ខេត្តកំពត ៖ នៅក្នុងសាលប្រជុំសាលាខេត្ត កាលពីព្រឹកថ្ងៃទី២១ កក្កដា មានកិច្ចប្រជុំជួបសំណេះសំណាលជាមួយមន្ត្រីនគរបាលយុត្តិធម៌ ខេត្តកំពត និងខេត្តកែប ក្រោមអធិបតីភាព លោកអ៊ុក សាវុធ អគ្គព្រះរាជអាជ្ញាសាលាឧទ្ធរណ៍ និងលោកមួង ឃីម អនុប្រធាននាយកដ្ឋានកណ្តាលនគរបាលយុត្តិធម៌ និងជាតំណាងលោក
ខេត្តកំពត ៖ នៅក្នុងសាលប្រជុំសាលាខេត្ត កាលពីព្រឹកថ្ងៃទី២១ កក្កដា មានកិច្ចប្រជុំជួបសំណេះសំណាលជាមួយមន្ត្រីនគរបាលយុត្តិធម៌ខេត្តកំពត និងខេត្តកែប ក្រោមអធិបតីភាព លោកអ៊ុក សាវុធ អគ្គព្រះរាជអាជ្ញាសាលាឧទ្ធរណ៍ និងលោកមួង ឃីម អនុប្រធាននាយកដ្ឋានកណ្តាលនគរបាលយុត្តិធម៌ និងជាតំណាងលោកនាយឧត្តមសេនីយ៍អគ្គស្នងការនគរបាលជាតិ។ វត្តមានចូលរួមជាកិត្តិយសក្នុងពិធីសំណេះសំណាលនេះ ក៏មានការអញ្ជើញចូលរួមពីលោកជឹង ផល្លា អភិបាលរងខេត្តកំពត មេបញ្ជាការ មេបញ្ជាការរង កងរាជអាវុធហត្ថ និងមន្ត្រីកងរាជអាវុធហត្ថខេត្តទាំងពីរ ស្នងការ ស្នងការរង នគរបាលខេត្ត និងនាយ នាយរងការិយាល័យនគរបាលយុត្តិធម៌ ចំណុះស្នងការខេត្តទាំងពីរ អធិការ អធិការរងស្រុកគ្រប់ស្រុក ចំណុះខេត្តទាំងពីរមន្ត្រីថ្នាក់ដឹកនាំខណ្ឌរដ្ឋបាលជលផល និងមន្ត្រីថ្នាក់ដឹកនាំ ខណ្ឌរដ្ឋបាលព្រៃឈើ មន្ត្រីសាខាគយ និងរដ្ឋាករ ប្រធានតុលាការខេត្ត ព្រះរាជាអាជ្ញា ព្រះរាជអាជ្ញារងសាលាដំបូងខេត្ត និងប្រតិភូជាថ្នាក់ដឹកនាំជាច្រើនរូបទៀត។
តាមរបាយការណ៍ដែលបានលើកឡើងដោយលោកជុំ សំបាន ព្រះរាជអាជ្ញាអមសាលាដំបូងខេត្តឱ្យដឹងថា ក្នុងរយៈពេលឆមាសទី១ ឆ្នាំ២០១១នេះ តុលាការ និងពន្ធនាគារខេត្តកំពត និងខេត្តកែប បានចូលរួមកាត់ទោសចំនួន៥៤៨ នាក់ ក្នុងនោះមានអ្នកទោសសល់ពីមុន៨៨នាក់ អ្នកទោសចូលថ្មី១៨៦នាក់ អ្នកទោសដែលបានចាត់ការតាមផ្លូវច្បាប់រួចហើយចំនួន១៥៥នាក់ អ្នកទោសកំពុងចាត់ការតាមផ្លូវច្បាប់ចំនួន១១៩នាក់។
លោកអ៊ុក សាវុធ អគ្គព្រះរាជាសាលាឧទ្ធរណ៍ បានមានប្រសាសន៍ថា ក្រោយពីស្តាប់របាយការណ៍ លោកមានការចាប់អារម្មណ៍យ៉ាងខ្លាំងចំពោះមន្ត្រីនគរបាលយុត្តិធម៌ដែលជាអ្នកគោរពច្បាប់ និងអនុវត្តច្បាប់ គឺយើងត្រូវធ្វើយ៉ាងណាឱ្យមានភាពយុត្តិធម៌ចំពោះច្បាប់ចាំបាច់ គឺយើងត្រូវផ្តល់ភាពយុត្តិធម៌ដល់ជនរងគ្រោះ។ យើងរៀនចេះយកចំណេះនោះមកអនុវត្តច្បាប់ឱ្យបានត្រឹមត្រូវតែបើយើងរៀនហើយ អនុវត្តន៍ច្បាប់មិនបានត្រឹមត្រូវ និងគ្មានភាពយុត្តិធម៌មិនឈ្មោះជាមន្ត្រីនគរបាលយុត្តិធម៌ដែរ។ ដូច្នេះធ្វើអ្វីមួយដែលពាក់ព័ន្ធនឹងច្បាប់ត្រូវឱ្យមានតម្លាភាពដោយផ្អែកលើយុត្តិធម៌ជាគោល។ លោកអគ្គព្រះរាជអាជ្ញាសាលាឧទ្ធរណ៍បានបញ្ជាក់ ពីដំណើរបេសកម្មមកជួបសំណេះសំណាលដល់មន្ត្រីនគរបាលយុត្តិធម៌ក្នុងខេត្តទាំងពីរនេះ ដើម្បីឱ្យបងប្អូនអស់ចម្ងល់ព្រោះប្រទេសយើងមានដំណើរការវិវត្តន៍ផ្នែកច្បាប់ច្រើន។ យើងដឹងហើយថា នៅឆ្នាំ២០០៧ច្បាប់ព្រហ្មទណ្ឌនីតិវិធីព្រហ្មទណ្ឌចេញ ឱ្យអនុវត្តដែលច្បាប់នេះធ្វើ តាំងពីឆ្នាំ១៩៩៧ គឺមានរយៈពេល១០ឆ្នាំបើគិតមកដល់ឆ្នាំ។ នៅឆ្នាំ ២០១០ ចូលជាធរមាននូវក្រមនីតិវិធីមួយទៀត ដែលមានមាត្រាក៏ច្រើន។ ក្នុងច្បាប់នេះតម្រូវឱ្យប្រគល់ការងារអធិការកិច្ចការងារនគរបាលយុត្តិធម៌ ការងារអធិការកិច្ចត្រួតពិនិត្យអយ្យការ តាមខេត្ត-ក្រុង ដែលភារកិច្ចទាំងអស់នេះទម្លាក់មកលើ អគ្គព្រះរាជអាជ្ញា សាលាឧទ្ធរណ៍ ដូច្នេះអគ្គព្រះរាជអាជ្ញាសាលាឧទ្ធរណ៍មានតួនាទីទូលំទូលាយក្នុងក្រមនីតិវិធីច្បាប់។ លោកបន្តថា ការដែលលោកចុះមកនេះ គឺជំរុញឱ្យអនុវត្តតាមច្បាប់នីតិវិធីព្រហ្មទណ្ឌក្នុងឱ្យកាសជួបជុំគ្នាព្រមទាំងមានបណ្តាំផ្ញើជាច្រើនទៀត និងចុងក្រោយយើងមានកម្មវិធីសំណួរ-ចម្លើយ ពីព្រោះមន្ត្រីនគរបាលយុត្តិធម៌យើងអាចមានចម្ងល់ច្រើនក្នុងការអនុវត្តន៍ក្រមនីតិវិធីថ្មី។ ដែលយើងត្រូវអនុវត្តគឺមានច្រើនអស់មួយរឿងមិនចេះចប់។
លោកអគ្គព្រះរាជអាជ្ញាក៏បានលើកឡើងផងដែរថា នគរបាលយុត្តិធម៌ត្រូវស្បថពីព្រោះយើងធ្វើជាមន្ត្រីនគរបាលយុត្តិធម៌ ត្រូវមានភាពយុត្តិធម៌ បានន័យថាជាអ្នករកយុត្តិធម៌ចំពោះ ជនមានកំហុស។ យើងធ្វើយ៉ាងនេះទើបការអនុវត្តច្បាប់មានតម្លាភាព និងយុត្តិធម៌ត្រឹមត្រូវ។
បន្ទាប់ពីមានមតិសំណេះសំណាលជាមួយមន្ត្រីនគរបាលយុត្តិធម៌ពាក់ព័ន្ធនឹងក្រមនីតិវិធីច្បាប់ លោកអគ្គព្រះរាជអាជ្ញាបើកឱ្យមានសំណួរចម្លើយមួយចំនួន ពីមន្ត្រីនគរបាលយុត្តិធម៌នៅមូលដ្ឋានដែលបានអនុវត្តកន្លងមកចេះតែមានបញ្ហាចោទឡើងរវាងសមត្ថកិច្ចចុះអនុវត្តច្បាប់ និងជនល្មើសប្តឹងតវ៉ាពីសមត្ថកិច្ចអនុវត្តច្បាប់។ លោកបានបកស្រាយពន្យល់ដល់មន្ត្រីនគរបាលយុត្តិធម៌យ៉ាងច្បាស់ជុំវិញកិច្ចការមួយចំនួនដែលបានអនុវត្តន៍នីតិវិធីច្បាប់កន្លងមក៕
ចែករំលែកព័តមាននេះ