រថយន្តតូយ៉ូតាព្រូស បុកម៉ូតូបត់ឆ្លងផ្លូវ បណ្តាលអោយបោកក្បាលស្លាប់នៅកន្លែង
រាជធានីភ្នំពេញ ៖ រថយន្តម៉ាកតូយ៉ូតាព្រូស TOYOTA PRIUS មួយគ្រឿង បានបើកក្នុងល្បឿនលឿន ទៅបុកម៉ូតូម៉ាក HONDA C125…
រាជធានីភ្នំពេញ ៖ រថយន្តម៉ាកតូយ៉ូតាព្រូស TOYOTA PRIUS មួយគ្រឿង បានបើកក្នុងល្បឿនលឿន ទៅបុកម៉ូតូម៉ាក HONDA C125 មួយគ្រឿង បត់ឆ្លងផ្លូវ បណ្តាលអោយបោកក្បាលស្លាប់នៅកន្លែង ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង០៨និង០៥នាទីព្រឹក ថ្ងៃទី១៨ ខែធ្នូ ឆ្នាំ២០២៥ ត្រង់ចំណុចមុខស្ថានីយ៍ប្រេងតេលា ពញាពន់ លើផ្លូវលេខ១៥១ ក្នុងភូមិធំជើង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ ។
ជនរងគ្រោះ ដែលបានស្លាប់បាត់បង់ជីវិតឈ្មោះ សំ សំរិទ្ធ ភេទប្រុស អាយុ ៧១ឆ្នាំ ជាយោធិនចូលនិវត្ត ស្នាក់នៅភូមិធំជើង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ (មិនពាក់មួកសុវត្ថិភាព បានស្លាប់កន្លែងកើតហេតុ) ជិៈម៉ូតូ ០១គ្រឿង ម៉ាក HONDA C125 ពណ៌ខ្មៅ ពាក់ផ្លាកលេខ កំពង់ចាម 1B-8809 ។
ចំណែករថយន្តបង្កម៉ាកតូយ៉ូតាព្រូស ពណ៌ស ពាក់ផ្លាកលេខ កម្ពុជា T.A.0809 បើកបរដោយឈ្មោះ សួង សុភា ភេទប្រុស អាយុ ៣៧ឆ្នាំ ស្នាក់នៅផ្ទះលេខ៣១១ ផ្លូវលំ ភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ត្រូវបានសមត្ថកិច្ចឃាត់ខ្លួន ។
តាមសាក្សីបានឲ្យដឹងថា នៅមុនពេលកើត ហេតុគេឃើញរថយន្តខាងលើ បានធ្វើដំណើរក្នុងទិសដៅពីកើតទៅលិច។ នៅពេលមកដល់ចំណុចកើតហេតុ ក៏បានបុកម៉ូតូមួយគ្រឿងខាងលើ ដែលធ្វើដំណើរឆ្លងផ្លូវ ពីជើងទៅត្បូង ។
តាមព័ត៌មានឲ្យដឹងទៀតថា នៅក្នុងគ្រោះថ្នាក់នោះ បណ្ដាលឲ្យជនរងគ្រោះអត់ពាក់មួក បោកក្បាលស្លាប់នៅនឹងកន្លែង ហើយរថយន្តបានរងការខូចខាត។ ភ្លាមៗ នគរបាលមូលដ្ឋាន បានចុះទៅអន្តរាគមន៍ឃាត់ខ្លួនអ្នកបើកបរ។ រថយន្ត និងអ្នកបើកបរ ព្រមទាំងម៉ូតូ ត្រូវបាន នគរបាលចរាចរណ៍ ចុះទៅវាស់វែង រួចបញ្ជូនទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគបាលរាជធានីភ្នំពេញ ដើម្បីចាត់ការតាមច្បាប់។ ចំណែកសព សមត្ថកិច្ចប្រគល់ទៅឲ្យក្រុមគ្រួសារ នាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ