រាជធានី​ភ្នំពេញ​ ៖ ​ក្រសួង​ធនធានទឹក​ និង​ឧតុនិយម​បាន​បាន​ឲ្យ​ដឹង​ថា ​កម្ពុជា​បាន​រង​ឥ​​ទ្ធិពល​ព្យុះ​កូ​តូ ធ្វើ​ឲ្យ​តំបន់​មួយ​ចំនួន​ចុះ​ត្រជាក់​ដល់​១៧​អង្សា​សេ​ ។

យោង​តាមព្រឹត្តិបត្រ​ព័ត៌មាន​ស្តី​​អំពី​ស្ថានភាព​ធាតុអាកាស​នៅ​ព្រះរាជាណាចក្រ​កម្ពុជា សម្រាប់​ថ្ងៃ​ទី​២៩ ខែវិច្ឆិកា ឆ្នាំ​២០២៥ បាន​លើក​ឡើង​ថា សម្ពាធ​ទាប​ដែល​កើត​នៅ​មហាសមុទ្រ​ប៉ា​ស៊ី​ហ្វិ​ក​ខាង​លិច ​និង​សមុទ្រ​ចិន​ខាងត្បូង បាន​វិ​វត្ត​ទៅ​ជា​ព្យុះ​ទី​២៧​ឈ្មោះ កូ​តូ (Koto) T2527 ហើយ​មាន​ឥទ្ធិ​ពល​ខ្លាំង​លើ​របប​ខ្យល់មូសុង​ឦសាន ដែល​បក់​លើ​អាង​ទន្លេមេគង្គ សមុទ្រ​កម្ពុជា សមុទ្រ​អាន​ដាម​ម៉ែ​ន និង​លើ​ព្រះរាជាណាចក្រ​កម្ពុជា​។

ព្រះរាជាណាចក្រ​កម្ពុជា ​ដែល​ស្ថិត​នៅ​ក្បែរ​គន្លង​ផ្លូវ​ដើរ​របស់​ព្យុះ​កូ​តូ​នេះ ទទួល​រង​ឥទ្ធិពល​កម្រិត ២០% នៅ​ចន្លោះ​រវាង​ចាប់ពី​ថ្ងៃ​ទី​២៩ ដល់ទី​៣០ ខែវិច្ឆិកា​។

ក្រសួង​បាន​បន្ត​ថា​ ស្ថានភាព​បែប​នេះ​នឹង​ធ្វើ​ឱ្យ​៖ ចាប់ពី​ថ្ងៃ​ទី​២៩ ខែវិច្ឆិកា ដល់​ថ្ងៃ​ទី​១ ខែធ្នូ ឆ្នាំ​២០២៥​ នៅ​តំបន់​វាលទំនាប​មាន សីតុណ្ហភាព​មធ្យម​អប្បបរមា​២០°C និង​សីតុណ្ហភាព​មធ្យម​អតិបរមា​២៩°C​ ។ ខ្យល់​បក់​មក​ពី​ទិសឦសាន និង​ទិសបូព៌​មាន​ល្បឿន​មធ្យម​៥​ម៉ែត្រ​/​វិនាទី និង​មាន​ខ្យល់​កន្ត្រាក់​។ ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយ​រៀង និង​ភ្នំពេញ ពុំ​មាន​ភ្លៀង​ធ្លាក់​ទេ​។

ចំណែក​នៅ​តំបន់​ខ្ពង់រាប ​មាន​សីតុណ្ហភាព​មធ្យម​អប្បបរមា​១៧°C និង​សីតុណ្ហភាព​មធ្យម​អតិ​បរមា​២៨°C​។ ខ្យល់​បក់ មក​ពី​ទិសឦសាន និង​ទិសឧត្តរ​មាន​ល្បឿន​មធ្យម​៥​ម៉ែត្រ វិនាទី​។ ខេត្តកំពង់​ស្ពឺ ប៉ៃលិន ឧត្តរមានជ័យ ព្រះ​វិហារ ក្រចេះ ស្ទឹង​ត្រែង រតនគិរី មណ្ឌលគិរី ជួរ​ភ្នំ​ដងរែក និង​តំបន់​ជួរ ភ្នំក្រវាញ ពុំ​មាន​មាន​ភ្លៀង​ធ្លាក់​ទេ​ ។

ចំណែក​នៅ​តំបន់​មាត់សមុទ្រ​មាន​សីតុណ្ហភាព​មធ្យម​អប្បបរមា​២០°C និង​សីតុណ្ហភាព​មធ្យម​អតិបរមា​៣០°C​។ ខ្យល់​បក់​មក​ពី​ទិសឦសាន និង​ទិសអាគ្នេយ៍​មាន​ល្បឿន​មធ្យម​៤​ម៉ែត្រ​វិនាទី​។ ខេត្តកោះកុង ព្រះ​សីហ​នុ កំពត កែប និង​ជួរ​ភ្នំ​បូកគោ ពុំ​មាន​មាន​ភ្លៀង​ធ្លាក់​ទេ​​។ ​រលក​សមុទ្រ​មាន​កម្ពស់​មធ្យម​អប្បបរមា ០,៥០​ម៉ែត្រ និង​កម្ពស់​មធ្យម​អតិបរមា​១,៥០​ម៉ែត្រ​៕