ទីក្រុងស៊ីដនី៖ ភ្លើងឆេះព្រៃកំពុងតែរាលដាលយ៉ាងឆាប់រហ័សនៅរដ្ឋញូសោសវេល (New South Wales) ប្រទេសអូស្ត្រាលី ។ ត្រឹមតែមួយប៉ប្រិចភ្នែកប៉ុណ្ណោះកាលពីព្រឹកមិញ ភ្លើងដុតបំផ្លាញព្រៃអស់រាប់ពាន់ហិចតារ។ ហេតុនេះ…
ទីក្រុងស៊ីដនី៖ ភ្លើងឆេះព្រៃកំពុងតែរាលដាលយ៉ាងឆាប់រហ័សនៅរដ្ឋញូសោសវេល (New South Wales) ប្រទេសអូស្ត្រាលី ។ ត្រឹមតែមួយប៉ប្រិចភ្នែកប៉ុណ្ណោះកាលពីព្រឹកមិញ ភ្លើងដុតបំផ្លាញព្រៃអស់រាប់ពាន់ហិចតារ។ ហេតុនេះ អាជ្ញាធរបានអំពាវនាវឱ្យប្រជាជនជម្លៀសខ្លួនជាបន្ទាន់។ អាជ្ញាធរបានចេញសេចក្ដីព្រមានកម្រិតខ្ពស់បំផុតសម្រាប់ឆកសមុទ្រផេហ្កាន (Phegans) និងវ៉យវ៉យ (Woy Woy) នៅតំបន់មាត់សមុទ្រភាគកណ្ដាលនៃរដ្ឋខាងលើនេះ។
ទីតាំងទាំងនោះមានប្រជាជនរស់នៅប្រហែលជាង៣៥ម៉ឺននាក់ និងស្ថិតនៅចម្ងាយ៤៥គីឡូម៉ែត្រភាគខាងជើងទីក្រុងស៊ីដនី។ រហូតមកដល់ពេលនេះ ភ្លើងឆេះព្រៃបានដុតបំផ្លាញផ្ទះរបស់ប្រជាជន១៦ខ្នង។ នេះបើយោងតាមការផ្សាយរបស់អេប៊ីស៊ីអូស្ត្រាលី។ រលកកម្ដៅនៅញូសោសវេលកាលពីព្រឹកមិញដែលហក់ឡើងដល់៤២អង្សាក៏ជាកត្តាធ្វើឱ្យភ្លើងឆេះរាលដាលកាន់តែឆាប់រហ័ស។ នេះបើតាមការអះអាងថារបស់ការិយាល័យឧតុនិយម។
នាយករដ្ឋមន្ត្រីអូស្ត្រាលីចេញសេចក្ដីប្រកាសថាសូមប្រជាជនជួយមើលការខុសត្រូវគ្នាទៅវិញទៅមក និងអនុវត្តតាមសេចក្ដីណែនាំរបស់អាជ្ញាធរ។ គិតត្រឹមល្ងាចនេះ ភ្លើងឆេះព្រៃជាង៥០កន្លែងកើតឡើងព្រមៗគ្នានៅទូទាំងរដ្ឋញូសោសវេល។ ភ្លើងឆេះព្រៃនៅតំបន់អាប់ផឺ ហាន់ថឺ (Upper Hunter) ក៏ស្ថិតនៅក្នុងស្ថានភាពប្រកាសអាសន្នកម្រិតខ្ពស់បំផុតផងដែរ។ នៅទីនោះ ភ្លើងបានដុតបំផ្លាញព្រៃអស់ជិតមួយម៉ឺនហិចតារ។
សម្រាប់រដូវក្ដៅនៅប្រទេសអូស្ត្រាលីឆ្នាំនេះ អាជ្ញាធរបានចេញសេចក្ដីអំពាវនាវឱ្យប្រជាជនប្រុងប្រយ័ត្នខ្ពស់ចំពោះភ្លើងឆេះព្រៃព្រោះធ្លាប់មានមេរៀនម្ដងហើយកាលពីរដូវក្ដៅឆ្នាំ២០១៩-២០២០។ កាលនោះ ភ្លើងបានដុតបំផ្លាញព្រៃឈើជាង២៤លានហិចតារ, ស្លាប់មនុស្ស៣៣នាក់ និងស្លាប់សត្វសរុបប្រហែល៣ពាន់លានក្បាល។ ក្នុងនោះមានថនិកសត្វ ល្មូន បក្សី និងកង្កែប។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ