សង្គ្រាមអ៊ីស្រាអែលនិងហាម៉ាស់ ៖ ចលនាប៉ាឡេស្ទីនហាម៉ាស់ កាលពីថ្ងៃទី៩ធ្នូយល់ឃើញថា ដំណាក់កាលទី២នៃកិច្ចព្រមព្រៀងសន្តិភាពនៅជ្រោយហ្គាហ្សារបស់លោកដូណាល់ត្រាំ ក្នុងដំណាក់កាលនេះនៅមិនទាន់អាចអនុវត្តបានទេ ប្រសិនបើអ៊ីស្រាអែលនៅបន្តរំលោភបំពាន។
ជាផ្លែផ្កានៃការគាបសង្កត់យ៉ាងខ្លាំងរបស់អាមេរិក កិច្ចព្រមព្រៀងឈប់បាញ់គ្នានៅហ្គាហ្សា បានចូលជាធរមានពីថ្ងៃទី១០តុលាមក ក្រោយសង្គ្រាមជាង២ឆ្នាំបន្តិច។ ប៉ុន្តែកិច្ចព្រមព្រៀងឈប់បាញ់នោះហាក់ដូចជាផុយស្រួយ ដោយភាគីច្បាំងគ្នាទាំង២ បានចោទគ្នាទៅវិញទៅមកថារំលោភបំពានស្ទើររាល់ថ្ងៃ។
លោកហូសសាមបាដ្រានសមាជិកការិយាល័យនយោបាយរបស់ហាម៉ាស់ ក្នុងបទសម្ភាសន៍មួយថ្លែងថា ដំណាក់កាលទី២មិនទាន់អាចចាប់ផ្ដើមឡើយ បើដរាបណាអ៊ីស្រាអែលបន្តរំលោភបំពានកិច្ចព្រមព្រៀង ហើយមិនគោរពបណ្ដាការសន្យារបស់ខ្លួន ។
លោកបានចោទប្រកាន់ជាពិសេសលើអ៊ីស្រាអែលថា រាំងខ្ទប់ការបញ្ជូនជំនួយមនុស្សធម៌ចូលហ្គាហ្សាដោយបន្តថា ក្រុមហាម៉ាស់ស្នើដល់បណ្ដាប្រទេសជាអ្នកអាជ្ញាកណ្ដាល ឲ្យធ្វើការគាបសង្កត់ ឲ្យអ៊ីស្រាអែលគោរពដំណាក់កាលទីមួយនៃកិច្ចព្រមព្រៀង។
បន្ទាប់ពីនេះបន្តិចប្រភពសន្តិសុខអ៊ីស្រាអែលមួយប្រកាសថា អ៊ីស្រាអែលអនុញ្ញាតឡើងវិញុចាប់ពីថ្ងៃទី១០ធ្នូទៅការឆ្លងកាត់ សម្រាប់ដឹកជំនួយមនុស្សធម៌ចូលហ្គាហ្សា មកពីប្រទេសហ្ស៊កដានី៕
ចែករំលែកព័តមាននេះ