ពលរដ្ឋក្នុងភូមិខ្នារ សង្កាត់ជ្រាវ ក្រុងសៀមរាប រួមគ្នាផលិត«អំបុកលីងសន្តិភាព»ដ៏ឈ្ងុយឆ្ងាញ់ យកជូនវីរៈកងទ័ព
- ភ្នំពេញ
ខេត្តសៀមរាប ៖ លោក គង់ ប៊ិប ដឹកនាំ ពល រដ្ឋនៅ សង្កាត់ជ្រាវ ក្រុងសៀមរាប…
ខេត្តសៀមរាប ៖ លោក គង់ ប៊ិប ដឹកនាំ ពល រដ្ឋនៅ សង្កាត់ជ្រាវ ក្រុងសៀមរាប រួមគ្នា ផលិត អំបុកសន្ដិភាព ផ្ដល់ជូនវីរៈកងទ័ពជួរមុខ ខណៈដែលវីរកងទ័ពកំពុងការពារទឹកដីពីចោរឈ្លានពានសៀម ដូច្នេះប្រជាពលរដ្ឋជួរក្រោយជាច្រើនកុះករ នៅភូមិខ្នារ សង្កាត់ជ្រាវ ក្រុងសៀមរាប បានរួមគ្នាផលិតអំបុកស្ងួតលាយជាមួយគ្រឿងដ៏ឈ្ងុយឆ្ងាញ់ ត្រៀមយកទៅចែកជូនវីរៈកងទ័ពនៅជួរមុខ។
ការផលិតអំបុកស្ងួតនេះ បានធ្វើឡើងជារៀងរាល់ថ្ងៃ ដោយចាប់ផ្ដើមតាំងពី ថ្ងៃទី៨ ខែធ្នូឆ្នាំ២០២៥ រហូតមកដល់សព្វថ្ងៃនេះ។
លោក គង់ ប៊ឹប តំណាងប្រជាពលរដ្ឋ ក្នុងភូមិខ្នារ សង្កាត់ជ្រាវ ក្រុងសៀមរាប បានមាន ប្រសាសន៍ថា ការផលិតអំបុកស្ងួតនេះ មាន ឈ្មោះថា “អំបុកលីងសន្ដិភាព” ដែលផលិតឡើងដោយមានគ្រឿងទេសសាច់ជ្រូកយ៉ាងឈ្ងុយឆ្ងាញ់ ដែលមានប្រជាពលរដ្ឋរួមសាមគ្គី គ្នាសម្រាប់ត្រៀមយកទៅចែកជូនដល់វីរកង ទ័ពនៅជួរមុខ ដែលពួកគាត់បានតស៊ូលះបង់ជីវិត ដើម្បីការពារជាតិមាតុភូមិ យើង។ក្នុងការរួបរួមគ្នានេះ បង្ហាញពីប្រជាជនខ្មែរ ចេះសាមគ្គីគ្នា ខ្មែរជួយខ្មែរ ខ្មែររួបរួមគ្នា ខ្មែរបេះដូងតែមួយ ។
លោកបន្ដថា ប្រជាពលរដ្ឋនៅសមរភូមិក្រោយ បង្ហាញជំហ៊រគាំទ្រនិងលើកទឹកចិត្ដជានិច្ចចំពោះវីរកងទ័ព ដើម្បីជាតិមាតុភូមិ ដើម្បីប្រជាជនកម្ពុជា ព្រោះមានបទ ពិសោធន៍កាលពីផ្ទុះអាវុធរបស់ទាហានសៀមមកលើកម្ពុជាលើកទី១.។
លោកបន្ដថា ចាប់ពីថ្ងៃទី៨ខែធ្នូ ឆ្នាំ២០២៥មកនេះ ប្រជាពលរដ្ឋបានផលិតអំបុកលីងសន្ដិភាព បានជិត៣ ពាន់គីឡូ ដែលស្នើរនឹងជាង៨ពាន់ដប ដោយច្រកដាក់ដបទឹកសុទ្ធ ក្នុងមួយរយគីឡូក្រាមបានជាង៣៥០ដប។លោកបន្ថែមថា ចាប់ តាំងពីថៃវាយប្រហារមកលើទឹកដីកម្ពុជាទាំងលើកទីមួយ និងលើកទី២ នេះ ប្រជាពលរដ្ឋនៅភូមិនេះ បានរួបរួមសាមគ្គីគ្នាផលិតអំបុកទុកសម្រាប់កងទ័ពជាបន្ដបន្ទាប់ ហើយបានជួយផ្ដល់គ្រឿងឧបភោគបរិភោគដល់ប្រជា ពលរដ្ឋភៀសសឹកជិត២០០គ្រួសារដែលបានស្នាក់នៅក្នុងភូមិខ្នារនេះផងដែរ។ លោកបានអំពាវដល់សហគមន៍អន្ដរជាតិជួយអន្ដរាគមន៍ដល់ភាគីថៃឱ្យជួយបញ្ចប់សង្គ្រាមជាមួយកម្ពុជា ឱ្យបានឆាប់ ព្រោះប្រជាជនខ្មែរមិនត្រូវការសង្គ្រាមនោះទេ គឺត្រូវការតែសន្ដិភាព។
សូមរំលឹកថា អត្ដន័យនៃការលើកឡើងរបស់សម្ដេចតេជោ ហ៊ុន សែន នាយឧត្ដម សេនីយ៍ផុតលេខផ្កាយមាស៥ និង ជាមគ្គុទេសក៍ឯកសន្ដិភាព បានធ្វើឱ្យប្រជាពលរដ្ឋផុសផុលគាំទ្រយ៉ាងខ្លាំង នាំគ្នាបុកអំបុកស្រូវថ្មីវាយសត្រូវឈ្លានពាន ដើម្បី យកផ្ដល់ជូនវីរកងទ័ពនៅជួរមុខ និងដើម្បីចូលរួមផ្ដល់កម្លាំងចិត្ដដល់វីរកងទ័ពកម្ពុជាបន្ថែមទៀត ដែលពួក គាត់កំពុងវាយបកទៅយោធាថៃឈ្លានពានបូរណភាពទឹកដីរបស់ខ្មែរ។
សម្ដេចតេជោ បានអំពាវនាវដល់បងប្អូនប្រជាពលរដ្ឋ និងសប្បុរសជន ជួយទិញអំបុកស្រូវថ្មីយកទៅចែកជូនកងកម្លាំងដែលឈរជើងនៅជួរមុខ ដោយបានរំលេចពាក្យមួយឃ្លាដ៏មានអត្ថន័យថា «ទទួលទានអំបុកស្រូវថ្មី វាយសត្រូវឈ្លានពាន»៕
ចែករំលែកព័តមាននេះ