រាជធានីភ្នំពេញ ៖ អ្នកប្រដាល់គោរមៈ ច័ន្ទរាជ និងរិន សារ័ត្ន ដែលបានទៅប្រកួតក្នុងព្រឹត្តិការណ៍គុនចម្រុះ MMA ដណ្ដើមខ្សែក្រវាត់GMAនៅប្រទេសវៀតណាម កាលពីថ្ងៃទី២៧ខែធ្នូកន្លងមកនេះ…
រាជធានីភ្នំពេញ ៖ អ្នកប្រដាល់គោរមៈ ច័ន្ទរាជ និងរិន សារ័ត្ន ដែលបានទៅប្រកួតក្នុងព្រឹត្តិការណ៍គុនចម្រុះ MMA ដណ្ដើមខ្សែក្រវាត់GMAនៅប្រទេសវៀតណាម កាលពីថ្ងៃទី២៧ខែធ្នូកន្លងមកនេះ បានយកឈ្នះលើកីឡាករម្ចាស់ផ្ទះទាំងពីរនាក់ និងដណ្ដើមបានខ្សែក្រវាត់ម្នាក់មួយគ្រឿងត្រឡប់មកកម្ពុជាវិញ។
កីឡាកររិន សារ័ត្ន ដែលបានប៉ះជាមួយកីឡាករវៀតណាមឈ្មោះNguyen Vu OhuongHoai បានត្រឹមយកឈ្នះដោយពិន្ទុប៉ុណ្ណោះ ។ ទោះជាយ៉ាងណា ការប្រកួតមានភាពស្វិតស្វាញមិនធម្មតាព្រោះកីឡាករវៀតណាមម្នាក់នេះមានក្បាច់ប្រយុទ្ធល្អ កម្លាំងខ្លាំង វាយចេញក៏បានរហ័សថែមទៀត ។ ប៉ុន្តែកីឡាករកម្ពុជារិន សារ័ត្ន ធ្វើបានល្អខ្លាំងណាស់ដោយបានបើកការវាយសន្ធាប់ទៅលើកីឡាករវៀតណាមតាំងពីទឹកទី១។
ជាពិសេសការប្រើក្បាច់ជើងទាត់និងកណ្ដាប់ដៃវាយទៅលើមុខកីឡាករវៀតណាមចូលពេញៗ
តែម្ដង ។ រិន សារ័ត្ន ធ្លាប់មានបទពិសោធន៍ប្រកួតនៅលើសង្វៀនវៀតណាមជាច្រើនលើករួចមកហើយ លើកនេះគេព្យាយាមយកឈ្នះឱ្យបាន ដើម្បីដណ្ដើមយកខ្សែក្រវាត់ត្រឡប់មកវិញ។ ក្នុងរយៈពេល១៣ឆ្នាំមកនេះ នេះជាលើកទី១ហើយដែលគេមានឱកាសគ្រងជាម្ចាស់ខ្សែក្រវាត់។
ចំណែកគោមរមៈ ច័ន្ទរាជ ចំណាយពេលត្រឹមតែមួយទឹកប៉ុណ្ណោះក្នុងការផ្ដួលកីឡាករវៀតណាមBui Truong Sinhឱ្យសន្លប់នៅលើសង្វៀន។ គ្រាន់តែបើកឆាកប្រកួតភ្លាម គេដើរចូលវាយទៅលើផ្ទៃមុខកីឡាករវៀតណាមចូលមួយដៃពេញទំហឹងបណ្ដាលឱ្យដួលសន្លប់តែម្ដង។
តាមការឱ្យដឹងពីលោកហ៊ុន ច័ន្ទរាជ ដែលជាគ្រូបង្វឹកថា នេះជាខ្សែក្រវាត់ទី២ហើយដែលគេដណ្ដើមបានពីការប្រកួតនៅលើទឹកដីប្រទេសវៀតណាមក្នុងព្រឹត្តិការណ៍MMA GMAដូចគ្នា៕
ចែករំលែកព័តមាននេះ