ទីក្រុងបាងកក៖ ចំនួនអ្នកស្លាប់ដោយសារការបាក់ដងស្ទូចទៅលើរថភ្លើងនៅប្រទេសថៃគិតត្រឹមវេលានេះបានកើនឡើងដល់៣១នាក់ និងរបួស៦៤នាក់។ ហេតុការណ៍នេះកើតឡើងកាលពីព្រឹកមិញនៅស្រុកស៊ីកឃីអូ (Sikhio) ខេត្តនគររាជសីមា។ សាក្សីនិយាយថារថភ្លើងនោះធ្វើដំណើរពីទីរួមខេត្តឧប៊ុនរាជធានីមកដល់កន្លែងកើតហេតុស្រាប់តែដងស្ទូចនោះបាក់ធ្លាក់សង្កត់ពីលើទូរថភ្លើងតែម្ដង។
ទូររថភ្លើងមួយចំនួនត្រូវដងស្ទូចសង្កត់ពីលើ និងបង្កជាភ្លើងឆេះមួយសន្ទុះ។ ស្នងការនគរបាលថៃឱ្យដឹងថារហូតមកដល់ពេលនេះក្រុមអ្នកជួយសង្គ្រោះនៅតែបន្តការងាររបស់ខ្លួននៅឡើយទេ។ ក្រុមការងារកំពុងស្វែងរកអ្នកបាត់ខ្លួនជាច្រើនទៀត។ រដ្ឋមន្ត្រីក្រសួងដឹកជញ្ជូនថៃថ្លែងថានៅពេលកើតមានឧបទ្ទវហេតុនោះនៅលើរថភ្លើងមានអ្នកដំណើរ១៩៥នាក់។
លោកបានបញ្ជាឱ្យស៊ើបអង្កេតឱ្យបានស៊ីជម្រៅដើម្បីរកមូលហេតុនេះការបាក់ដងស្ទូច។ រដ្ឋមន្ត្រីរូបនេះថ្លែងបន្តទៀតថាករណីស្លាប់មនុស្សកើតឡើងនៅក្នុងទូរថភ្លើងចំនួន២។ ដងស្ទូចនេះដាក់នៅការដ្ឋានសាងសង់ផ្លូវរថភ្លើងល្បឿនលឿន។ នៅសុខៗ ដងស្ទូចស្រាប់តែគ្រវីគ្រវាត់ទៅត្រូវរថភ្លើងដែលកំពុងបើកកាត់ទីនោះបណ្ដាលឱ្យរថភ្លើងធ្លាក់ពីលើផ្លូវ។
ភ្នាក់ងារអគ្គិភ័យបានចុះទៅពន្លត់ភ្លើងដែលឆេះ។ គេនៅតែឃើញផ្សែងហុយចេញពីខាងក្រោមទូរថភ្លើង។ តាមរយៈរូបថតដែលផ្សព្វផ្សាយដោយក្រសួងដឹកជញ្ជូន គេឃើញរថយន្តភ្លើងផ្អៀងទៅម្ខាងៗនៅលើដីមានដុះព្រៃគុម្ពោត។ ចំណែកវីឌីអូឃ្លីបខ្លះបង្ហាញរូបភ្នាក់ងារសង្គ្រោះកំពុងទាញជនរងគ្រោះចេញពីទូរថភ្លើង។ នេះបើយោងតាមរ៉យទ័រ និងប្រភពដទៃទៀត៕
ចែករំលែកព័តមាននេះ