ខេត្តសៀមរាប ៖ អាជីវករលក់ដូរនៅតាមស្តង់ និងអ្នកថតរូបរកកម្រៃប្រចាំថ្ងៃនៅតំបន់រមណីយដ្ឋានអង្គរវត្ត បានឱ្យដឹងថា មួយរយៈនេះមិនសូវមានភ្ញៀវខ្មែរចូលមកទស្សនានៅប្រាសាទអង្គរវត្តទេ ដោយសារសង្គ្រាមឈ្លានពានរបស់ចោរសៀម បានបាញ់មកលើកងកម្លាំងយោធាខ្មែរយើងនិងជនភៀសសឹក ធ្វើឱ្យពួកគាត់បាត់បង់ផ្ទះសម្បែង ប្រពន្ធកូន…
ខេត្តសៀមរាប ៖ អាជីវករលក់ដូរនៅតាមស្តង់ និងអ្នកថតរូបរកកម្រៃប្រចាំថ្ងៃនៅតំបន់រមណីយដ្ឋានអង្គរវត្ត បានឱ្យដឹងថា មួយរយៈនេះមិនសូវមានភ្ញៀវខ្មែរចូលមកទស្សនានៅប្រាសាទអង្គរវត្តទេ ដោយសារសង្គ្រាមឈ្លានពានរបស់ចោរសៀម បានបាញ់មកលើកងកម្លាំងយោធាខ្មែរយើងនិងជនភៀសសឹក ធ្វើឱ្យពួកគាត់បាត់បង់ផ្ទះសម្បែង ប្រពន្ធកូន ឪពុកម្តាយ រហូតឈានដល់ស្លាប់បាត់បង់ជីវិតថែមទៀត ។
លោក សំណាង មគ្គុទេ្ទសក៍ទេសចរអង់គ្លេស រស់នៅក្នុងក្រុងសៀមរាប បានប្រាប់ភ្នាក់ងារកោះសន្តិភាព កាលពីរសៀលថ្ងៃទី១៨ ខែធ្នូ ឆ្នាំ២០២៥កន្លងមកថា កាលពីមុនភ្ញៀវទេសចរជាតិនិងអន្តរជាតិមានការកើនឡើងលុះពេលមានសង្គ្រាមរវាងកម្ពុជានិងថៃមួយរយៈនេះ មានការថយចុះបន្តិច ។ ប៉ុន្តែ ចំពោះភ្ញៀវបទេសវិញ ពួកគាត់មកតាមផ្លូវជើងគោក អត់មានផ្អាកការធ្វើដំណើរចូលមកកម្ពុជាទេ ។
រីឯភ្ញៀវទេសចរចាស់ៗដែលពួកគាត់បានបុ៊កឃីងយូរខែមកហើយ ដែលគាត់មកតាមជើងយន្ត
ហោះ និងភ្ញៀវខ្លះមកតាមកប៉ាល់ គឺគ្មានការរំខានពីការផ្ទុះសង្គ្រាមរវាងកម្ពុជានិងថៃ នៅតាមព្រំដែននោះទេ ។ ការចែកព័ត៌មានរបស់យើងបានច្បាស់លាស់ តំបន់គ្រោះថ្នាក់ និងតំបន់អត់មានគ្រោះថ្នាក់ គឺយើងបានបែងចែកច្បាស់លាស់ជូនទៅភ្ញៀវ ។ ដូច្នេះ ពួកគាត់នៅតែចង់មកទស្សនាប្រាង្គប្រាសាទអង្គរវត្ត ដែលជាស្នាដៃបុព្វបុរសខ្មែរយើងពីជំនាន់មុន ព្រោះពួកគាត់មកទស្សនាប្រាង្គប្រាសាទអង្គរវត្តនៅក្នុងខេត្តសៀមរាបនេះ មានការរៀបចំការពារ សណ្តាប់ធ្នាប់ជូនភ្ញៀវបរទេសបានល្អណាស់ ។
លោក សំណាង បន្តថា ចំពោះភ្ញៀវបរទេសដែលលោកនាំមកដើរកម្សាន្តនៅប្រាសាទអង្គរវត្តនេះ គឺជាភ្ញៀវជនជាតិអាមេរិក ដែលចូលមកប្រទេសកម្ពុជាតាមកប៉ាល់ ។ លោកសំណូមពរដល់ភ្ញៀវបរទេសទាំងអស់ ដែលមានបំណងមកទស្សនាកម្សាន្តនៅប្រទេសកម្ពុជាយើង គឺយើងការពារសុវត្ថិភាពជូនពួកគាត់១០០% អត់មានបញ្ហាអ្វីទេ ទោះបីកម្ពុជាយើងមានសង្គ្រាម ជាមួយថៃ ដោយសាររាជរដ្ឋាភិបាលយើង កំពុងព្យាយាមដោះស្រាយតាមរយៈការទូត ។
លោក ភិរម្យ មគ្គុទេ្ទសក៍ទេសចរកូរ៉េ រស់នៅក្នុងក្រុងសៀមរាប និយាយថា លោកនាំភ្ញៀវជនជាតិកូរ៉េ ហើយភ្ញៀវជនជាតិកូរ៉េភាគច្រើនមកតាមជើងយន្តហោះបន្តពីក្រុងហូជីមិញនៃប្រទេសវៀតណាម ចូលមកប្រទេសកម្ពុជា ។ ភ្ញៀវខ្លះចុះដើរលេងនៅប្រទេសវៀតណាម រួចបន្តមកលេងនៅប្រទេសកម្ពុជា ហើយភាគច្រើនជនជាតិកូរ៉េមកលេងនៅខេត្តសៀមរាបប្រមាណ៣០% ។ ពួកគាត់មកលេងនៅប្រទេសកម្ពុជាភាគច្រើននៅក្នុងខែធ្នូ ខែមករា និងខែកុម្ភៈ ព្រោះនៅខែនោះជារដូវវិស្សមកាល និងរដូវធ្លាក់ទឹកកកនៅប្រទេសរបស់គេ ។ ជនជាតិកូរ៉េភាគច្រើនចូលចិត្តមកតំបន់អង្គរវត្ត ខេត្តសៀមរាប ហើយពួកគាត់ចង់ដឹងពីការអភិវឌ្ឍសេដ្ឋកិច្ចក្នុងស្រុករបស់យើងដូចជា ខេត្តសៀមរាប រាជធានីភ្នំពេញ និងខេត្តព្រះសីហនុជាដើម ។ កាលពីឆ្នាំមុន ដោយសារមានបញ្ហាខ្លះទើបធ្វើឱ្យភ្ញៀវជនជាតិកូរ៉េមានការធ្លាក់ចុះ រីឯភ្ញៀវអឺរ៉ុបមានការកើនឡើង ។
លោក គឹម ហ៊ុយ មគ្គុទេ្ទសក៍ទេសចរអេស្ប៉ាញ រស់នៅក្នុងស្រុកប្រាសាទបាគង និយាយថា តំបន់រមណីយដ្ឋានអង្គរចាប់ពី ២០០១ រហូតមកដល់បច្ចុប្បន្នមានរយៈពេល២៤ឆ្នាំភ្ញៀវដែលលោកនាំមកទស្សនាតាមប្រាសាទអង្គរវត្តនេះ ចូលមកប្រទេសកម្ពុជាតាមជើងយន្តហោះ ព្រោះនៅតាមព្រំដែនត្រូវបានបិទ ។ ចំពោះភ្ញៀវរបស់លោកមិនមានការព្រួយបារម្ភអ្វីនោះទេ ដោយសារកម្លាំងសមត្ថកិច្ចនៅក្នុងខេត្ត យាមកាមការពារសុវត្ថិភាព និងសណ្តាប់ធ្នាប់ជូនភ្ញៀវ បាន១០០% ៕
ចែករំលែកព័តមាននេះ