ឋាននៅអាមេរិកថ្លែងថាខ្លួនបានផ្ទៀងផ្ទាត់ឃើញថាចំនួនអ្នកស្លាប់មាន៣០៩០នាក់ជាចំនួនដែលបានផ្ទៀងផ្ទាត់ត្រឹមត្រូវ។ នៅក្នុងចំណោមនោះ បាតុករដែលស្លាប់មានចំនួន២៨៨៥នាក់។ ប្រជាជនអ៊ីរ៉ង់អះអាងថាចលនាបង្ក្រាបដ៏ខ្លាំងក្លាធ្វើឱ្យចលនាបាតុកម្មថមថយ។ សារព័ត៌មានរបស់រដ្ឋផ្សាយថាមនុស្សជាច្រើនត្រូវបានចាប់ខ្លួនជាបន្តបន្ទាប់។
ទិដ្ឋភាពនៅរដ្ឋធានីតេអេរ៉ង់មានសភាពស្ងប់ស្ងាត់អស់រយៈពេល៤ថ្ងៃមកហើយ។ គេឃើញដ្រូនហោះហើរឆ្វែលឆ្វាតពេញផ្ទៃអាកាសនៃទីក្រុងនេះ។ នៅថ្ងៃព្រហស្បតិ៍ និងថ្ងៃសុក្រ គេឃើញថាគ្មានចលនាបាតុកម្មធំដុំអ្វីទេ។ ប្រជាជនអ៊ីរ៉ង់ម្នាក់រស់នៅទីក្រុងតេអេរ៉ង់ភាគខាងជើងប្រាប់ថានៅតាមដងវិថីនានាពោរពេញដោយសភាពស្ងាត់ជ្រងំ។
លោកដូណាល់ត្រាំកាលពីមុននេះព្រមានថានឹងចាត់វិធានការយោធាលើអ៊ីរ៉ង់បើសិនពួកគេប្រហារជីវិតអ្នកជាប់ឃុំដោយព្យួរក។ ក្រោយមក លោកអះអាងថាថ្នាក់ដឹកនាំអ៊ីរ៉ង់សម្រេចចិត្តព្យួរទុកគម្រោងប្រហារជីវិតនោះវិញ។ លោកសូមវាយតម្លៃខ្ពស់ចំពោះការសម្រេចចិត្តនេះ។ ប្រភពខ្លះថាចំនួនអ្នកទោសដែលត្រូវប្រហារជីវិតនោះមានជាង៨រយនាក់។ លោកត្រាំបង្ហោះសារនៅលើបណ្ដាញសង្គមថាលោកអរគុណចំពោះការមិនប្រហារជីវិត។
អ៊ីរ៉ង់មិនបានប្រកាសអំពីគម្រោងប្រហារជីវិត ឬក៏ថាខ្លួនលុបចោលគម្រោងប្រហារជីវិតនោះទេ។ ប៉ុន្តែប្រភពខ្លះបង្ហើបឱ្យដឹងថាក្រុមប្រទេសនៅឈូងសមុទ្របាននិយាយបញ្ចុះបញ្ចូលលោកត្រាំកុំទាន់ប្រើធម៌ក្ដៅ។ ហេតុនេះហើយបានជាលោកផ្អិបទុកគម្រោងវាយប្រហារនោះវិញ។ និស្សិតជនជាតិឥណ្ឌា និងអ្នកធ្វើធម្មយាត្រាជនជាតិឥណ្ឌានៅអ៊ីរ៉ង់បានវិលត្រឡប់ទៅមាតុភូមិវិញហើយ។ នៅអ៊ីរ៉ង់ ពួកគេត្រូវតែបង្ខំចិត្តបង្ខាំងខ្លួនឯងនៅតែមួយកន្លែងនៅក្នុងបន្ទប់ស្នាក់នៅ ហើយមិនអាចទាក់ទងទៅក្រុមគ្រួសាររបស់ខ្លួននៅប្រទេសឥណ្ឌាទេ។
លោកម្នាក់ឈ្មោះហ្សិតស៊ីយេដា (Z Syeda) ជានិស្សិតជនជាតិឥណ្ឌារៀនឆ្នាំទីបីផ្នែកសុខាភិបាលប្រាប់ថាយើងស្ដាប់ឮការនិយាយរៀបរាប់ជាហូរហែអំពីចលនាបាតុកម្ម។ បុរសម្នាក់លោតនៅពីមុខរថយន្តដែលពួកគេកំពុងជិះដោយកាន់ភ្លើងគប់មួយផង។ បុរសនោះស្រែកជ័យឃោសទៅតាមភាសានៅក្នុងតំបន់។ នៅក្នុងកែវភ្នែករបស់គាត់បង្កប់ដោយកំហឹង និងគំនុំ។ ក្រសួងការបរទេសឥណ្ឌាថ្លែងថាជើងហោះហើរពាណិជ្ជកម្មអាចបើកដំណើរការដើម្បីដឹកមនុស្សទៅមករវាងឥណ្ឌា និងអ៊ីរ៉ង់។ ដូច្នេះឆ្លៀតពេលនេះរដ្ឋាភិបាលឥណ្ឌានឹងចាត់វិធានការការពារសុវត្ថិភាព និងសុខុមាលភាពរបស់ជនជាតិឥណ្ឌានៅប្រទេសអ៊ីរ៉ង់៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ