ខេត្តបាត់ដំបង ៖ ក្រោយពីទាហានថៃផ្លោងកាំភ្លើងត្បាល់ជាច្រើនគ្រាប់ក្នុងទីប្រជុំជនស្រុកសំពៅលូន នៅម៉ោង ១១ និង ១០នាទីថ្ងៃត្រង់ថ្ងៃទី ១០ ធ្នូ ប៉ុន្មាននាទីក្រោយមកគេឃើញប្រជាពលរដ្ឋរាប់ពាន់គ្រួសារទូទាំងស្រុក…
ខេត្តបាត់ដំបង ៖ ក្រោយពីទាហានថៃផ្លោងកាំភ្លើងត្បាល់ជាច្រើនគ្រាប់ក្នុងទីប្រជុំជនស្រុកសំពៅលូន នៅម៉ោង ១១ និង ១០នាទីថ្ងៃត្រង់ថ្ងៃទី ១០ ធ្នូ ប៉ុន្មាននាទីក្រោយមកគេឃើញប្រជាពលរដ្ឋរាប់ពាន់គ្រួសារទូទាំងស្រុក បានសម្រុកចាកចេញពីផ្ទះសម្បែង ដើម្បីទៅរកតំបន់មានសុវត្ថិភាព ដែលអាជ្ញាធរបានរៀបចំទទួលជាស្រេច ។
គេមិនទាន់ដឹងជាក់លាក់ពីចំនួនគ្រាប់កាំភ្លើងត្បាល់ ដែលពួកទហានថៃផ្លោងចូលស្រុកសំពៅលូននៅឡើយទេ ។ បើតាមប្រជាពលរដ្ឋដែលភៀសខ្លួនបាននិយាយថា គេមិនដឹងពីចំនួនគ្រាប់ធ្លាក់ទេ តែគេឮស្នូរធ្លាក់ច្រើនគ្រាប់នៅម្ដុំបូរី «ងិន វិត» ដែលនៅឆ្ងាយពីព្រំដែនប្រហែលជាង ២គីឡូម៉ែត្រ ហើយគ្រាប់ខ្លះធ្លាក់នៅក្បែរ «ភ្នំ ៣២» ដែលស្ថិតចំកណ្ដាលស្រុកសំពៅលូនតែម្ដង ។
មន្ត្រីស្រុកសំពៅលូនបានឲ្យដឹងថា តាមពិតអ្នកស្រុកសំពៅលូន បានភៀសខ្លួនចេញពីផ្ទះបណ្ដើរៗតាំងពីថ្ងៃទី ០៨ ខែធ្នូ ហើយបន្តចាកចេញកាន់តែច្រើននៅយប់ថ្ងៃទី ០៩ ខែធ្នូ ក្រោយពីទាហានថៃឈ្លានពានបាញ់ភ្លើងធុន M.79 ចំនួន ០២គ្រាប់ចំផ្ទះពលរដ្ឋនៅឃុំអង្គរបាន ស្រុកសំពៅលូន ។
មន្ត្រីដដែលបានប្រាប់ថា នៅព្រឹកថ្ងៃទី ១០ ខែធ្នូ គេឃើញលំនៅឋាន ឬហាងលក់ទំនិញនានា ស្ទើរ៩០% បានបិទទ្វារស្ងាត់ឈឹង តែមានអ្នកស្រុកមួយចំនួនមិនទាន់ចាកចេញ ព្រោះនៅចាំផ្ទះ ។ ប៉ុន្តែនៅម៉ោងប្រហែល ១១ និង ៣០នាទីថ្ងៃដដែលនេះ ប្រជាពលរដ្ឋទូទាំងស្រុកសំពៅលូន ត្រូវបង្ខំចិត្តបិទទ្វារផ្ទះភៀសសឹកតែម្ដង ក្រោយពីពួកទាហានថៃបាញ់ផ្លោងចូលទីប្រជុំជនជាច្រើនគ្រាប់ ។
បើតាមប្រភពពីមន្ត្រីយោធាកម្ពុជាដែលសុំមិនបញ្ចេញឈ្មោះបាននិយាយថា ទាហានថៃបានបាញ់កាំភ្លើងត្បាល់ចូលទីប្រជុំជនស្រុកសំពៅលូនជាច្រើនគ្រាប់ តែខាងយោធាយើងព្យាយាមអត់ធ្មត់មិនតបតទេ ព្រោះត្រូវស្ដាប់បទបញ្ជាថ្នាក់លើ ។ ប៉ុន្តែកម្លាំងទ័ពគ្រប់អង្គភាពនៅតាមលេណដ្ឋានជួរមុខ បានត្រៀមរួចជាស្រេចក្នុងការប្រយុទ្ធប្រសិនបើមានបទបញ្ជាឲ្យបាញ់ ។
ចាប់តាំងពីវេលាម៉ោងជាង ១១ថ្ងៃត្រង់ថ្ងៃទី ១០ ធ្នូ នៅប៉ុន្មាននាទី ក្រោយពីទាហានថៃបាញ់ផ្លោងកាំភ្លើងធំច្រើនគ្រាប់ចូលស្រុកសំពៅលូន នៅលើដងផ្លូវជាតិលេខ ៥៧B គេឃើញយានយន្តគ្រប់ប្រភេទប្រជ្រៀតគ្នាធ្វើដំណើររត់ភៀសសឹកទៅកាន់តំបន់មានសុវត្ថិភាព ដែលរដ្ឋបាលខេត្តបាត់ដំបង បានរៀបចំទទួលជាស្រេចនៅស្រុកបវេល និងស្រុកថ្មគោល ។
បើតាមមន្ត្រីស្រុកសំពៅលូន បានបញ្ជាក់ថា អ្នកស្រុកសំពៅលូន អាចនឹងចាកចេញអស់ពីផ្ទះនៅត្រឹមល្ងាចនេះ តែអាចនៅមានខ្លះនៅចាំផ្ទះ ឬចាំហាងលក់ទំនិញផ្សេងៗ ៕
ចែករំលែកព័តមាននេះ