ខេត្តកំពង់ស្ពឺ ៖ ជន២នាក់ដែលស្គាល់មុខតែមិនស្គាល់ចិត្ត បានត្រូវនគរបាលស្រាវជ្រាវឃាត់ខ្លួនតាមបណ្តឹងម្ចាស់ម៉ូតូ ក្រោយពីជនទាំង២នាក់បានខ្ចីម៉ូតូជនរងគ្រោះថា ជិះទៅផ្សារបាត់ដឹងមួយភ្លែត តែរហូតរំលងថ្ងៃហើយមិនឃើញយកមកសងវិញ ហើយម្ចាស់ម៉ូតូក៏សម្រេចចិត្តដាក់ពាក្យបណ្តឹងឱ្យសមត្ថកិច្ចជួយអន្តរាគមន៍ស្វែងរក ។ នគរបាលស្រុកសាមគ្គីមុនីជ័យបានឱ្យដឹងថា…
ខេត្តកំពង់ស្ពឺ ៖ ជន២នាក់ដែលស្គាល់មុខតែមិនស្គាល់ចិត្ត បានត្រូវនគរបាលស្រាវជ្រាវឃាត់ខ្លួនតាមបណ្តឹងម្ចាស់ម៉ូតូ ក្រោយពីជនទាំង២នាក់បានខ្ចីម៉ូតូជនរងគ្រោះថា ជិះទៅផ្សារបាត់ដឹងមួយភ្លែត តែរហូតរំលងថ្ងៃហើយមិនឃើញយកមកសងវិញ ហើយម្ចាស់ម៉ូតូក៏សម្រេចចិត្តដាក់ពាក្យបណ្តឹងឱ្យសមត្ថកិច្ចជួយអន្តរាគមន៍ស្វែងរក ។
នគរបាលស្រុកសាមគ្គីមុនីជ័យបានឱ្យដឹងថា ក្រុមជនសង្ស័យដែលប្រុងស៊ីដាច់ម៉ូតូជនរងគ្រោះនេះ ត្រូវបានឃាត់ខ្លួនកាលពីល្ងាចថ្ងៃទី៧ខែមករា ឆ្នាំ២០២៦កន្លងទៅ នៅក្នុងភូមិត្រពាំងថ្ម សង្កាត់ក្សេមក្សាន្ត ក្រុងឧដុង្គម៉ែជ័យ ។ ចំណែកម៉ូតូដែលជនសង្ស័យខ្ចីជនរងគ្រោះជិះទៅផ្សារហើយប្រុងស៊ីដាច់នោះ ម៉ាកហុងដាសេ១២៥ ស៊េរីឆ្នាំ២០១៨ ព៌ណខ្មៅ ពាក់ផ្លាកលេខ កំពង់ស្ពឺ ១K-២០៥២ ។ ម្ចាស់ម៉ូតូឈ្មោះ នី ណា ភេទប្រុស អាយុ៤៤ឆ្នាំ រស់នៅក្នុងភូមិស្ដុកតោលថ្មី ឃុំចាន់សែន ស្រុកសាមគ្គីមុនីជ័យ ។
ប្រភពដដែលឱ្យដឹងទៀតថា នៅមុនពេលឈានទៅឃាត់ខ្លួនក្រុមជនសង្ស័យខាងលើ គឺនៅវេលាម៉ោងប្រមាណ១និង៤០នាទីរសៀល ថ្ងៃទី៧ ខែមករា ឆ្នាំ២០២៦ ប៉ុស្ដិ៍នគរបាលរដ្ឋបាលឃុំចាន់សែន បានទទួលពាក្យបណ្តឹងពីបុរសឈ្មោះ នី ណា ដែលបានប្តឹងជនឈ្មោះ ស៊ីម សាន ភេទប្រុស អាយុ២២ឆ្នាំ រស់នៅក្នុងភូមិត្រពាំងថ្ម សង្កាត់ក្សេមក្សាន្ត ក្រុងឧដុង្គម៉ែជ័យ ។ ក្នុងពាក្យបណ្ដឹងបានរៀបរាប់ថា កាលពីវេលាម៉ោង១១និង៣០នាទីព្រឹកថ្ងៃទី៦ ខែមករា ឆ្នាំ២០២៦ ឈ្មោះ ស៊ីម សាន បានខ្ចីម៉ូតូរបស់គាត់ជិះទៅផ្សារបាត់ដឹងមួយភ្លែត ហើយក៏មិនឃើញជិះម៉ូតូយកមកឲ្យវិញគឺបាត់ឈឹង ទើបគាត់ជាម្ចាស់ម៉ូតូសម្រេចចិត្តដាក់ពាក្យប្តឹងតែម្តង ។
នគរបាលស្រុកសាមគ្គីមុនីជ័យបានឱ្យដឹងទៀតថា ក្រោយពីទទួលពាក្យបណ្ដឹងពីម្ចាស់ម៉ូតូ នៅវេលាម៉ោង៣រសៀលថ្ងៃទី៧ ខែមករា ឆ្នាំ២០២៦ កម្លាំងនគរបាលស្រុក បានសហការស្រាវជ្រាវ និងឃាត់ខ្លួនជនសង្ស័យចំនួន២នាក់ រស់នៅក្នុងភូមិត្រពាំងថ្ម សង្កាត់ក្សេមក្សាន្ត ក្រុងឧដុង្គម៉ែជ័យ គឺឈ្មោះ ស៊ីម សាន ភេទប្រុស អាយុ២២ឆ្នាំ និងឈ្មោះ ឆុន រ៉ុម ហៅម៉ៅ ភេទប្រុស អាយុ១៨ឆ្នាំ ។
ជនទាំង២នាក់នេះជាមុខសញ្ញាចាស់ និងធ្លាប់ជាប់ពន្ធនាគារចំនួន៥លើករួចមកហើយ ពាក់ព័ន្ធនឹងករណីចោរកម្ម ។ ជាមួយនឹងការឃាត់ខ្លួននេះ នគរបាលក៏បានដកហូតវត្ថុតាងមាន ម៉ូតូមួយគ្រឿងម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៨ ពាក់ផ្លាកលេខ កំពង់ស្ពឺ ១K-២០៥២ ជារបស់ជនរងគ្រោះ និងបានប្រគល់ទៅឲ្យម្ចាស់វិញ ។ ចំណែកជនសង្ស័យទាំង២នាក់ បញ្ជូនទៅស្នងការដ្ឋាននគរបាលខេត្ត ដើម្បីកសាងសំណុំរឿងចាត់ការបន្តតាមផ្លូវច្បាប់ ៕
ចែករំលែកព័តមាននេះ