អន្តរជាតិ ៖ តម្លៃមាសអន្តរជាតិបានឡើងដល់កម្រិតខ្ពស់បំផុតក្នុងរយៈពេល៣សប្តាហ៍ (មិនមែនកម្រិតខ្ពស់បំផុតគ្រប់ពេល) នៅថ្ងៃទី២៣ ខែកុម្ភៈ ឆ្នាំ២០២៦ ដោយសារភាពមិនប្រាកដប្រជាបង្កឡើងដោយការសម្រេចរបស់តុលាការកំពូលសហរដ្ឋអាមេរិកក្នុងការលុបចោលពន្ធបដិការពីមុនរបស់លោកប្រធានាធិបតី ដូណាល់ ត្រាំ…
អន្តរជាតិ ៖ តម្លៃមាសអន្តរជាតិបានឡើងដល់កម្រិតខ្ពស់បំផុតក្នុងរយៈពេល៣សប្តាហ៍ (មិនមែនកម្រិតខ្ពស់បំផុតគ្រប់ពេល) នៅថ្ងៃទី២៣ ខែកុម្ភៈ ឆ្នាំ២០២៦ ដោយសារភាពមិនប្រាកដប្រជាបង្កឡើងដោយការសម្រេចរបស់តុលាការកំពូលសហរដ្ឋអាមេរិកក្នុងការលុបចោលពន្ធបដិការពីមុនរបស់លោកប្រធានាធិបតី ដូណាល់ ត្រាំ (Donald Trump) នោះ បានដាក់សម្ពាធលើប្រាក់ដុល្លារអាមេរិក និងជំរុញឱ្យបណ្តាវិនិយោគិនសម្រុកទិញមាសដុំ ដែលត្រូវបានចាត់ទុកជាទ្រព្យសម្បត្តិដ៏មានសុវត្ថិភាព។
យោងតាមប្រភពពីទីភ្នាក់ងារសារព័ត៌មាន Reuters នៅថ្ងៃទី២៣ ខែកុម្ភៈ ឆ្នាំ២០២៦ បានឱ្យដឹងថា តម្លៃមាសអន្តរជាតិភ្លាមៗបានកើនឡើង ១,១% ដល់ ៥ ១៥៨ ដុល្លារក្នុង១អោន ឬ ៦ ២១៤ ដុល្លារក្នុង១តម្លែង នៅម៉ោង ១ រសៀល (ម៉ោងនៅកម្ពុជា) ដោយបានឡើងដល់កម្រិតខ្ពស់បំផុត ចាប់តាំងពីថ្ងៃទី៣០ ខែមករា ឆ្នាំ២០២៦។
លោក Tim Waterer ប្រធានអ្នកវិភាគទីផ្សារនៅក្រុមហ៊ុន KCM Trade បានលើកឡើងថា ការសម្រេចចិត្តលុបចោលការអនុវត្តពន្ធបដិការពីមុនរបស់លោក ត្រាំ ដោយតុលាការកំពូលអាមេរិក កាលពីថ្ងៃសុក្រសប្តាហ៍មុន ក្រៅពីធ្វើឱ្យប្រធានាធិបតីអាមេរិកខឹងសម្បារ វាក៏បានបន្ថែមភាពមិនប្រាកដប្រជាមួយទៀតដល់ទីផ្សារសកល ដោយពាណិជ្ជករបានងាកទៅរកការវិនិយោគលើមាសជាម្តងទៀតជាការការពារ។
តុលាការកំពូលអាមេរិកបានលុបចោលពន្ធសកលរបស់លោក ត្រាំ កាលពីឆ្នាំមុន ដែលលោកបានអនុវត្តក្រោមច្បាប់ឆ្នាំ ១៩៧៧ ដែលត្រូវបានស្គាល់ថា ច្បាប់អំណាចសេដ្ឋកិច្ចបន្ទាន់អន្តរជាតិ ឬ IEEPA ដោយធ្វើឱ្យប្រធានាធិបតីសាធារណរដ្ឋរូបនេះបរាជ័យ និងខកចិត្តយ៉ាងខ្លាំង និងជះផលប៉ះពាល់យ៉ាងធ្ងន់ធ្ងរដល់សេដ្ឋកិច្ចពិភពលោក។ បន្ទាប់ពីការសម្រេចរបស់តុលាការ លោក ត្រាំ បានប្រកាសនឹងដំឡើងពន្ធថ្មីពី ១០% ទៅ ១៥% លើទំនិញគ្រប់ប្រទេសទាំងអស់នាំចូលមកសហរដ្ឋអាមេរិក។
ជាលទ្ធផល សន្ទស្សន៍ទីផ្សារភាគហ៊ុន Wall Street និងប្រាក់ដុល្លារអាមេរិកបានធ្លាក់ចុះនៅអាស៊ី នៅថ្ងៃទី២៣ ខែកុម្ភៈ ដោយសារតែភាពមិនច្បាស់លាស់ជុំវិញពន្ធគយរបស់សហរដ្ឋអាមេរិក។
ងាកទៅផ្នែកភូមិសាស្ត្រនយោបាយ ប្រទេសអ៊ីរ៉ង់បានបង្ហាញថា ខ្លួនត្រៀមរួចជាស្រេចដើម្បីសម្បទានលើកម្មវិធីនុយក្លេអ៊ែររបស់ខ្លួនក្នុងការចរចាជាមួយអាមេរិក ជាថ្នូរនឹងការដកទណ្ឌកម្ម និងការទទួលស្គាល់សិទ្ធិរបស់ខ្លួនក្នុងការបង្កើនសារធាតុអ៊ុយរ៉ាញ៉ូម ខណៈដែលអ៊ីរ៉ង់ខ្លួនឯងកំពុងស្វែងរកការបញ្ជៀសការប៉ះទង្គិចកម្លាំងយោធាជាមួយនឹងសហរដ្ឋអាមេរិក។
ទន្ទឹមនឹងនេះ ទិន្នន័យកាលពីថ្ងៃសុក្រសប្តាហ៍មុនបានបង្ហាញថា អតិផរណារបស់សហរដ្ឋអាមេរិកបានកើនឡើងច្រើនជាងការរំពឹងទុកក្នុងខែធ្នូ ហើយសញ្ញាកំពុងចង្អុលបង្ហាញពីការកើនឡើងបន្ថែមទៀតក្នុងខែមករា ដោយនឹងបង្កើនការរំពឹងទុកថា ធនាគារកណ្តាលសហរដ្ឋអាមេរិក (Fed) នឹងមិនកាត់បន្ថយអត្រាការប្រាក់មុនខែមិថុនានោះទេ៕ ប្រភព ៖ Reuters
ចែករំលែកព័តមាននេះ