ខេត្តកំពត ៖ អំណោយសប្បុរសជន ត្រូវបានភ្នាក់ងារកោះសន្តិភាពពាំនាំទៅប្រគល់ជូនលោកយាយ៣ នាក់ដែលរស់នៅឯកោតាមដងផ្លូវនៅស្រុកអង្គរជ័យ កាលពីព្រឹកថ្ងៃទី២១ កក្កដា ។ លោកយាយទាំង៣នាក់នេះ គឺមាន ១-លោកយាយសួន តែម អាយុ៧៨ឆ្នាំ ត្រូវបានអ្នកស្រុកធ្វើខ្ទមតូចមួយបាំងតង់កៅស៊ូឱ្យស្នាក់នៅ ជាប់
ខេត្តកំពត ៖ អំណោយសប្បុរសជន ត្រូវបានភ្នាក់ងារកោះសន្តិភាពពាំនាំទៅប្រគល់ជូនលោកយាយ៣នាក់ដែលរស់នៅឯកោតាមដងផ្លូវនៅស្រុកអង្គរជ័យ កាលពីព្រឹកថ្ងៃទី២១ កក្កដា ។ លោកយាយទាំង៣នាក់នេះ គឺមាន ១-លោកយាយសួន តែម អាយុ៧៨ឆ្នាំ ត្រូវបានអ្នកស្រុកធ្វើខ្ទមតូចមួយបាំងតង់កៅស៊ូឱ្យស្នាក់នៅជាប់ផ្លូវក្រួសក្រហម ស្ថិតនៅក្នុងភូមិស្រែរោង ឃុំភ្នំកុង បានទទួលប្រាក់ឧបត្ថម្ភពីសប្បុរសជនចំនួន១៤ម៉ឺន៥ពាន់រៀល ហើយការគ្រប់គ្រងថវិកាផ្តល់ជូនលោកយាយសួន តែម នេះគឺមានអ្នកស្រីយ៉ែម វណ្ណា ជាអ្នកមើលថែ។ ២-លោកយាយឃឹម យឹម អាយុ៩០ឆ្នាំ និង៣-លោកយាយឡុង ផង់ អាយុ៧៩ឆ្នាំ ពិការភ្នែកទាំងសងខាងផង។ លោកយាយទាំង២នាក់ ក្រោយនេះគ្មានកូនចៅមើលថែទាំទេ និងត្រូវបានគេសាងសង់ខ្ទមតូចមួយឱ្យស្នាក់នៅតាមដងផ្លូវជាតិលេខ៣១ មុខសាលាឃុំតានី ដោយលោកយាយម្នាក់ៗទទួលបានថវិកា១៤ម៉ឺន៥ពាន់រៀលស្មើៗគ្នា ។ ការប្រគល់អំណោយដល់លោកយាយទាំង២នាក់ក្រោយនេះក៏មានលោកអ៊ីវ ស្ងួន មេឃុំតានី និងមន្ត្រីក្រុមប្រឹក្សាឃុំចូលរួមផងដែរ ។
លោកមេឃុំតានីបានប្រាប់ឱ្យដឹងថា លោកយាយទាំង២នាក់នេះមានប្រវត្តិផ្សេងៗពីគ្នា។ លោកយាយឃឹម យឹម មានកូនប្រុសម្នាក់គត់ តែកូនប្រុសបានស្លាប់បាត់ទៅហើយដោយបន្សល់ទុកចៅប្រុសអាយុ១៣ឆ្នាំម្នាក់ ចំណែកលោកយាយឡុង ផង់ ពិការភ្នែក មានកូនក្មួយដែរតែរស់នៅជាមួយគេមិនបានក៏មកធ្វើតូបនៅចិញ្ចើមផ្លូវផ្ញើជីវិតតាមយថាកម្ម ។ ដូច្នេះហើយហើយលោកយាយទាំង២នាក់នេះពិតជាពិបាក តែបើឱ្យទៅរស់នៅក្នុងវត្ត ក៏ពួកគាត់មិនព្រមទៅដែរ ។ លោកមេឃុំក៏បានថ្លែងអំណរគុណសប្បុរសជនផងដែរ ដែលមានក្តីអាណិតអាសូរដល់លោកយាយទាំង៣នាក់ និងបានឧបត្ថម្ភថវិកាជូនលោកយាយធ្វើឱ្យអាជ្ញាធរឃុំធូរស្រាលមួយកម្រិត ហើយប្រាក់ផ្តល់ជូនលោកយាយទាំង២នាក់ ក្រោយនេះអាជ្ញាឃុំជាអ្នកចាត់ចែង ។
សូមបញ្ជាក់ថា ថវិកាដែលកោះសន្តិភាពពាំនាំយកទៅប្រគល់ជូនដល់លោកយាយទាំង៣នាក់ គឺបានទទួលពីអ្នកគ្រូ ឈឹម ខេមរី បង្រៀននៅសាលាបឋមសិក្សាចៅពញាហុក រាជធានីភ្នំពេញ ៥ដុល្លារ និងអំណោយពីឧបាសិកា ឈឹមប៊ួយកានីកា រស់នៅប្រទេសស្វ៊ីស បានឧបត្ថម្ភជាប្រាក់១០០ហ្វ្រង់ស្វ៊ីស។ ថវិកាទាំងនេះត្រូវបានដូរជាប្រាក់រៀលក្នុងការផ្តល់ជូនដល់លោកយាយទាំង៣នាក់ ៕
ចែករំលែកព័តមាននេះ