ទីក្រុងហាណូយ ៖ ប្រទេសវៀតណាមបានបើកការដ្ឋានសាងសង់ពហុកីឡដ្ឋាន Trong Dong ជាផ្លូវការ ដែលនឹងក្លាយជាពហុកីឡដ្ឋានធំជាងគេបំផុតលើពិភពលោក ជាមួយនឹងសមត្ថភាពផ្ទុកអ្នកទស្សនាបានដល់ទៅ ១៣៥ ០០០នាក់…
ទីក្រុងហាណូយ ៖ ប្រទេសវៀតណាមបានបើកការដ្ឋានសាងសង់ពហុកីឡដ្ឋាន Trong Dong ជាផ្លូវការ ដែលនឹងក្លាយជាពហុកីឡដ្ឋានធំជាងគេបំផុតលើពិភពលោក ជាមួយនឹងសមត្ថភាពផ្ទុកអ្នកទស្សនាបានដល់ទៅ ១៣៥ ០០០នាក់ ដែលនឹងត្រូវបានអភិវឌ្ឍលើផ្ទៃដី ៧៣,៣ ហិកតា និងមានទីតាំងនៅក្នុងទីក្រុងហាណូយ។ នេះបើយោងតាមប្រភពពី Seasia goal, Asia News Network និង Football Tribe បានចេញផ្សាយកាលពីពេលថ្មីៗនេះ។
គម្រោងដ៏ធំសម្បើមនេះ ត្រូវបានកំណត់គោលដៅបញ្ចប់នៅខែសីហា ឆ្នាំ២០២៨ ដោយវាស្ថិតក្នុងផ្នែកមួយនៃគម្រោងវិនិយោគ និងសាងសង់តំបន់ទីក្រុងកីឡាអូឡាំពិក (The Olympic Sports Urban Area) ដែលគ្របដណ្តប់នៅលើផ្ទៃដីជាង ៩ ១៧១ ហិកតា ជាមួយការវិនិយោគទឹកប្រាក់សរុបប្រមាណ ៩២៥ ទ្រីលានដុង ឬ ៣៥ ពាន់លានដុល្លារអាមេរិក។
នៅពេលសាងសង់រួច ពហុកីឡដ្ឋាននេះ នឹងវ៉ាដាច់ពហុកីឡដ្ឋាន Rungrado 1st of May របស់កូរ៉េខាងជើង ដែលមានសមត្ថភាពផ្ទុកអ្នកទស្សនាបាន ១១៤ ០០០នាក់ ព្រមទាំងកីឡដ្ឋានកីឡាគ្រីឃីត Narendra Modi របស់ឥណ្ឌា ដែលមានសមត្ថភាពផ្ទុកអ្នកទស្សនាបាន ១៣២ ០០០ នាក់ ដើម្បីដណ្តើមតំណែងជាពហុកីឡដ្ឋានធំជាងគេបំផុតលើពិភពលោក។
តាមរយៈគម្រោងមួយនេះ វៀតណាមមានគោលបំណងលើកកម្ពស់កម្រិតកីឡាជាតិ និងពង្រឹងឱកាសរបស់ខ្លួនធ្វើជាម្ចាស់ផ្ទះព្រឹត្តិការណ៍ធំៗជាសកល។ បើយោងតាមគេហទំព័រផ្លូវការរបស់ពហុកីឡដ្ឋាន Trong Dong បានបង្ហាញថា គម្រោងនេះ ត្រូវបានស្រាវជ្រាវ និងរចនាឡើងស្របតាមស្តង់ដាររបស់សហព័ន្ធបាល់ទាត់ពិភពលោក (FIFA) សហព័ន្ធបាល់ទាត់អាស៊ី (AFC) ក្រុមប្រឹក្សាអូឡាំពិកអាស៊ី និងអង្គការកីឡាអន្តរជាតិដទៃទៀត ដោយបង្កើតមូលដ្ឋានគ្រឹះសម្រាប់ប្រទេសវៀតណាមធ្វើជាម្ចាស់ផ្ទះដូចជា កីឡាអាស៊ី កីឡាអូឡាំពិក និងសូម្បីតែបាល់ទាត់ពិភពលោក (FIFA World Cup) ជាដើម។
ពហុកីឡដ្ឋាន Trong Dong ត្រូវបានរចនាឡើងពិសេសដោយមានភាពបត់បែនក្នុងការសម្របខ្លួនទៅនឹងកីឡាក្រៅស្រុក ការសម្តែងសិល្បៈ ពិធីបុណ្យ ព្រឹត្តិការណ៍សហគមន៍ និងសកម្មភាពទ្រង់ទ្រាយធំ។ រចនាបថ «ស្គរសំរិទ្ធដុងសឺន» (Dong Son Bronze Drum) ត្រូវបានជ្រើសរើសសម្រាប់រចនាការសាងសង់ ដើម្បីជាការបំផុសគំនិតរចនាចម្បង ដែលឆ្លុះបញ្ចាំងពីការលាយបញ្ចូលគ្នាយ៉ាងសុខដុមរមនានៃបេតិកភណ្ឌវប្បធម៌វៀតណាម និងភាសាស្ថាបត្យកម្មសហសម័យ។
គម្រោងនេះផ្តល់អាទិភាពដល់ដំណោះស្រាយនៃការសន្សំសំចៃថាមពល ការប្រើប្រាស់វត្ថុធាតុដើមដែលមិនប៉ះពាល់ដល់បរិស្ថាន ការបង្កើនទំហំបរិស្ថានបៃតង និងការសម្របខ្លួនទៅនឹងការប្រែប្រួលអាកាសធាតុ ស្របទៅតាមនិន្នាការអភិវឌ្ឍន៍ប្រកបដោយចីរភាពសកល៕
ចែករំលែកព័តមាននេះ