ខេត្តបន្ទាយមានជ័យ ៖ បុរសម្នាក់មានទីលំនៅភូមិសាមគ្គី ឃុំគោករមៀត ស្រុកថ្មពួក ទៅធ្វើជាកម្មករនៅភូមិគោកប្រាសាទ ឃុំទ័ពស្តេច ស្រុកតាប់ប្រាយ៉ា ខេត្តស្រះកែវ ប្រទេសសៀមត្រូវពលរដ្ឋសៀម វាយនឹងចបជីក ចំក្បាលបែកហូរឈាម រងរបួសធ្ងន់ធ្ងរ ហើយបានស្លាប់កាលពីវេលាម៉ោង១២យប់ថ្ងៃទី១៩ កក្កដា ២០១១ ក្រោយពេលបញ្ជូនមកព្យាបាលនៅមន្ទីរពេទ្យបង្អែកមិត្តភាពកម្ពុជា-ជប៉ុន ស្ថិតក្នុងស្រុកមង្គលបុរី ខេត្តបន្ទាយមានជ័យបានមួយថ្ងៃ។
បើតាមការបំភ្លឺពីស្ត្រីឈ្មោះកិ ពែក អាយុ៤៦ឆ្នាំ ជាភរិយារបស់ជនរងគ្រោះដែលបាននាំលោកមេភូមិសាមគ្គីទៅប្តឹងសមត្ថកិច្ចនគរបាលការពារព្រំដែនលេខ៨០៧ រៀបរាប់ថា ប្តីរបស់នាងឈ្មោះសាយ សឿម ហៅផយ អាយុ៣៦ឆ្នាំ រួមទាំងរូបនាងបានទៅធ្វើជាកម្មករស៊ីឈ្នួលនៅប្រទេសថៃរយៈពេល១៥ឆ្នាំហើយ។ នៅពេលកើតហេតុ វេលាម៉ោង១០ព្រឹកថ្ងៃ១៧ កក្កដា ២០១១ មានឈ្មោះប៊យ ភេទប្រុស អាយុ២៣ឆ្នាំ ជាជនជាតិសៀម នៅភូមិគោកប្រាសាទ ឃុំទ័ពស្តេច ស្រុកតាប់ប្រាយ៉ា ខេត្តស្រះកែវ បានធាក់ប្តីរបស់នាងមួយជើងពីក្រោយ បណ្តាលឱ្យផ្កាប់មុខរមៀលធ្លាក់ពីលើគ្រែ រួចជាន់លើខ្នងធាក់៤ទៅ៥ជើងទៀត បន្ទាប់មកជននោះបានយកហ្គីតាវាយ និងយកចបជីកវាយត្រូវក្បាល និង ក បណ្តាលឱ្យគាត់សន្លប់បាត់ស្មារតី ។
ក្រោយពីធ្វើសកម្មភាពរួច ទើបមានមេឃុំ និងតម្រួតថៃមកយកប្តីនាងបញ្ជូនទៅព្យាបាលនៅមន្ទីរពេទ្យស្រុកតាប់ប្រាយ៉ា។ បានប៉ុន្មានម៉ោងក្រោយមក នាងក៏យកប្តីទៅព្យាបាលនៅមន្ទីរពេទ្យបង្អែកស្រុកថ្មពួកបានមួយយប់ ប៉ុន្តែដោយអាការរបួសធ្ងន់ធ្ងរពេក គ្រូពេទ្យក៏បញ្ជូនទៅព្យាបាលបន្តនៅមន្ទីរពេទ្យបង្អែកមិត្តភាពកម្ពុជា-ជប៉ុន ជាបន្តទៀត។ បានមួយយប់ ប្តីនាងបានស្លាប់នៅវេលាម៉ោង១២យប់ថ្ងៃទី១៩ កក្កដា ២០១១តែម្តង។ សពប្តីរបស់នាងបានដឹកយកទៅធ្វើបុណ្យតាមប្រពៃណីលំនៅដ្ឋានភូមិសាមគ្គី ឃុំគោករមៀត ស្រុកថ្មពួកវិញ ៕
ចែករំលែកព័តមាននេះ