ខេត្តកំពង់ចាម ៖ ទីតាំងកសិដ្ឋានចិញ្ចឹមជ្រូកមួយកន្លែងរបស់លោកស្រី លី កញ្ញា នៅភូមិទី៣ ឃុំល្វាលើ ស្រុកចំការលើ បានបង្កជះក្លិនស្អុយមកលើភូមិឋានរបស់បងប្អូនប្រជាពលរដ្ឋ ហើយត្រូវបានគេថតបង្ហោះចែកចាយនៅលើបណ្ដាញសង្គម…
ខេត្តកំពង់ចាម ៖ ទីតាំងកសិដ្ឋានចិញ្ចឹមជ្រូកមួយកន្លែងរបស់លោកស្រី លី កញ្ញា នៅភូមិទី៣ ឃុំល្វាលើ ស្រុកចំការលើ បានបង្កជះក្លិនស្អុយមកលើភូមិឋានរបស់បងប្អូនប្រជាពលរដ្ឋ ហើយត្រូវបានគេថតបង្ហោះចែកចាយនៅលើបណ្ដាញសង្គម ។ ជាមួយនោះ ត្រូវបានឯកឧត្តមអ៊ុន ចាន់ដា អភិបាលខេត្ត បានចាត់ឱ្យលោកចាន់ រ៉ាន់ អភិបាលរងខេត្តចុះត្រួតពិនិត្យផ្ទាល់ ជាមួយមន្ទីរពាក់ព័ន្ធមួយចំនួនដល់ទីតាំងចិញ្ចឹមជ្រូកតែម្ដង ។
លោកនួន គង់សល្យ ប្រធានមន្ទីរបរិស្ថានខេត្តកំពង់ចាមបានប្រាប់ឲ្យដឹង នារសៀលថ្ងៃទី២៨ វិច្ឆិកា ឆ្នាំ២០២៥ ថា ចំពោះទីតាំងកសិដ្ឋានចិញ្ចឹមជ្រូកមួយកន្លែងនេះ ទើបតែដំណើរការបើកអាជីវកម្ម ស្ថិតនៅចម្ងាយប្រមាណ៧០០ម៉ែត្រ ពីភូមិរបស់ប្រជាពលរដ្ឋរស់នៅ ។ កាលពីប៉ុន្មានខែមុន មិនដែលមានបញ្ហាចោទឡើងនោះទេ ទើបតែមកដល់រដូវរំហើយខ្យល់បក់ពីទិសខាងជើង ជាហេតុធ្វើឲ្យនាំក្លិនស្អុយជះទៅដល់ភូមិឋានរបស់បងប្អូនប្រជាពលរដ្ឋ។
លោកប្រធានមន្ទីរបរិស្ថានខេត្តបានបន្តឲ្យដឹងទៀតថា ក្រោយពីមានហេតុការណ៍នេះកើតឡើង ត្រូវបានឯកឧត្តមអភិបាលខេត្តបានចាត់ឱ្យលោកចាន់ រ៉ាន់ អភិបាលរងខេត្ត បានចាប់តាំងឱ្យក្រុមការងារចម្រុះមន្ទីរអង្គភាពពាក់ព័ន្ធចុះទៅពិនិត្យមើលជាក់ស្ដែង កាលពីថ្ងៃទី២៦ វិច្ឆិកា ឆ្នាំ២០២៥ ហើយបញ្ហាក្លិនស្អុយដែលជះទៅដល់ភូមិពលរដ្ឋ ដោយសារតែកត្តាឡជីវៈឧស្ម័ន និងមិនមានដាំដើមឈើជុំវិញកសិដ្ឋាននោះទេ ។
ដូច្នេះ ដើម្បីកុំឲ្យមានបញ្ហាមន្ត្រីជំនាញតម្រូវឲ្យម្ចាស់ទីតាំងអាជីវកម្មបើកកសិដ្ឋានចិញ្ចឹមជ្រូក ត្រូវតែធ្វើការដាំដុះដើមឈើឲ្យបានច្រើន ព្រោះថាវាមានអត្ថប្រយោជន៍ជួយទប់កម្លាំងខ្យល់បោកៗ និងស្រូបយកជាតិពុលបានមួយចំនួនទៀតផង ។
ក្រោយពីទទួលបានការសម្របសម្រួលពីអភិបាលរងខេត្តអាជ្ញាធរមូលដ្ឋាន មន្ទីរកសិកម្មរុក្ខាប្រមាញ់និងនេសាទ គឺម្ចាស់កសិដ្ឋានយល់ព្រមធ្វើតាមរបស់អាជ្ញាធរ ដើម្បីធ្វើយ៉ាងណាកុំឱ្យជះក្លិនភាយទៅដល់អ្នកភូមិបន្តទៀត ។
ជាមួយនោះ មន្ទីរបរិស្ថានខេត្តកំពង់ចាម ក៏បានចេញសេចក្តីប្រកាសព័ត៌មានស្ដីពីការចុះត្រួតពិនិត្យបង្កក្លិនរបស់កសិដ្ឋានចិញ្ចឹមជ្រូកស្ថិតនៅភូមិទី៣ ឃុំល្វាលើស្រុកចំការលើ ក្នុងនោះរួមមានដូចជា÷
១-កសិដ្ឋានចិញ្ចឹមជ្រូកនេះស្ថិតនៅភូមិទី៣ ឃុំល្វាលើ ស្រុកចំការលើ ខេត្តកំពង់ចាម ត្រូវបានសាងសង់ចម្ងាយពីភូមិប្រមាណជាង៧០០ម៉ែត្រ ពីលំនៅឋានរបស់ប្រជាពលរដ្ឋកំពុងរស់នៅ ។ សំណង់កសិដ្ឋាននេះ ត្រូវបានសាងសង់តាមលក្ខណៈស្តង់ដារបច្ចេកទេសនិងមានច្បាប់អនុញ្ញាតអាជីវកម្មត្រឹមត្រូវ ។
២-កសិដ្ឋានចិញ្ចឹមជ្រូកខាងលើ ពិតជាបានបង្កក្លិនបន្តិចបន្តួចចេញពីទីតាំងកសិដ្ឋានពិតប្រាកដមែន ។ ដោយបញ្ហានេះ បង្កឡើងដោយអាងប្រព្រឹត្តកម្មសំណល់រឹងរាវ (ឡជីវឧស្ម័ន) សម្រាប់កាត់បន្ថយក្លិនលាមកសត្វនៅមានចំណុចខ្វះខាត ។
ក្នុងករណីម្ចាស់កសិដ្ឋានមិនអនុវត្តតាមការណែនាំរបស់ក្រុមការងារ ឬនៅមានក្លិនបញ្ហាបង្កក្លិនប៉ះពាល់ដល់ប្រជាពលរដ្ឋក្នុងមូលដ្ឋានរដ្ឋបាលខេត្ត និងអនុវត្តយ៉ាងតឹងរឹងបំផុត ។ ជាមួយនោះ កសិដ្ឋាននេះទើបតែនឹងដំណើរការចិញ្ចឹមជ្រូកត្រង់ចំនួនប៉ុន្មានពាន់ក្បាលគឺលោកប្រធានមន្ទីរមិនបានបញ្ជាក់ច្បាស់នោះទេ ។
ចែករំលែកព័តមាននេះ