ធនាគារជាតិនៃកម្ពុជានៅថ្ងៃទី១០ ខែធ្នូ ឆ្នាំ២០២៥ បានសម្រេចឱ្យលុបបំណុល៨០លានរៀល ចំពោះយោធិនពលី និងលុបបំណុល១០លានរៀលចំពោះយោធិនពិការ ។ ប្រភពដដែលបានប្រកាសថា ជាមួយគ្នានោះ ចំពោះយោធិនក្នុងសមរភូមិប្រយុទ្ធនឹងទទួលការលើកលែងការផាកពិន័យ…
ធនាគារជាតិនៃកម្ពុជានៅថ្ងៃទី១០ ខែធ្នូ ឆ្នាំ២០២៥ បានសម្រេចឱ្យលុបបំណុល៨០លានរៀល ចំពោះយោធិនពលី និងលុបបំណុល១០លានរៀលចំពោះយោធិនពិការ ។
ប្រភពដដែលបានប្រកាសថា ជាមួយគ្នានោះ ចំពោះយោធិនក្នុងសមរភូមិប្រយុទ្ធនឹងទទួលការលើកលែងការផាកពិន័យ ការទូទាត់សងការប្រាក់ និងពន្យារសងប្រាក់ដើមផងដែរ។
ប្រភពដដែលបានអះអាងថា នេះជាវិធានការជួយសម្រាលបន្ទុកដល់ប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ ។
ប្រភពដដែលបានបន្តថា ឆ្លើយតបនឹងការអំពាវនាវរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី និងក្នុងស្មារតីសាមគ្គីភាព មនុស្សធម៌ ក៏ដូចជាស្របតាមគោលនយោបាយរបស់រាជរដ្ឋាភិបាលក្នុងការជួយសម្រាលបន្ទុកដល់យោធិនដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធ ប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ ធនាគារជាតិនៃកម្ពុជាសម្រេចដាក់ចេញនូវសេចក្តីណែនាំ និងផ្តល់ការអនុគ្រោះដល់ប្រជាពលរដ្ឋជាជាជនភៀសសឹកផងដែរ ។
ធនាគារជាតិនៃកម្ពុជាបានណែនាំឱ្យគ្រឹះស្ថានធនាគា រនិងហិរញ្ញវត្ថុផ្តល់ការអនុគ្រោះដល់អតិថិជនជាជនភៀសសឹកដោយលើកលែងរាល់កម្រៃ និងការផាកពិន័យពាក់ព័ន្ធនឹងឥណទាន ចាប់ពីថ្ងៃនេះ រហូតដល់ ថ្ងៃទី៣១ ខែមីនា ឆ្នាំ២០២៦ ។
ធនាគារជាតិនៃកម្ពុជា ក៏ប្រកាសលើកលែងការទូទាត់សងការប្រាក់ និងពន្យារពេលទូទាត់សងប្រាក់ដើម ចាប់ពីថ្ងៃនេះ រហូតដល់ថ្ងៃទី៣១ ខែមីនា ឆ្នាំ២០២៦ ។ ចំពោះការអនុគ្រោះនេះ គ្រឹះស្ថានធនាគារនិង ហិរញ្ញវត្ថុមិនត្រូវធ្វើមូលធនកម្មការប្រាក់លើប្រាក់ដើមនោះទេ។
ធនាគារជាតិនៃកម្ពុជា ក៏លើកទឹកចិត្តឱ្យគ្រឹះស្ថានធនាគារនិងហិរញ្ញវត្ថុផ្តល់ការអនុគ្រោះពិសេសបន្ថែមទៀត តាមលទ្ធភាពជាក់ស្តែងដល់ប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ និងយោធិន ដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធ ៕
ចែករំលែកព័តមាននេះ