តារាចម្រៀងនាង ទេព បូព្រឹក្ស បានជម្នះភាពភ័យខ្លាចរបស់ខ្លួន ដោយតស៊ូយកអំណោយផ្សេងៗទៅដល់ដៃវីរកងទ័ពកម្ពុជានៅជួរមុខ ដោយមិនខ្លាចពីគ្រាប់ផ្លោងរបស់ទាហានឈ្លានពានថៃ ។តារាចម្រៀងរូបនេះបញ្ជាក់ថា ការធ្វើបែបនេះ គឺធ្វើទៅតាមអ្វីដែលនាងធ្លាប់សន្យាថា នឹងយកស្បៀងជូនដល់ដៃវីរកងទ័ពកម្ពុជាគ្រប់ទីកន្លែងតាមអ្វីដែលអាចធ្វើទៅបាន…
តារាចម្រៀងនាង ទេព បូព្រឹក្ស បានជម្នះភាពភ័យខ្លាចរបស់ខ្លួន ដោយតស៊ូយកអំណោយផ្សេងៗទៅដល់ដៃវីរកងទ័ពកម្ពុជានៅជួរមុខ ដោយមិនខ្លាចពីគ្រាប់ផ្លោងរបស់ទាហានឈ្លានពានថៃ ។
តារាចម្រៀងរូបនេះបញ្ជាក់ថា ការធ្វើបែបនេះ គឺធ្វើទៅតាមអ្វីដែលនាងធ្លាប់សន្យាថា នឹងយកស្បៀងជូនដល់ដៃវីរកងទ័ពកម្ពុជាគ្រប់ទីកន្លែងតាមអ្វីដែលអាចធ្វើទៅបាន ។
តាមរយៈសំណេរបង្ហោះលើបណ្តាញសង្គម ទេព បូព្រឹក្ស បានលើកឡើងថា លើកទីមួយហើយដែលលឺផ្ទាល់ត្រចៀកឃើញផ្ទាល់ភ្នែកពេលលឺសំលេងគ្រាប់ ទើបដឹងថា មួយគ្រាប់មួយគ្រាប់រង្គើធរណីហុយដីជុក ទីកន្លែងដែលជិះមកសាលាបិទស្ងាត់ឈឹង បងប្អូនប្រជាជនកន្លែងនោះបិទទ្វារស្ងាត់ផ្ទះ មិនដឹងក្មេងក្មេងគ្នាភ័យយ៉ាងណាទេ ពេលលឺដំបូងៗ តែខ្ញុំបានសន្យាជាមួយព្រះហើយថា ខ្ញុំនឹងធ្វើឲ្យអស់ពីលទ្ធភាព ត្រូវតែទៅដល់ផ្ទាល់ ដើម្បីបានស្បៀងជូនគាត់ដល់ដៃគ្រប់កន្លែងដែលអាចចូលបាន ដូចថ្ងៃនេះ ចូលទៅកៀកណាស់ចាំចប់សង្គ្រាមចាំ post video ជូនបងប្អូនមើល តែពេលនេះ ពួកខ្ញុំចេញផុតពីតំបន់ក្រហមហើយនឹងបន្តដំណើរទៅកន្លែងផ្សេងទៀត ។
ដូចដែរខ្ញុំបានសន្យាតាំងពីដំបូងមកថា នឹងព្យាយាមចូលទៅគ្រប់ទីកន្លែងកៀកយ៉ាងណាក៏ដោយអោយតែគេឲ្យចូលយកទៅឲ្យដល់ដៃទើបស្ងប់ចិត្ត ។ នាងបន្ថែមថា មានបងប្អូនខ្ញុំសួរខ្ញុំថា ហេតុ
អីហ៊ានម្ល៉េះ តែខ្ញុំសួរវិញថា ហ៊ានមិនហ៊ានបើពេលនេះខ្ញុំគេងផ្ទះជួយរៀបអីវ៉ាន់ពីផ្ទះក៏បានតែអារម្មណ៍ខ្ញុំផ្ទាល់ពេលខ្ញុំបង្ហាញខ្លួនជួបពួកគាត់ទីមួយជាកំលាំងចិត្ត នឹងខ្ញុំឲ្យច្បាស់ចិត្តថាស្បៀងដែលយកមកបានជូនផ្ទាល់ដល់ដៃពួកគាត់ នឹងបានដឹងសុខទុក្ខពួកគាត់ផង កន្លែងដែលទៅរាងជ្រៅបន្តិចមែន ខ្ញុំក៏ដឹងថាហេងស៊យទេ តែបើមិនទៅខ្លួនឯងមិនអស់ចិត្ត ។
ប្តីឲ្យនៅផ្ទះតែខ្ញុំក៏ឆ្លើយប្រាប់ប្តីថា កូនយើងនឹងមានមោទនភាពចំពោះយើង ហើយនិយាយលេងជាមួយប្តីថា ធ្វើបទឲ្យខ្ញុំច្រៀងសុទ្ធតែវិរនារីហើយ គ្រាន់ជាចំណែកតូចមួយដែលធ្វើរឿងនេះ ដើម្បីជាតិមានអីត្រូវខ្លាច តែខ្ញុំក៏មានជំនឿដែរព្រះនៅលើក្បាល គុណម៉ែគុណឪជាប់ខ្លួន ។
គួរបញ្ជាក់ថា ទេព បូព្រឹក្ស ក៏ដូចជាអ្នកសិល្បៈជាច្រើនទៀតបានសស្រាក់ដៃគ្នានៅក្នុងការចូលរួមជាថវិកាផ្ទាល់ខ្លួន និងបង្កើតមូលនិធិស្វែងរកថវិកា និងសម្ភារពីសប្បុរសជននានា ដើម្បីជួយដល់ជនភៀសសឹក និងវីរកងទ័ពកម្ពុជាដែលកំពុងតតាំងច្បាំងជាមួយសត្រូវឈ្លានពានសៀម ៕
ចែករំលែកព័តមាននេះ