ទីក្រុងកៀវ៖ ថ្មីៗនេះ កងកម្លាំងពិសេសរបស់អ៊ុយក្រែនអះអាងថាពួកគេបើកប្រតិបត្តិការបាញ់នាវា២គ្រឿងរបស់រុស្ស៊ីដែលដឹកអាវុធ និងគ្រឿងបរិក្ខារយោធានៅសមុទ្រកាស់ស្ពាន (Caspian)។ ពួកគេមិនបានបញ្ជាក់ថាតើប្រតិបត្តិការនោះធ្វើឡើងតាំងពីពេលណាទេ។ មន្ត្រីរដ្ឋាភិបាលអ៊ុយក្រែនម្នាក់ថ្លែងថាដ្រូនជាច្រើនគ្រឿងរបស់អ៊ុយក្រែនវាយប្រហារស្ថានីយចម្រាញ់ប្រេងឆៅនៅសមុទ្រកាស់ស្ពានជាលើកដំបូង។ ការវាយប្រហារនេះបន្ទច់បង្អាក់ការចម្រាញ់ប្រេង និងឧស្ម័នរបស់រុស្ស៊ីចំនួនម្ភៃអណ្ដូង។
សេចក្ដីថ្លែងការណ៍របស់កងកម្លាំងពិសេសអ៊ុយក្រែនដែលបង្ហោះនៅលើតេឡេក្រាមនោះមិនបានបញ្ជាក់ឱ្យបានច្បាស់ថាតើពួកគេបានវាយប្រហារកប៉ាល់ប៉ុន្មានគ្រឿង ឬក៏ថាតើការវាយប្រហារនោះបានបង្កការខូចខាតកម្រិតណាទេ។ ពួកគេគ្រាន់តែនិយាយដោយខ្លីថាកប៉ាល់ដែលរងការវាយប្រហារទាំងនោះស្ថិតនៅលើតំបន់មាត់សមុទ្រនៃសាធារណរដ្ឋកាលមីគា (Kalmykia) ដែលជាតំបន់ស្ថិតនៅក្នុងប្រទេសរុស្ស៊ី។
ពួកគេអះអាងថានាវានោះមួយគ្រឿងឈ្មោះខំផូហ្សឺ រ៉ាក់ម៉ានីណូស (Composer Rakhmaninoff) និងមួយគ្រឿងទៀតឈ្មោះអាស្កា សារីតហ្សា (Askar-Sarydzha) ដែលកំពុងជាប់ទណ្ឌកម្មរបស់អាមេរិកពីបទដឹកជញ្ជូនអាវុធ និងគ្រឿងបរិក្ខារយោធាទៅមករវាងប្រទេសអ៊ីរ៉ង់ និងរុស្ស៊ី។ សេចក្ដីប្រកាសរបស់កងកម្លាំងពិសេសអ៊ុយក្រែនអះអាងថាចលនាតស៊ូដែលមានឈ្មោះថាប្លេកស្ប៉ាក (Black Spark) បានផ្ដល់ឱ្យពួកគេនូវព័ត៌មានលម្អិតពាក់ព័ន្ធនឹងការបម្លាស់ទីរបស់ទំនិញ និងនាវា។
សូមរំលឹកថាកាលពីថ្ងៃទី១០ ខែធ្នូ កងសន្តិសុខជាតិរបស់អ៊ុយក្រែនបានវាយប្រហារនាវាដឹកប្រេងរបស់រុស្ស៊ីមួយគ្រឿងដែលជា «កងនាវាចរណ៍ស្រមោល»។ ការវាយប្រហារធ្វើឱ្យនាវានោះខូចខាតមិនអាចប្រើការបាន។ នៅពេលវាយប្រហារនោះ នាវាកំពុងបំពេញបេសកកម្មសម្ងាត់នៅសមុទ្រខ្មៅ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ