ខេត្តស្ទឹងត្រែង ៖ រដ្ឋបាលខេត្តស្ទឹងត្រែង សហការជាមួយគណៈកម្មាធិការជាតិទន្លេមេគង្គកម្ពុជា និងភាគីម្ចាស់ជំនួយនៃសាធារណរដ្ឋកូរ៉េ បានប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនូវ «គម្រោងសាកល្បង ស្តីពីការធ្វើឱ្យប្រសើរឡើងនូវលទ្ធភាពទទួលបានទឹកស្អាត និងការបង្កើនសន្តិសុខស្បៀង» ស្ថិតក្នុងឃុំស្តៅ…
ខេត្តស្ទឹងត្រែង ៖ រដ្ឋបាលខេត្តស្ទឹងត្រែង សហការជាមួយគណៈកម្មាធិការជាតិទន្លេមេគង្គកម្ពុជា និងភាគីម្ចាស់ជំនួយនៃសាធារណរដ្ឋកូរ៉េ បានប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនូវ «គម្រោងសាកល្បង ស្តីពីការធ្វើឱ្យប្រសើរឡើងនូវលទ្ធភាពទទួលបានទឹកស្អាត និងការបង្កើនសន្តិសុខស្បៀង» ស្ថិតក្នុងឃុំស្តៅ ស្រុកសេសាន កាលពីរសៀលថ្ងៃទី១៥ ខែមករា ឆ្នាំ២០២៦។
គម្រោងនេះ ត្រូវបានអនុវត្តក្រោមជំនួយឧបត្ថម្ភក្នុងទឹកប្រាក់សរុប៥០ម៉ឺនដុល្លារអាមេរិក ពីអង្គការ ROK-UNOSSC និង P-LINK នៃសាធារណរដ្ឋកូរ៉េ។ ក្នុងគោលបំណងសំខាន់គឺផ្ដោតលើការផ្តល់លទ្ធភាពឱ្យប្រជាពលរដ្ឋជាង៥០០គ្រួសារ ទទួលបានទឹកស្អាតប្រើប្រាស់ប្រកបដោយសុវត្ថិភាព និងបង្កើនសមត្ថភាពផលិតកម្មកសិកម្ម និងការចិញ្ចឹមសត្វ ដើម្បីធានាសន្តិសុខស្បៀង ដើម្បីលើកកម្ពស់កម្រិតជីវភាព និងសុខុមាលភាពប្រជាពលរដ្ឋនៅតាមតំបន់ដាច់ស្រយាល។
អភិបាលនៃគណៈអភិបាលខេត្តស្ទឹងត្រែង លោក សរ សុពុត្រា បានបញ្ជាក់ថា គម្រោងនេះគឺជាការអនុវត្តតាមយុទ្ធសាស្ត្របញ្ចកោណរបស់រាជរដ្ឋាភិបាល ដែលកំណត់គោលដៅឱ្យប្រជាពលរដ្ឋមានទឹកស្អាតប្រើប្រាស់គ្រប់ខ្នងផ្ទះ ។ លោកបានបន្ថែមថា សមិទ្ធផលនេះមិនត្រឹមតែជួយក្នុងវិស័យកសិកម្មប៉ុណ្ណោះទេ ប៉ុន្តែថែមទាំងបង្កើតឱ្យមានមុខរបរថ្មីៗសម្រាប់ពលរដ្ឋក្នុងមដ្ឋានទៀតផង។
ជាមួយគ្នានេះដែរ ប្រធាននាយកដ្ឋានគណៈកម្មការទន្លេមេគង្គ តំណាងភាគីកូរ៉េ លោក ឈាង ហុង បានលើកឡើងដែរថានេះជាជំហានដំបូងក្នុងចំណោម ៣ ជំហាន (ថាមពល, ទឹកស្អាត និងបច្ចេកទេសកសិកម្ម) ដើម្បីអភិវឌ្ឍជីវភាពសហគមន៍ឱ្យមានចីរភាព។ តំណាងប្រជាពលរដ្ឋ និងអាជ្ញាធរឃុំស្តៅ បានសម្តែងនូវភាពត្រេកអរយ៉ាងខ្លាំង ចំពោះគម្រោងនេះ ព្រោះវាបានជួយកាត់បន្ថយការលំបាក និងការចំណាយផ្សេងៗក្នុងការបូមទឹកយកមកប្រើប្រាស់ប្រចាំថ្ងៃ ។
គួរបញ្ជាក់ថា ឃុំស្តៅ គឺជាឃុំដំបូងគេក្នុងចំណោមឃុំទាំង ៧ នៃស្រុកសេសាន ដែលទទួលបានគម្រោងអភិវឌ្ឍន៍ប្រព័ន្ធទឹកស្អាតខ្នាតធំនេះ ដែលជាសក្ខីភាពនៃកិច្ចសហប្រតិបត្តិការអន្តរជាតិដ៏រឹងមាំរវាងកម្ពុជា និងសាធារណរដ្ឋកូរ៉េ៕
ចែករំលែកព័តមាននេះ