ទីក្រុងប៉េកាំង៖ ក្រសួងការបរទេសចិនបញ្ជាក់ថាការធ្វើសមយុទ្ធយោធាជើងអាកាសរវាងយន្តហោះចិន និងរុស្ស៊ីកាលពីពេលថ្មីៗនេះជាសកម្មភាពដែលធ្វើឡើងជាធម្មតា។ សមយុទ្ធយោធានោះធ្វើឡើងជុំវិញប្រទេសជប៉ុន និងកូរ៉េខាងត្បូង និងជាផ្នែកមួយនៃផែនការសហការប្រតិបត្តិការប្រចាំឆ្នាំ។ ប្រទេសចិនចង់បញ្ជាក់ថាភាគីទាំងពីរនៅតែប្ដេជ្ញាចិត្តរក្សាសន្តិភាព និងស្ថិរភាពនៅក្នុងតំបន់។
ការថ្លែងដូចខាងលើនេះបន្ទាប់ពីអាមេរិកបញ្ចេញយន្តហោះទម្លាក់គ្រាប់បែកនុយក្លេអ៊ែរដើម្បីហោះហើរពីលើដែនសមុទ្រជប៉ុនដោយមានយន្តហោះចម្បាំង (ខ្នាតតូចៗ) របស់ជប៉ុនហោះអមដំណើរ។ ម៉្យាងទៀត ការថ្លែងដូច្នេះក៏ធ្វើឡើងបន្ទាប់ពីប្រទេសចិនទើបតែធ្វើសមយុទ្ធយោធាដោយប្រើប្រាស់នាវាដឹកយន្តហោះរបស់ខ្លួន ជាហេតុធ្វើឱ្យប្រទេសជប៉ុនប្រញាប់ចល័តយន្តហោះចម្បាំងដើម្បីបង្ការខ្លួន។ ប៉ុន្តែយន្តហោះរបស់ជប៉ុនត្រូវបានចិនតម្រង់រ៉ាដាទៅរកដោយប្រើប្រាស់កាំរស្មី។
ការហោះបង្អួតខ្លួននៃយន្តហោះទម្លាក់គ្រាប់បែកខ្នាតធំរបស់អាមេរិកម៉ាកបេ៥២ (B-52) ចំនួន២គ្រឿងរួមជាមួយយន្តហោះប្រដេញម៉ាកអែហ្វ៣៥ (F-35) និងអែហ្វ១៥ (F-15) របស់ជប៉ុនធ្វើឡើងបន្ទាប់ពីប្រទេសចិនចាប់ផ្ដើមធ្វើសមយុទ្ធយោធានៅក្នុងតំបន់នោះកាលពីសប្ដាហ៍មុន។ ចំពោះការអះអាងរបស់ជប៉ុនដែលថាមានការប្រទាំងប្រទើសគ្នារវាងយន្តហោះ និងនាវាដឹកយន្តហោះនោះ ចិនថាជប៉ុនចេះតែនិយាយ តាមពិតយន្តហោះជប៉ុនទៅវិញទេដែលធ្វើសកម្មភាពពោរពេញដោយគ្រោះថ្នាក់។
ជប៉ុន និងអាមេរិកបញ្ជាក់ជាថ្មីអំពីការរួមគ្នាទប់ស្កាត់ការប៉ុនប៉ងជាឯកតោភាគីណាមួយក្នុងការផ្លាស់ប្ដូរស្ថានការណ៍ដោយកម្លាំង។ ប្រទេសទាំងពីរក៏បានបញ្ជាក់ផងដែរថាត្រៀមខ្លួនរួចជាស្រេចក្នុងការការពារខ្លួន។ នេះបើយោងតាមសេចក្ដីថ្លែងការណ៍របស់ក្រសួងការពារជាតិជប៉ុន។ ការហោះហើរលើកនេះត្រូវគេមើលឃើញថាជាការព្យាយាមបង្ហាញកម្លាំងរបស់ខ្លួន។
ទាំងជប៉ុន និងកូរ៉េខាងត្បូងសុទ្ធតែមានមូលដ្ឋានកងទ័ពអាមេរិក។ ជប៉ុនមានមូលដ្ឋានធំជាងកូរ៉េខាងត្បូង និងមានមូលដ្ឋាននាវាដឹកយន្តហោះ និងនាវាមុជទឹករបស់អាមេរិក។ នាយអគ្គសេនាធិការកងទ័ពជប៉ុនយល់ថាការដែលរុស្ស៊ី និងចិនបើកយន្តហោះខ្នាតធំរួមគ្នានោះច្បាស់ណាស់ជាការព្យាយាមបង្ហាញកម្លាំងរបស់ពួកគេ។ នេះបើយោងតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ